Rusiya Prezidenti Vladimir Putin 1 yanvar 2020-ci ildən şərab üçün aksiz vergilərinin artırılması haqqında qanunu imzalayıb. Aksiz vergisinin həcmi 2020-ci ildən hər litrə 31 rubl, 2021-ci ildən 32 rubl, 2022-ci ildən 33 rubl olacaq. 2020-ci ildən etibaran şampanın hər litri üçün 40 rubl, 2021-ci ildə 41 rubl, 2022-ci ildə isə 43 rubl səviyyəsində olacaq.
Qanun bundan əvvəl vergiyə cəlb edilmyən şərab materiallarına da aid olacaq. 2020-ci ildə buna görə hər litr üçün 31 rubl, 2021-ci ildə 32 rubl və 2022-ci ildə 33 rubl miqdarında vergi tutulacaq. Bir sözlə, aksiz vergisi şərab, şampan, içki şərabı və alkoqol istehsalı üçün istifadə olunan üzümlərə də şamil ediləcək. 2020-ci ildən başlayaraq hər il 1 rubl artacaq.
Rusiya mətbuatı yazır ki, qanun yerli istehsalçılara dəstək məqsədi daşıyır. Bununla belə, yerli materialların çatışmazlığı səbəbindən yeni qaydalar pərakəndə şərab qiymətinin artmasına səbəb ola bilər. Mütəxəssislərin fikrincə, həm Rusiya istehsalı olan, həm də idxal olunan şərabların qiymət artımı beş faizdən on faizə qədər ola bilər.
O da məlumdur ki, son illər Azərbaycanın şərab ixracı artır. Azərbaycanda istehsal olunan şərab məhsulları bir sıra ölkələrə ixrac edilir. Azərbaycanın şərab məhsulları ixrac etdiyi ölkələrdən biri də Rusiyadır. Maraqlıdır, Rusiyanın aksiz vergilərini artırması Azərbaycanın şərab ixracına necə təsir edə bilər?
“Bizim şirkətlər Ukrayna və digər Şərqi Avropa ölkələrinə də şərab ixrac edirlər”
Məsələyə münasibət bildirən kənd təsərrüfatı üzrə ekspert Nicat Nəsirlinin sözlərinə görə, Rusiyanın məlum qərarı Azərbaycanın şərab ixracına o qədər də təsir etməyəcək: “Rusiya şərab ixracında ənənəvi bazar idi. Ancaq Azərbaycan hazırda Belarusa daha çox şərab ixrac edir. Hətta bu ildən Çinə və digər ölkələrə şərab ixracı başlayıb. Bizim şərabın əsas istiqaməti Avropa bazarlarıdır. Hesab edirəm ki, Rusiyanın bu qərarı davamlı olmayacaq. Düzdür, Rusiya bunu daha çox daxili istehsalı qorumaq adıyla edir. Ancaq Rusiyada, ümumilikdə, şərab və şərab məhsullarına tələbat böyükdür. Əvvəllər də Rusiya belə addımlar atıb, amma sonra bu, müvəqqəti xarakterli olub. Adətən qərarlar qəbul edilərkən müəyyən risqləri nəzərə almaqdan ötrü bu, uzunmüddətli olur. Ancaq bu heç də hər zaman belə olmur. O baxımdan güman edilir ki, Rusiyanın bu qərarı heç də, deyildiyi kimi, uzunmüddətli olmayacaq. Bizim şirkətlər Rusiya ilə yanaşı, Ukrayna və digər Şərqi Avropa ölkələrinə də şərab ixrac edirlər. O baxımdan, Rusiyanın bu qərarı, ümumilikdə, Azərbaycanın şərab ixracına o qədər də təsir etməyəcək”.
Vidadi ORDAHALLI
