Əhali artımına xidmət edən struktur layihələr – xaricilər daha bir Azərbaycan nümunəsi barədə eşitdilər
Azərbaycanda əhalinin sayının artması ilə əlaqədar müvafiq infrastruktur layihələrinin həyata keçirilməsinə böyük önəm verilir. Bu fikirləri Prezident İlham Əliyev Beynəlxalq Memarlar İttifaqının prezidenti Tomas Vonyerın başçılıq etdiyi nümayəndə heyətini qəbul edərkən səsləndirib.
Dövlət başçısı “Tarixi şəhərlərdə kütləvi turizm” Beynəlxalq Memarlıq Forumunun Bakıda keçirilməsindən məmnunluğunu ifadə edərək, bu tədbirin beynəlxalq əməkdaşlıq baxımından önəmini vurğulayıb. Bakının qədim tarixi ənənələrə malik olduğunu deyən ölkə başçısı bununla bərabər paytaxtımızın sürətlə inkişaf etdiyini və müasir infrastrukturun yaradıldığını qeyd edib. O hazırda ölkəmizin xarici turistlər üçün cəlbedici məkana çevrildiyini qeyd edərək qonaqların sayının durmadan artdığını bildirib.
Beynəlxalq Memarlar İttifaqının prezidenti T.Vonyer Bakıya gələn hər bir qonaqda buradakı inkişaf proseslərinin, tarixi və müasir tikililərin dərin təəssürat hissi doğurduğunu qeyd edib. O, Bakının beynəlxalq tədbirlərin keçirildiyi məkana çevrilməsinin və infrastruktura qoyulan investisiyaların paytaxtımızın inkişafına böyük töhfə verdiyini vurğulayıb.
Maraqlıdır, əhalinin sayının artması ilə əlaqədar müvafiq infrastruktur layihələrinin həyata keçirilməsi deyilərkən, söhbət bu sahədə hansı layihələrdən gedir? Ekspertlər bunu necə dəyərləndirirlər?
- Tahir Mirkişili: “Bununla bağlı işlər planlı şəkildə həyata keçirildiyi üçün, hansısa problem yaşanmır”
Sözügedən məsələyə aydınlıq gətirən millət vəkili Tahir Mirkişili bununla bağlı bir sıra məqamlara toxundu: “Burada söhbət əhaliyə göstərilən xidmət sahəsində bir sıra kompleks işlərin görülməsindən gedir. Müvafiq yeni infrastruktur layihələri həyata keçirilir. Söhbət ondan gedir ki, əhalinin sayı artdıqca, su xətləri, elektrikləşdirmə genişləndirilir, yeni-yeni yaşayış kompleksləri salınır. Hansı ki, həmin yaşayış kompleksləri salınarkən bütün məqamlar nəzərə alınır. Azərbaycanda bu yöndə görülən işlər kompleks şəkildə həyata keçirildiyi üçün, bu istiqamətdə aparılan bütün işlər bir-birini tamamlayır. Yaradılan bütün infrastruktur və şəhər idarəetməsi insanların sayına görə hesablanır. İnsanların sayı artdıqca, infrastruktur daha da inkişaf edir. Yeni-yeni yollar, körpülər, yeraltı və yerüstü keçidlər inşa edilir. Yeni qəsəbələr salınarkən orada lazım olan bütün zəruri infrastruktur yaradılır. Digər tərəfdən, ötən illər ərzində 3500 məktəb yenidən inşa edilib və yaxud da əsaslı təmir edilib. Həmçinin, mövud məktəblərin və səhiyyə xidmətlərinin potensialı artırılır. Çoxsaylı park və yollar salınıb. Bütün bunlar əhalinin artan sayı ilə düz mütənasiblik təşkil edir. Çünki bununla bağlı işlər planlı şəkildə həyata keçirildiyi üçün, hansısa problem yaşanmır”.
Vidadi ORDAHALLI
