Məlum olduğu kimi, problemli kreditlərin həllinə dair Prezident fərmanının icrası başa çatıb. Maliyyə Bazarlarına Nəzarət Palatası tərəfindən həyata keçirilən proses başa çatsa da, bu sahədə vətəndaşların üzləşdikləri problemlər hələ də tam olaraq öz həllini tapmayıb.
Kompensasiya alacaq vətəndaşların əsas probleminin banklarla olduğu məlumdur. Hətta bəzi vətəndaşlar banklar tərəfindən onlara qarşı edilən haqsızlıqlarla bağlı dəfələrlə redaksiyamıza da üz tutublar. Vətəndaşlar şikayət edirlər ki, bəzi banklar tərəfindən onlara ödənilməli olan və qanunla müəyyən edilmiş məbləği tam şəkildə ödəməyiblər. Hər bir bank bunun səbəbini müxtəlif cür izah edir. Məlumdur ki, problemli kreditlərin ödənilməsi ilə bağlı vətəndaşlara ən çox narahatlığı “Unibank” yaradıb. Məlumdur ki, sözügedən bank qanunsuz olaraq müştəriləri incidib və onlara təyin olunan kredit məbləğindən artıq ödəniş tələb edib. Vətəndaşlar bildirirlər ki, onlar kredit ödənişini tam şəkildə bitirsələr də, bank israrla əlavə aylıq ödəniş tələb edirdi. Qeyd edirdi ki, vətəndaş aylıq məbləği ödəməsə, bu vəsait onun kompensasiya məbləğindən çıxılacaq.
Ciddi narazılıqlara, çoxsaylı şikayətə baxmayaraq, banklar elə də etdilər, hesabladıqları artıq məbləği vətəndaşlara ödəniləcək vəsaitdən çıxdılar.
Problemli kreditlərin ödənişləri başa çatsa da, hələ də bankların problem yaşatdığı vətəndaşların şikayətləri araşdırılmayıb. Hətta bununla bağlı vətəndaşlar Maliyyə Bazarlarına Nəzarət Palatasına da müraciət ediblər, lakin hələ də bu məsələnin çözülməsi istiqamətində hər hansı bir addım atılmayıb.
Ekspertlər qeyd edirlər ki, bankların vətəndaşlara qarşı etdikləri qanunsuzluqlarla bağlı məsələnin araşdırılması olduqca vacibdir. Mütəxəssislər hesab edirlər ki, banklarda bu kimi hallarla üzləşən vətəndaşlar yenidən Maliyyə Bazarlarına Nəzarət Palatasının yanında formalaşdırılan Apelyasiya Komissiyasına müraciət edə bilərlər, eyni zamanda, onlar digər məhkəmə instansiyalarına üz tutmalıdırlar.
Qeyd edilir ki, qaydalara əsasən, apelyasiya müraciətlərinə 30 iş günü ərzində cavab verilməlidir. Belə ki, müraciətdən sonra iş günlərinin sayını hesablamaqla komissiyanın nə zaman müraciəti cavablandıracağını müəyyənləşdirmək olar.
Ruslan Atakişiyev: “... haqlı tərəfi ortaya çıxarmalıdır”
İqtisadçı-ekspert Ruslan Atakişiyev “Bakı-Xəbər”ə bildirdi ki, vətəndaşlara problem yaradan banklarla bağlı şikayətlərin tam olaraq araşdırılması tələb olunur. “Qeyd edim ki, ümumiyyətlə, bir neçə il əvvəl Mərkəzi Bank tərəfindən kommersiya banklarının göstərdiyi xidmətlə, eyni zamanda, ərizə və şikayətlərə baxılması ilə bağlı bir təlimat hazırlanmışdı. Həmin təlimat qüvvədədir. Banklar gün, həftə ərzində vətəndaşların şikayətləri ilə bağlı hesabatlar verməyə borcludurlar. Vətəndaşlar bankların onlara yaratdıqları problemlərin araşdırılması üçün Mərkəzi Banka və Maliyyə Bazarlarına Nəzarət Palatasına müraciət etməlidirlər. O ki, qaldı problemli kreditlərin ödənilməsi məsələsində narazı vətəndaşların banklarda müəyyən problemlərlə üzləşməsinə, bu məsələ ətraflı araşdırılmalıdır. Bəzən olur ki, banklar müştərinin qaldırdığı problemi əsassız sayır, bu halda problem məhkəmə yolu ilə öz həllini tapmalıdır. Müraciətlərin hər birinə diqqətlə yanaşılmalı və hansı tərəfin haqlı olduğunu ortaya çıxarmaq üçün araşdırmalar aparılmalıdır. Hesab edirəm ki, palata bu barədə vətəndaş şikayətlərini dərindən araşdırmalı, haqlı tərəfi ortaya çıxarmalıdır.
Bilirsiniz ki, bu kimi məsələlərin ən optimal həlli yolu maliyyə məsələləri ilə bağlı problemlə üzləşən vətəndaşın apelyasiya şikayəti verməsidir”.
İradə SARIYEVA
