Azərbaycan Prezidenti İlham Əliyev rusiyalı həmkarı Vladimir Putinlə "Valday" Beynəlxalq Diskussiya Klubunun 16-cı toplantısı çərçivəsində görüşüb. Görüşdə iki ölkə arasında münasibətlər və iqtisadi perspektivlər müzakirə olunub.
Məlumdur ki, Azərbaycanla Rusiya arasında həmişə isti münasiblər mövcud olub. İki ölkə arasında iqtisadi münasibətlər, qarşılıqlı ticarət əlaqələri, kənd təsərrüfatı sahəsində əməkdaşlıq daim inkişaf edir.
"Valday" Beynəlxalq Diskussiya Klubunun 16-cı toplantısı çərçivəsində görüşdə iştirak edən Azərbaycan Prezidenti İlham Əliyev rusiyalı həmkarı Vladimir Putinlə iki ölkə arasındakı iqtisadi münasibətlərdən söhbət açıb. Dövlət başçısı qeyd edib ki, 2018-ci ilin avqustu ilə müqayisədə 2019-cu ilin avqustuna ikitərəfli ticarət dövriyyəsi 20% artıb: “Müsbət dinamika artımı ən azı ilin sonuna qədər davam edəcək”.
Hər iki tərəf 2018-ci ildə ticarət dövriyyəsinin 2,55 milyard dollar səviyyəsində olduğunu, 2017-ci ildən 19,1% artdığını qeyd edib.
Rusiya ilə Azərbaycan arasında ticari, iqtisadi münasibətlərin inkişaf etməsi hər iki ölkənin bir-birinə investisiya yatırmasına səbəb olur.
“…ticarət dövriyyəsi ötən il 2,5 milyard dollar olub”
Millət vəkili Rüfət Quliyev bizimlə söhbətində qeyd etdi ki, iki ölkə arasında münasibətlər uğurla inkişaf edir: “Rusiya ilə Azərbaycan arasında ticari-iqtisadi əlaqələr möhkəmlənir. Hətta hər iki ölkə arasındakı ticarət dövriyyəsi ötən il 2,5 milyard dollar olub”.
Həmsöhbətimiz onu da vurğuladı ki, hər iki ölkənin birgə iştirakı ilə mühum tədbirlər həyata keçirilir: “Keçirilən tədbirlərdə Rusiya və Azərbaycan iş adamları iştirak edirlər. Bu cür tədbirlər sayəsində həm iki ölkə arasındakı münasibətlər inkişaf edir, eyni zamanda, investorlar investisiya yatırmaqda maraqlı olurlar. Azərbaycanla Rusiya arasındakı iqtisadi münasibətlər ildən-ilə artır. Görülən işlər sayəsində Azərbaycanda çoxlu sayda Rusiya şirkəti fəaliyyət göstərir. Eynilə Rusiyada Azərbaycan şirkətləri fəaliyyət göstərir”.
Millət vəkilinin sözlərinə görə, bu gün bizim ölkələr müxtəlif sahələrdə: siyasi, iqtisadi, humanitar, nəqliyyat və informasiya texnologiyaları, energetika üzrə əməkdaşlıq edirlər: “Məlumdur ki, Azərbaycan və Rusiya iri investisiya, infrastruktur layihələrinin həyata keçirilməsində fəallıq göstərir. Hər iki ölkə arasında yaşanan iqtisadi münasibətlərin inkişaf etməsi qarşılıqlı investisiyaların artmasına səbəb olur və olacaq”.
Günel CƏLİLOVA
