Qeyri-neft sektorunun inkişafına yönələn iqtisadi strategiya getdikcə özünü daha dərindən büruzə verir. Artıq dünya bazarlarında “Azərbaycan brendi” dəyərli markalardan sayılır. İndi təbii karbohidrogen ehtiyatları ilə yanaşı, becərilən kənd təsərrüfatı məhsullarımız xarici bazarlarda tanınır. Dövlətin sahibkarlığın inkişafına qayğısı, ixracyönümlü məhsulların istehsalına hərtərəfli yardım və xaricdə təşviq edilməsi ölkəmizin xarici ticarətinin əsas atributuna çevrilib.
Məlumdur ki, Azərbaycan brendi adı altında istehsal olunan məhsullar neçə ildir beynəlxalq sərgilərdə nümayiş olunur. Qeyd edək ki, bu ilin əvvəlindən Azərbaycan məhsulları xarici ölkələrdə keçirilən 8 beynəlxalq sərgidə nümayiş olunub. Belə ki, Azərbaycan şirkətləri Berlində "Beynəlxalq Yaşıl Həftə 2019”, "Fruit Logistica 2019”, "Prowein 2019”, Moskvada "Prodexpo 2019”, "Mosbuild 2019”, "Worldfood Moscow 2019”, Birləşmiş Ərəb Əmirliklərində "Gulfood 2019” və Çində təşkil edilmiş "Sial China 2019” beynəlxalq sərgilərində "Made in Azerbaijan” vahid ölkə stendi ilə iştirak ediblər. Azərbaycan məhsulları indiyədək 25 beynəlxalq sərgidə vahid ölkə stendi ilə təqdim edilib. Həyata keçirilən tədbirlərin davamı olaraq Azərbaycan məhsulları bu ilin sonunadək Almaniyada "Anuga 2019” və Çində təşkil olunacaq "Food and Hotel China” beynəlxalq sərgilərində nümayiş olunacaq.
Cari il ərzində 25 beynəlxalq sərgidə “Made in Azerbaijan” brendi adı altında Azərbaycan məhsulları nümayiş olunub.
“Beynəlxalq sərgilərdə Azərbaycan məhsullarının nümayiş olunması ölkəyə daha çox valyuta daxil olmasına səbəb olur”
Beynəlxalq sərgilərdə Azərbaycan məhsullarının sərgilənməsinin əhəmiyyəti barəsində danışan iqtisadçı-ekspert Fikrət Yusifov “Bakı-Xəbər”ə açıqlamasında qeyd etdi ki, qeyri-neft sektorunun inkişafı ilə bağlı çox ciddi qərarlar qəbul olunub. Bununla yanaşı, qeyri-neft sektoru məhsullarının ixracının həcminin genişləndirilməsi istiqamətində tədbirlər həyata keçirilir: “Xarici ölkələrdə təşkil olunan sərgilərdə “Made in Azerbaijan” brendi ilə qeyri-neft sektoru məhsulları nümayiş olunur. Azərbaycan məhsullarının dünya bazarında yer tutması üçün dövlət tərəfindən çox ciddi qərarlar qəbul olunur. Bunun nəticəsidir ki, tək bu il ərzində 25 beynəlxalq sərgidə Azərbaycan məhsulları nümayiş olunub. Beləliklə, əcnəbilər Azərbaycan məhsulları ilə tanış olublar”.
İqtisadçının fikrincə, qarşıdakı dövr ərzində Azərbaycan məhsulları daha çox ölkədə nümayiş olunacaq: “Hazırda qarşıya qoyulan əsas məqsədlərdən biri istehsal olunan məhsulların daha çox ölkədə nümayiş etdirilməsidir. Beynəlxalq sərgilərdə Azərbaycan məhsullarının nümayiş olunması ölkəyə daha çox valyuta daxil olmasına səbəb olur. Bəllidir ki, ölkəyə daha çox valyuta daxil olması üçün müəyyən olunan əsas strategiyalardan biri yerli istehsalın xarici ölkələrdə tanıdılmasıdır”.
Günel CƏLİLOVA
