19/09/2019 00:35
728 x 90

Turist kart əlində POS-terminal axtarır - 13 min POS-terminal işləmir…

“Ticarət və xidmət obyektlərində POS-terminalların azlığı və ya işləməməsi vətəndaşlarımızın da vaxt itkisinə səbəb olur”

img

Mağazalarda POS-terminalların olmaması, yaxud işlək vəziyyətdə olmaması ilə bağlı mediada məlumatlar yayılır. Hətta vergilər nazirinin müavini Sahib Ələkbərov da ötən həftə jurnalistlərə açıqlamasında bu problemi dilə gətirib. O qeyd edib ki, Azərbaycanda fəaliyyət göstərən POS-terminalların sayı azalaraq, 80 mindən 67 minə düşüb.

Nazir müavini bildirib ki, ölkəmizə gələn turistlərin sayı artır. Ancaq onlar POS-terminalları görməyəndə pul xərcləyə bilmirlər. Biz artıq beynəlxalq tədbirlər keçirən ölkəyik. Nə üçün bu problemlər olmalıdır? Bu çatışmazlığı qısa müddətdə həll etməliyik.

Danılmaz faktdır ki, son illər istirahət üçün ölkəmizi seçən turistlərin sayı günü-gündən artır. Təbii ki, turistlər istirahət etmək üçün istər otellərdə, istirahət mərkəzlərində və ya dükanlarda pul xərcləmək məqsədilə kartdan istifadə edirlər. Ancaq bəzi dükan və ya istirahət mərkəzlərində POS-terminalların işlək vəziyyətdə olmaması turistlərin pul xərcləməsinə əngəl olur.

  • Fikrət Yusifov: “Lökbatan ərazisində yerləşən minlərlə ticarət obyektində ticarətlə məşğul olan insanların böyük əksəriyyətinin POS-terminal haqqında təsəvvürü belə yoxdur”

Məsələ ilə bağlı fikir bildirən iqtisadçı-ekspert Fikrət Yusifov “Bakı-Xəbər”ə açıqlamasında qeyd etdi ki, nağdsız hesablaşmalar haqqında 2016-ci ilin sonlarında qəbul edilmiş qanunun icrası aidiyyəti qurumlardan bu sahədə daha çevik addımlar atmağı tələb edir: “Bu gün ölkənin ticarət və xidmət obyektlərində POS-terminalların tətbiqi dairəsi o qədər də geniş deyil. Bir çox ticarət obyektində, məsələn, Lökbatan ərazisində yerləşən minlərlə ticarət obyektində ticarətlə məşğul olan insanların böyük əksəriyyətinin POS-terminal haqqında təsəvvürü belə yoxdur. Belə nəhəng bazarlara xaricdən, xüsusilə də vaxtilə bir məkanda olduğumuz ölkələrdən çoxlu alıcı gəlir. POS-terminalların olmaması belə obyektlərdə ticarət dövriyyəsinin real həcmini müəyyənləşdirməkdə də çətinliklər yaradır və deməli, vergidən yayınma hallarına yaxşı zəmin yaranır. Bu sahədə xidmət obyektlərində, ictimai iaşə müəssisələrində nağdsız hesablaşmaların aparıla bilməməsi ilk növbədə xarici vətəndaşlar üçün problem yaradır. Öz ölkələrində əksər ödənişləri nağsız qaydada həyata keçirən insanlar bura turist kimi və ya bir başqa qisimdə gələndə istədikləri əməliyyatları nağsız qaydada həyata keçirə bilməməkdən rahatsız olurlar. Onlar hər hansı bir əməliyyatı aparmaq üçün əlavə vaxt itirmək məcburiyyətində qalırlar. Bu baxımdan, ölkədə rəqəmsallaşma proseslərinin sürətlənməsinə dair qərarların sürətli icrası mühüm əhəmiyyət kəsb edir. Turizmin inkişaf perspektivləri böyük olan ölkəmizdə turistlər üçün bu sahədə normal şəraitin yaradılması olduqca vacib məsələdir. Bu gün ticarət və xidmət obyektlərində POS-terminalların azlığı və ya işləməməsi vətəndaşlarımızın da vaxt itkisinə səbəb olur. Bu məsələdə dönüş yarada biləcək qətiyyətli addımlar atmağın vaxtı çatıb”.

Günel CƏLİLOVA

Son xəbərlər