Rəşad Həsənov: “Asiya İnkişaf Bankı və digər oxşar banklar Azərbaycanda iri layihələrin həyata keçirilməsində maraqlıdırlar”
Məlum olduğu kimi, iyunun 1-də Asiya İnkişaf Bankının təşəbbüsü ilə Azərbaycan Respublikasının Prezidenti İlham Əliyevlə bankın rəhbərliyi arasında videokonfrans keçirilib.
Videokonfrans zamanı dövlət başçısı İlham Əliyev qeyd edib ki, bildiyiniz kimi, biz bir sıra mühüm layihələr üzərində işləyirik: “Asiya İnkişaf Bankının Azərbaycana ayırdığı kredit və zəmanətlərin ümumi məbləği 3 milyard ABŞ dollarını ötür. Bu vəsait bizə infrastruktura investisiya yatırmağa kömək edib. Biz elektrik enerjisinin istehsalı, dəmir yolu tikintisi, yol tikintisi, su və kanalizasiya ilə bağlı çoxsaylı infrastruktur layihələrini dəstəklədiyinə görə Asiya İnkişaf Bankına çox minnətdarıq. Əlbəttə ki, biz “Cənub Qaz Dəhlizi” layihəsinin həyata keçirilməsinə sadiqliyinizə və dəstəyinizə, maliyyə dəstəyinizə görə sizə çox minnətdarıq. Mən sizə deyə bilərəm ki, Asiya İnkişaf Bankı bu layihəyə kredit verən ilk böyük beynəlxalq banklar arasında birinci olub. Sizin çox mühüm və vaxtında göstərdiyiniz dəstək bizə, həmçinin, çox geniş kreditorlar qrupu yaratmağa kömək etdi. Bildiyiniz kimi, “Cənub Qaz Dəhlizi” tamamlanmağa çox yaxındır, 3 layihə artıq tamamlanıb. Dördüncüsü - Trans-Adriatik boru kəməri 95 faizdən çox tamamlanıb. Bu, həqiqətən də əməkdaşlığın çox yaxşı əlamətidir”.
Qeyd edək ki, tək Asiya İnkişaf Bankı deyil, bir sıra beynəlxalq banklar, maliyyə qurumları Azərbaycanla əməkdaşlıq etməkdə maraqlıdırlar. Əksər beynəlxalq bank Azərbaycana müəyyən məbləğdə kredit ayırıb.
Onu da vurğulayaq ki, dünyanın nüfuzlu banklarının Azərbaycanla əməkdaşlığı və ayırdıqları kreditlər investisiya yatırımı üçün münbit şərait yaradır.
- “…həm qlobal iqtisadiyyata inteqrasiya, həm də maliyyə təminatı baxımından çox yaxşıdır"
İqtisadçı-ekspert Rəşad Həsənov bildirdi ki, Asiya İnkişaf Bankı və digər oxşar banklar Azərbaycanda iri layihələrin həyata keçirilməsində maraqlıdırlar: "Asiya İnkişaf Bankı bu günə qədər Azərbaycana 4 milyarda yaxın, müxtəlif layihələrin maliyyələşdirilməsi məqsədilə vəsait ayırıb. Bu vəsaitlərin 4-5 faizi qrant xarakterli olub. Bu vəsaitlər də texniki məqsədlər üçün müxtəlif proqramların, idarəetmənin təkmilləşdirilməsinə hədəflənib. Beynəlxalq maliyyə institutları Azərbaycanın neft strategiyasının formalaşmasında vaxtilə rol oynayıblar, əsas tərəfdaşlardan olublar. Ölkə daxilində infrastrukturun təkmilləşdirilməsində çox ciddi rol oynayıblar. Azərbaycanda banklar vasitəsilə bu işlər görülə bildiyindən, bu bankların da əlavə dəstəyi müsbətdir. Bir sıra hallarda beynəlxalq institutlar vəsaitlərini izləyirlər. Layihələrə ayrıldıqdan sonra xərclərə ciddi nəzarət mexanizmi var. Ölkədə maliyyə axınlarına nəzarət təcrübəsinin inkişaf etməsinə gətirib çıxarıb. Mən beynəlxalq institutlarla əməkdaşlığı vacib hesab edirəm. Həm qlobal iqtisadiyyata inteqrasiya, həm də maliyyə təminatı baxımından çox yaxşıdır".
Ekspert qeyd etdi ki, fors-major hallar hər zaman yarana bilər, ona görə beynəlxalq institutlarla əməkdaşlıq Azərbaycan üçün vacibdir: “Bu institutlar, həmçinin, qeyri-neft sektorunun gələcək üçün inkişafına dəstək verəcək. Bildiyimiz kimi, bir neçə ildir neft qiymətləri sabit qalmır. Bu il də qiymətlərdə kəskin enmələr müşahidə olundu. Əməkdaşlıq bu kimi problemlərə vaxtında müdaxilə etməklə, yarana biləcək hadisələrin qarşısını almış olur".
Günel CƏLİLOVA
