19/11/2019 16:24
728 x 90

Banklar müştərilərin evli-subaylığından əlavə, boşanmış-dul olması ilə də maraqlanmağa başlayıblar…

Ruslan Atakişiyev: “Bankların müştəridən boşanmış və ya dul olmasını soruşmaqda məqsədi özünü risqlərdən qorumaqdır”

img

Hazırda Azərbaycanda fəaliyyət göstərən kommersiya bankları əhaliyə kredit verməkdə, belə demək mümkündürsə, xəsislik edirlər. Bu səbəbdən də kredit götürənlərin sayı da xeyli dərəcədə azalıb. Kredit götürmək istəyənləri banklardan uzaqlaşdıran səbəblər sırasında kredit faizlərinin yüksək olması ilə yanaşı, kredit götürən şəxsin ailə vəziyyəti haqqında sorğunun aparılmasıdır.

Bəllidir ki, əvvəllər banklar kredit götürən şəxsin ailə vəziyyətinin necə olması haqqında bölmədə evli və ya subay xanasını seçirdilər. Ancaq indi ailə vəziyyəti haqqında bölmədə evli, subay qeyd etməklə yanaşı, boşanmış və dul xanası da qeyd olunmalıdır.

  • “Boşanmış və ya dul olan şəxslər ilk ailəsindən olan uşaqlara aliment ödədiyi üçün, bu hal onların aylıq kredit ödənişinə təsir edəcək”

Məsələ ilə bağlı fikir bildirən iqtisadçı-ekspert Ruslan Atakişiyev “Bakı-Xəbər”ə açıqlamasında qeyd etdi ki, ötən ilin sonunda banklarla bağlı yeni qərar qəbul olunub. Həmin qərara əsasən, banklar öz müştərilərinə kredit verən zaman məsuliyyətin əksər hissəsi kredit götürənə deyil, bankların üzərinə düşür: “Bu səbəbdən də banklar hər hansı risqi nəzərə alıb, ona uyğun kredit verirlər. Yeni qərarda qeyd olunur ki, banklar öz müştərilərini seçərkən onu dərindən tanımalıdırlar. Kredit götürən şəxsin ailə vəziyyətini, işləməsini banklar araşdırmalıdırlar.

Ötən illərdən fərqli olaraq, banklar kredit götürən şəxsin ailə vəziyyətini daha dərindən araşdırırlar. Kredit götürən şəxsin evli, subay olması ilə yanaşı, onun boşanmış və ya dul olması da bankları maraqlandırır. Məlumdur ki, boşanmış şəxs keçmiş ailəsi üzərində məsuliyyət daşıyır. Boşanmış şəxs ilk ailəsindən olan uşaqlara aliment ödəməlidir. Kredit götürmək istəyən şəxsin əlavə xərcləmələrinin olması onun aylıq ödənişinə də təsir edir. Analoji hal dul şəxslərə də şamil olunur”.

Həmsöhbətimizin sözlərinə görə, bankların müştəridən boşanmış və ya dul olmasını soruşmaqda məqsədi özünü risqlərdən qorumaqdır: “Kredit götürmək istəyənlər bunu şəxsi həyata müdaxilə kimi anlamasın”.

Günel CƏLİLOVA

Son xəbərlər