Bir çox hallarda gündəlik istifadə etdiyimiz üsullara o qədər alışmışıq ki, bu üsulların daha yaxşı alternativləri haqqında heç düşünmürük. Məsələn, kommunal xidmət ödənişlərini bəzi insanlar hələ də bankın ofisində və ya yaxındakı marketdə gedib terminal üzərindən ödəyir. Elələri də var ki, vəsaiti ödəniş üçün dost-tanışdan göndərir. Bu vasitələrə rəğmən, vaxtınız və enerjinizi daha vacib işlərə sərf etmək üzərində düşünün. Eyni zamanda, kredit sifariş vermək istəyənlər banka getmədən, onlayn formada müraciət edib, istədiyi məbləğdə kredit sifariş verə bilər.
Məlumat üçün bildirək ki, bu gün inkişaf etmiş ölkələrdə geniş tətbiq edilən elektron bankçılıq Azərbaycanda da mövcuddur. Əksər yerli banklarda bir sıra əməliyyatları onlayn icra etmək mümkündür. Müxtəlif bankların rəsmi portallarına daxil olmaqla orada onlayn kreditin verildiyini görmək olar. Bunun üçün onlayn kredit xanasında qeyd olunanları doldurmaq lazımdır. Kredit götürmək istəyən şəxs onlayn formada banka müraciət edir. Növbəti günü həmin şəxsə bankdan zəng gəlir ki, bəs kredit üçün banka yaxınlaşıb müraciət etsinlər. Maraqlıdır, kredit üçün elektron qaydada banka müraciət edən şəxs banka niyə getməlidir? Hesaba pul köçürülənədək bütün mərhələlərin virtual qaydada həyata keçirilməsi mümkündür. Məsələn, bank vətəndaşa dair məlumatları da internetlə qəbul edə, elektron imza ilə müqavilə bağlaya və pulu müştərinin hesabına köçürə bilər.
Ancaq Azərbaycanda belə deyil. Kredit üçün onlayn müraciət etsəniz də, geri qalan prosedurlar ənənəvi qaydada həyata keçirilir. Maraqlıdır, niyə bizim ölkədə kredit əməliyyatı tam şəkildə elektronlaşdırılmayıb?
“…bu xidməti daha da genişləndirmək mümkündür”
İqtisadçı-ekspert Samir Əliyev bildirdi ki, tam onlayn kredit xidməti bizim bank sektorunda da istifadə edilə bilər: “Bu gün yerli banklarda elektron xidmətlər də mövcuddur. Demək olar ki, əksəriyyətində internet və mobil bankçılıq var. Faktiki olaraq, müştəri banka getmədən də öz hesabına daxil olub, kartına pul köçürə və bu kimi digər əməliyyatları da virtual edə bilər. Düzdür, bir sıra hallarda sahibkar hesabından depozit karta pul köçürməkdə çətinlik yaranır. Amma, ümumi götürəndə, bankların elekron xidmətindən istifadə etmək olur.
Elektron kreditə gəlincə isə, müştəri banka onlayn müraciət edə bilər. Daha sonra sizə zəng gəlir, məlumatlarınız öyrənilir və sonda kreditlə bağlı qərar verilir. Əlbəttə, bu xidməti daha da genişləndirmək mümkündür. Bank müştərinin onlayn daxil etdiyi məlumatları dəyərləndirib, elektron imza ilə müqavilə bağlaya bilər. Bu halda, vətəndaşın banka getməyinə də ehtiyac qalmaz. Nəticədə sifariş edilən vəsait birbaşa müştərinin hesabına köçürülər. Bu cür tam elektron xidmət dünyada mövcuddur, bizim ölkədə də tətbiq etmək olar”.
Günel CƏLİLOVA
