“Kiçik və orta sahibkarlıqla məşğul olanlara kredit verilişi zamanı zaminliyin ləğv olunması istehsal sahələrinin artmasına səbəb olacaq”
Azərbaycanda əhalinin layiqli həyat səviyyəsini təmin etmək və sosial rifahını yüksəltmək, iqtisadiyyatın tarazlı və dayanıqlı inkişafına xidmət üçün sahibkarlıq kreditlərinin verilməsi zamanı təminatla (girov) bağlı tələblər aradan qaldırılıb. Azərbaycan Respublikasının İpoteka və Kredit Zəmanət Fondunun yaydığı məlumatda qeyd olunur ki, son illərdə həyata keçirilən, konkret hədəflərə yönəlmiş məqsədyönlü islahatlar nəticəsində ölkədə biznes və investisiya mühitinin əlverişliliyi daha da artırılıb: “2018-ci ilin sonlarından etibarən İpoteka və Kredit Zəmanət Fondu (Fond) tərəfindən kredit zəmanət mexanizminin və faiz subsidiyalarının verilməsinin tətbiqinə başlanılıb, bu dövr ərzində Fondun dəstəyilə iqtisadiyyatın müxtəlif sahələri üzrə (qida sənayesi məhsullarının istehsalı, kənd təsərrüfatı, ticarət xidmətləri, maşın və avadanlıq istehsalı, eləcə də digər sənaye məhsullarının istehsalı və emalı) 41,759,000 manat məbləğində sahibkarlıq kreditlərinin verilməsinə nail olunub. Həyata keçirilmiş dəyişikliklər nəticəsində artıq Fondun kredit reytinqi modelinə əsasən aşağı risq kateqoriyasına aid edilmiş, lakin təminat səviyyəsi qənaətbəxş olmayan sahibkarlar üçün Fondun zəmanətilə təminatsız sahibkarlıq kreditlərindən istifadə imkanları yaradılıb. Mövcud mexanizm çərçivəsində verilən sahibkarlıq kreditləri üzrə təminata dair tələblərin aradan qaldırılması daha çox sahibkarlıq subyektinin maliyyələşməsinə, təminat yetərsizliyi olan sahibkarların maliyyə resurslarına çıxış imkanlarının artırılmasına, nəticə etibarilə iqtisadiyyatın şaxələnməsinə, iqtisadi aktivliyin və ölkədə qeyri-neft sektorunun inkişafının dəstəklənməsinə şərait yaradacaq”.
Girov tələbinin ləğv olunmasının əhəmiyyyəti haqqında danışan iqtisadçı ekspert Natiq Cəfərli “Bakı-Xəbər”ə açıqlamasında qeyd etdi ki, zaminliyin ləğv olunması sahibkarlığın inkişaf etməsinə səbəb olacaq. İl ərzində banklar tərəfindən sahibkarlıqla məşğul olanlar üçün 45 milyon manat vəsait ayrılıb. Bu rəqəm kiçik və orta sahibkarlıq məşğul olmaq istəyənlər üçün az rəqəmdir: “Nəzərə almaq üçün iş yerinin yaranması üçün kifayət qədər vəsait lazımdır. Azərbaycanda iş yerinin yaranması üçün 25 min manat vəsait tələb olunur. Vəsaitin artırılmasına ehtiyac var”. Həmsöhbətimiz hesab edir ki, kiçik və orta sahibkarlıqla məşğul olanlara kredit verilişi zamanı zaminliyin ləğv olunması müsbət addımdır. Bu addım istehsal sahələrinin artmasına səbəb olacaq.
Günel CƏLİLOVA
