Prezident İlham Əliyev Asiya İnkişaf Bankının rəhbərliyilə keçirilən görüşdə bildirdi ki, bizim xərclərimiz daim mənfəətimizdən aşağı olub. Ehtiyatları qorumaq və artırmaq bizim başlıca iqtisadi hədəfimizdir.
Ölkə başçısının sözlərinə görə, biz addımlarımızı, büdcəmizi yeni reallıqlara uyğunlaşdırmağa nail olmuşuq: “Hazırda bir çox ölkələr, əfsuslar olsun, resessiyadadır. Beş ayın nəticələri hələ ki, bizə məlum deyil, ola bilsin, 1 həftə ərzində məlum olacaq. Lakin düşünürəm ki, biz bu vəziyyətin öhdəsindən gələ biləcəyik. Sizin doğru olaraq qeyd etdiyiniz kimi, neftin qiymətinin kəskin şəkildə aşağı düşməsi bizim üçün əlbəttə ki, çağırışdır. Lakin biz addımlarımızı, büdcəmizi yeni reallıqlara uyğunlaşdırmağa nail olmuşuq və reallıqlar necə olsa, biz bunu nəzərə almalıyıq. Biz sosial layihələrin heç birini ixtisara salmamışıq, onların hamısı büdcəmizdə qalır. Lakin o layihələr ki, bir neçə il gözləyə bilər, onlar, əlbəttə, ola bilsin bir qədər təxirə salınsın. Düşünürəm ki, ümumilikdə, Azərbaycan yaxşı nəticələr nümayiş etdirən ölkələr arasında olacaq”.
Prezident qeyd edib ki, 150-dən çox ölkə maliyyə dəstəyi üçün artıq beynəlxalq maliyyə institutlarına müraciət edib: “Azərbaycan onların arasında deyil. Bilirsiniz ki, biz üzərimizə düşən işi layiqincə yerinə yetiririk və bizim xərclərimiz daim mənfəətimizdən aşağı olub. Mən deyərdim ki, ehtiyatları qorumaq və artırmaq bizim başlıca iqtisadi hədəfimiz olub”.
Göründüyü kimi, bir sıra ölkələrdən fərqli olaraq, Azərbaycanda xərclər mənfəətdən aşağıdır. Ehtiyatların qorunmasına xüsusi önəm verilir.
“Ölkə xarici kreditorlardan asılı deyil, koronavirusla əlaqədar borca düşmür”
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı-alim Əli Əlirzayevin sözlərinə görə, Azərbaycan hər zaman bu kimi məsələlərə xüsusi diqqət göstərib: “Azərbaycanda sözügedən məsələdə son dərəcə düşünülmüş siyasət həyata keçirilir. Elə etmək lazımdır ki, təkcə gəlirləri artırmaq yox, həm də xərcləri azaltmaq lazımdır. Ən başlıcası, xərcləri düzgün idarə etmək lazımdır. Çünki iqtisadiyyatda xərc qanunu var. Həmin qanuna görə, məsrəflərə uyğun olaraq maksimum gəlir əldə etmək lazımdır. Azərbaycan iqtisadiyyatında bununla bağlı mühafizəkar siyasət aparılır. Hesab edirəm ki, bu doğru yanaşmadır. Fikrimcə, bu siyasət mərhum prezident Heydər Əliyevdən qalan siyasətdir. Heydər Əliyev prezident olanda çalışırdı ki, ölkənin var-dövləti gələcək nəsillərə qalsın. Görünən odur ki, bu siyasət davam etdirilir. Hesab edirəm ki, iqtisadi yasdıq daha güclü olmalıdır. Azərbaycan xarici kreditorlardan asılı deyil, koronavirusla əlaqədar borca düşmür. Bizim valyuta ehtiyatlarımız olmasaydı, o zaman ölkə üçün çətin olacaqdı. Ona görə də ehtiyatlardan doğru istifadə etmək, xərcləri düzgün idarə etmək ölkə üçün faydalıdır. Biz çalışmalıyıq ki, hər zaman xarici ölkələrdən asılılığımızı azaldaq. Çünki ehtiyatlı iqtisadi siyasətin yeridilməsi ölkənin mənafeyinə uyğundur”.
Vidadi ORDAHALLI
