Prezident İlham Əliyevin "Minimum aylıq əməkhaqqının artırılması haqqında" 18 iyun 2019-cu il tarixli Sərəncamına əsasən, Azərbaycanda minimum əməkhaqqının məbləği 2019-cu il sentyabrın 1-dən 40 faizədək artırılaraq 180 manatdan 250 manata çatdırılacaq. Minimum əməkhaqqının artımı birbaşa olaraq 950 minədək vətəndaşı əhatə edəcək.
Sərəncamla minimum əməkhaqqının məbləğinin 250 manata çatdırılması dövlət büdcəsindən maliyyələşdirilən sahələrdə Vahid Tarif Cədvəli ilə müəyyən edilmiş aylıq tarif (vəzifə) maaşları üzrə orta əməkhaqqının da orta hesabla 40 faiz artmaqla 265 manatdan 367 manata çatmasına imkan verir.
Onu da qeyd edək ki, son 7 ayda ölkədə minimum əməkhaqqı 2 dəfə artırılıb. Belə ki, bu il Azərbaycanda minimum əməkhaqqının məbləğinin artımını ehtiva edən sərəncama əsasən, 2019-cu il martın 1-dən 50 manat (38,4%) artırılaraq 130 manatdan 180 manata çatdırılıb. Sonuncu 40 faizlik artım isə bu il minimum əməkhaqqında 2 dəfəyə yaxın artımın edildiyini ortaya qoyur ki, bu da indiyə qədər bir ilkdir. Bir ildə minimum əməkhaqqının iki dəfə artımı əhalinin sosial vəziyyətinə müsbət təsir göstərəcək.
Maraqlıdır, bəs ekspertlər bunu necə dəyərləndirirlər? Ötən 7 ayda minimum əməkhaqqının 2 dəfə artması sosial baxımdan nə deməkdir? Bu, insanların aylıq gəlirlərinə necə təsir göstərəcək?
Rəsul Cahangirli: “Artımlar sayəsində vətəndaşların alıcılıq qabiliyyəti yüksələcək”
Məsələyə münasibət bildirən ekspert Rəsul Cahangirlinin sözlərinə görə, 7 ay ərzində minimum əməkhaqqının 2 dəfə artması sosial-iqtisadi baxımdan çox böyük əhəmiyyət kəsb edir: “Bunun başlıca əhəmiyyəti ondan ibarətdir ki, burada 950 minə yaxın ölkə vətəndaşının əməkhaqqının artmasından söhbət gedir. Nəticədə artımlar yüz minlərlə vətəndaşın yaşayışına müsbət təsir göstərəcək. Artımlar, paralel olaraq, ölkə iqtisadiyyatının dinamikliyinə müsbət təsir edəcək. Çünki bunun nəticəsində iqtisadi sferaya böyük həcmdə vəsait daxil olacaq. Bu da digər sahələrdə iqtisadi fəallığı daha da artıracaq. Necə? Bunun sayəsində bank, xidmət sektorunda, istehsal və digər sahələrdə iqtisadi fəallıq artacaq. Bu da sözügedən sahələrdə inkişafa gətirib çıxaracaq. Ən başlıcası, artımlar sayəsində vətəndaşların alıcılıq qabiliyyəti yüksələcək. İstehsal, tələbat da paralel olaraq artacaq ki, bütün bunlar bir-birilə sıx bağlıdır. Nəticədə ölkədə kiçik və orta sahibkarlıq inkişaf edəcək. Yəni bununla bağlı verilən qərarın çoxşaxəli sosial-iqtisadi əhəmiyyəti var. Görünən odur ki, dövlət büdcəsinin gəlirləri artır və bunun sayəsində vətəndaşların əməkhaqqı, sosial müavinətlər, pensiyalar yüksəlir. Bütün bu sərəncamların xərcləri dövlət büdcəsi hesabına həyata keçirilir. Deməli, dövlət büdcəsinin gəlir mənbələri proqnozlaşdırılan istiqamət üzrə inkişaf edir. Dövlət büdcəsi sahibkarlıq, istehsal, vergi və bu kimi sahələrin dinamik inkişafı hesabına özünü qoruyur və get-gedə daha da inkişaf edir. Nəticədə əməkhaqqı və pensiyaları artırmaq üçün imkanlar genişlənir”.
Vidadi ORDAHALLI
