Azərbaycanda ən çox iqtisadi artım olan şəhər və rayonlar adları açıqlanıb. 2019-cu ilin ilk yarım ilində paytaxt Bakı şəhəri istisna olmaqla, ölkənin digər bölgələrində ümumi iqtisadi artım 6,5% təşkil edib. Amma ayrı-ayrı şəhər və rayonlar üzrə bu göstərici fərqlidir.
FED.az-ın araşdırma apardığı 73 şəhər və rayonda (bunlardan 9-u işğal altında olan rayonlar, 8-i isə Naxçıvan MR-dədir) əksər bölgələrdə iqtisadi artım baş verib. Ən böyük artım İmişlidə qeydə alınıb – 50%-dən çox. Ağstafa, Qazax, Göyçay və Şəmkir də sürətli iqtisadi artım olan ilk 5-likdədir.
Qeyd edək ki, 17 rayonda isə iqtisadi azalma var. Ən böyük azalma Ağcabədidə – 22,2%, Qobustanda 18,9% və Zəngilandadır – 30,5%.
Qeyd edək ki, ötən illə müqayisədə cari il ərzində iqtisadi artımın və tənəzzülün qeydə alındığı rayonlar fərqlidir.
“İnvestisiyaların cəlb olunması yeni yaradılan iş yerlərinin sayının artmasına səbəb olub”
Məsələ ilə bağlı fikir bildirən iqtisadçı-ekspert Vüqar Bayramov “Bakı-Xəbər”ə açıqlamasında qeyd etdi ki, iqtisadi artım və azalma bölgələrə cəlb olunan investisiyaların həcmi ilə bağlıdır: “Nəzərə almaq lazımdır ki, İmişlidə bir sıra zavod və fabriklər fəaliyyət göstərir. Xüsusən də İmişlidə şəkər zavodunun fəaliyyət göstərməsi adıçəkilən rayonun iqtisadi artımına səbəb olub. İmişlinin məsafə baxımından Bakıdan uzaqda yerləşməsinə baxmayaraq, qeyd olunan rayona yatırılan investisiyaların həcmi digər bölgələrlə müqayisədə yüksəkdir. Bakı hər zaman iqtisadi aktivliyə görə seçilib. Digər rayonların da bu sahədə yüksək nəticə göstərməsi lazım idi. Bakı və İmişlidən sonra iqtisadi aktivlik Ağstafa, Qazax, Göyçay və Şəmkirdə qeydə alınıb. Qeyd olunan rayonlara investisiyaların cəlb olunması iqtisadi dinamikanın inkişaf etməsinə səbəb olub. İnvestisiyaların cəlb olunması yeni yaradılan iş yerlərinin sayının artmasına səbəb olub. Vətəndaşların işlə təmin olunması baxımından ölkənin bürün ərazilərində iqtisadi aktivliyin qeydə alınması üçün şərait yaradılmalıdır. Etiraf etmək lazımdır ki, regionlarda qeyri-neft sektorunun inkişaf etməsi üçün lazımi şərait yaradılır”.
Həmsöhbətimizin sözlərinə görə, iqtisadi azalmanın qeydə alındığı bölgələrin sayı ötən illə müqayisədə azalıb: “Qeyd etdiyim kimi, iqtisadi dinamikanın dəyişməsində səbəb ölkənin hər bir ərazisinə yatırılan investisiyaların həcmi ilə bağlıdır. Aidiyyəti qurumlar iqtisadi tənəzzülün müəyyən olunduğu bölgələrə daha çox diqqət ayırmalıdırlar ki, investorlar həmin əraziyə investisiya yatırmaqda maraqlı olsunlar”.
Günel CƏLİLOVA
