Azərbaycan MDB-də Rusiyadan sonra investisiya yatırmalı ikinci ən yaxşı ölkə kimi – qiyməti ABŞ nəşri verdi

Məlum olduğu kimi, ABŞ-ın məşhur "Ceoworld" nəşri bu il investisiya yatırmaq üçün ən yaxşı ölkələri açıqlayıb. Reytinq cədvəli hazırlanarkən 67 ölkə korrupsiyanın səviyyəsi, şəxsi, ticarət və pul azadlığı, əmək, investorların qorunması, infrastruktur, vergilər, həyat keyfiyyəti, bürokratiya və texnologiya kimi 11 fərqli kateqoriyada qiymətləndirilib.

Siyahıya liderliyi Malayziya, Polşa və Filippin edir. Dünyanın ən böyük iqtisadiyyatlarına malik ölkələr: ABŞ, Çin və Yaponiya isə siyahıda müvafiq olaraq 18-ci, 24-cü və 32-ci yerlərdə qərarlaşıblar.

Azərbaycan isə 43-cü yeri tutub və Rusiya istisna olmaqla, postsovet məkanında bütün ölkələri qabaqlayıb.

Qeyd edək ki, Azərbaycanın investisiya yatırmaq üçün sərfəli ölkə olması barəsində dəfələrlə xarici nəşrlərdə, beynəlxalq hesabatlarda məlumatlar yayılıb.

• “…növbəti illərdə daha sürətli iqtisadi artımın əldə edilməsi üçün baza formalaşdırır”

İqtisadçı Vüqar Bayramov bildirdi ki, postsovet məkanında investisiya yatırmaq üzrə Azərbaycanın yaxşı ölkələr siyahısında yer alması gözlənilən idi: “Azərbaycanın investisiya cəlbediciliyinin artmasının əsas səbəbi ölkədə aparılan islahatların dərinləşdirilməsidir. Məlumdur ki, 2015-ci ildən başlayaraq islahatlar aparıldı və görülən işlər beynəlxalq təşkilatlarda, iqtisadi institutlarda Azərbaycanla bağlı müsbət rəylərin çoxalmasına səbəb oldu”.

Həmsöhbətimizin sözlərinə görə, ölkəmizlə bağlı açıqlanan müsbət rəylər beynəlxalq ictimaiyyətin diqqətindən yayınmır və bu, ölkəmizin imicinin yüksəlməsinə xidmət edir: “Artıq beynəlxalq aləmdə ölkəmizdə aparılan islahatların növbəti illərdə davam etdiriləcəyinə və iqtisadi artımın güclənəcəyinə dair inam formalaşıb. Azərbaycan iqtisadiyyatında islahatların dərinləşməsi aydın görünür. Danılmaz faktdır ki, son bir ildə islahatlar keyfiyyətcə yeni mərhələyə qədəm qoyub. Bu, investisiya mühitinin daha da yaxşılaşdırılması, xüsusən də iş adamları üçün yeni imkanların, o cümlədən, güzəştli kreditlərə çıxış imkanlarının artırılması, eyni zamanda, idarəetmə sistemində çevikliyin artırılması ilə bağlı struktur islahatların genişləndirilməsi deməkdir”.

V.Bayramov bildirdi ki, Azərbaycan 2019-cu ildə yüksək iqtisadi artım sürətini yenidən bərpa edib.

Ekspertin fikrincə, müsbət dəyişikliklər ölkəmizə sərmayə qoymaq istəyənlər üçün yaxşı siqnaldır: “2019-cu, 2020-ci və 2021-ci illər üçün beynəlxalq maliyyə qurumlarının proqnozları göstərir ki, Azərbaycan 3 faizə yaxın, hətta bir qədər də çox iqtisadi artıma nail ola biləcək. Bu, iqtisadi artım tempinin yüksəlməsi deməkdir. Son bir ildə aparılan islahatlar növbəti illər Azərbaycan üçün iqtisadi inkişaf baxımından yeni imkanlar yaradır. Artıq Azərbaycan iqtisadi islahatların aparılması baxımından yeni mərhələyə qədəm qoyub. Bu keyfiyyət mərhələsi əvvəlki dövrlərdə formalaşmış infrastrukturun dəyərə çevrilməsi mərhələsidir. Ötən bir ildə aparılan islahatlar növbəti illərdə daha sürətli iqtisadi artımın əldə edilməsi üçün baza formalaşdırır. Belə vəziyyətdə xarici sərmayədarların Azərbaycana investisiya qoyuluşunda marağının artacağı gözlənir. Xüsusən qeyri-neft sektoruna sərmayə qoyuluşunda xarici mənbələrin rolunun yüksəlməsi gözlənə bilər”.

Günel CƏLİLOVA