Mərkəzi Bankın məlumatına görə, avqustun 1-nə əhalinin banklardakı əmanətlərinin milli valyuta ekvivalentində məbləği əvvəlki ilin eyni dövrü ilə müqayisədə 6,6 faiz artaraq 8 milyard 580 milyon manat təşkil edib. Dövlət Statistika Komitəsinin yaydığı məlumatda qeyd olunur ki, əmanətlərin 56,4 faizi xarici, 43,6 faizi isə milli valyutada qoyulub.
Qeyd edək ki, milli valyutada olan əmanətlər ötən ilin müvafiq dövrünə nisbətən 23,4 faiz artıb, xarici valyutada əmanətlər isə 3,6 faiz azalıb.
Maraqlıdır, əhalinin banklardakı əmanətlərinin milli valyutada dinamik artımı nə ilə bağlıdır?
Fuad İbrahimli: “Milli valyuta ilə yerləşdirilən əmanətlərin faiz dərəcəsinin yüksək olması əmanətçilər üçün daha cəlbedici görünür”
İqtisadçı-ekspert Fuad İbrahimli bizimlə söhbətində bildirdi ki, milli valyuta ilə əmanətlərin həcminin artması gözləniləndir: “Məlumdur ki, milli valyutada olub qorunan əmanətlər üçün faiz dərəcəsi 15, xarici valyutada yerləşdirilən depozitlər üçün 3 faiz müəyyən olunub. Bu səbəbdən də manatla yerləşdirilən əmanətlər əmanətçilər üçün daha cəlbedici görünür”.
Həmsöhbətimiz onu da vurğuladı ki, manatın mövqeyi devalvasiyadan sonra möhkəmlənməyə doğru gedir. Sırf milli valyutada olan qoyuluşlara həm tarif dərəcələrinin yüksək olması, həm də həmin vəsaitlərin Əmanətlərin Sığortalanması Fondu tərəfindən qorunması amili milli valyuta ilə yerləşdirilən əmanətlərin həcminin artmasına təsir göstərib. Xarici valyuta ilə qoyulan vəsaitin isə sığortalanan faiz dərəcəsi aşağıdır. Belədə xarici valyuta qoyuluşuna görə verilən faiz dərəcəsi də azdır. Nəticədə xarici valyuta ilə əmanət qoyuluşu risqləri böyükdür. Ona görə də əhali risqi az olan qoyuluşlara pul qoymağa üstünlük verir. Bu kimi səbəblərdən milli valyuta ilə qoyuluşun həcmi və faizi artıb.
Ekspertin sözlərinə görə, manatın məzənnəsinin sabit qalması milli valyutaya inamın artmasına səbəb olur.
Günel CƏLİLOVA
