Azərbaycan Mərkəzi Bankı (AMB) ölkədə olan kommersiya banklarına saxta əskinaslarla bağlı xəbərdarlıq edib. Qeyd edək ki, məktub dövriyyədə saxta pul əskinasların olması ilə bağlı AMB-yə daxil olan şikayətlər əsasında yazılıb.
Məktubda qeyd olunur ki, Mərkəzi Bank bununla bağlı monitorinqlər aparıb və həmin əskinasların kommersiya banklarına məxsus ATM-lərdən çıxdığı aydınlaşıb. Həmçinin, bankların bu məsələdə diqqətli olması, yararlı olmayan əskinasları ATM-lərə daxil etməmək tapşırılır. Kommersiya banklarına göndərilən məktubda qeyd olunur ki, banklar yararlı olmayan əskinasları aparıb Mərkəzi Banka təhvil versinlər. Məlumat üçün bildirək ki, bu məktub ölkədəki bütün kommersiya banklarına ünvanlanıb. Xatırladaq ki, Azərbaycan manatlarının mühafizəsi sistemi dörd mərhələdən ibarətdir.
Mərkəzi Bankın saxta əskinaslarla bağlı banklara müraciət etməsi əhalini təşvişə salıb.
“Son zamanlar Mərkəzi Bankın nağd pul dövriyyəsində saxta əskinaslar artdığı üçün…”
İqtisadçı-ekspert Natiq Cəfərli “Bakı-Xəbər”ə açıqlamasında qeyd etdi ki, Mərkəzi Bankın nağd pul dövriyyəsinə nəzarət və ehtiyatlarının yığılması ilə bağlı səlahiyyətləri var. Dövriyyədə olan nağd vəsaitin bir qismi öncə Mərkəzi Bankın sərəncamına, sonra isə digər banklara keçir: “Ehtimal olunur ki, son zamanlar Mərkəzi Bankın nağd pul dövriyyəsində saxta əskinaslar artdığı üçün kommersiya banklarına müraciət edib. Bu hal müşahidə olunduqdan sonra kommersiya banklarına ehtiyatlı olması üçün məktublar göndərib. Məlumat üçün bildirim ki, böyük ticarət dövriyyələri gün ərzində topladıqları vəsaiti çox zaman banklara verir. Banklar diqqətsizlik edərək saxta əskinası qəbul edirlər. Belə olan halda, həmin saxta əskinaslar banklar vasitəsilə hansısa yatırıma yönəldilir. Müəyyən müddət keçəndən sonra saxta əskinaslar açkar olunur”.
Həmsöhbətimizin sözlərinə görə, saxta əskinaslar böyük mağazalar vasitəsilə kommersiya banklarına keçir. Nəzərə almaq lazımdır ki, kiçikhəcmli banklar alış-veriş zamanı əskinasların həqiqi olub-olmamasına diqqət yetirirlər. Ancaq böyük ticarət mərkəzləri diqqətsizlik edərək saxta əskinasları qəbul edirlər. Daha sonra həmin əskinas kommersiya banklarına yönləndirilir.
Günel CƏLİLOVA
