12/07/2020 04:01
728 x 90

Prezident Azərbaycanın su təminat sistemində 40-50 faiz itkinin qarşısının alınmasına Asiya Bankının imkanlarını da cəlb etdi…

Natiq Cəfərli: “Azərbaycanda suvarma ilə bağlı problemlər var”

img

“Ehtiyatları qorumaq və artırmaq bizim başlıca iqtisadi hədəfimiz olub”. Bunu Prezident İlham Əliyev Asiya İnkişaf Bankının təşəbbüsü ilə bankın prezidenti Masatsuqu Asakava, vitse-prezidenti Şiksin Çen və bankın rəhbərliyinin digər nümayəndələri arasında keçirilən videokonfransda deyib.

Prezident çıxışı zamanı videokonfransda iştirak edənlərdən ölkə ərazisində suvarma ilə bağlı planların nəzərdən keçirilməsinin vacibliyini qeyd edib: “Biz hazırda vəziyyəti qiymətləndiririk və çox böyük su itkiləri ilə üzləşdiyimizi görürük. Bəzi hallarda köhnəlmiş infrastruktura və səmərəli olmayan su idarəetmə sisteminə görə biz suyun 40-50 faizini itiririk. Buna görə də müxtəlif nazirlərin təmsil olunduğu və Baş nazirin müavininin rəhbərlik etdiyi, digər nümayəndələrin iştirak edəcəyi xüsusi hökumət komissiyası yaradılmışdır. Onlar bizim bütöv su potensialımızı qiymətləndirəcək və prioritetləri, hansı işləri görməli və hansı investisiyaları yatırmalı olduğumuzu müəyyən edəcəklər. Buna görə sizdən bu layihəni nəzərdən keçirməyi xahiş etmək istərdim. Ümidvaram ki, bir neçə aydan sonra bu komissiyanın fəaliyyətinin ilk nəticələri bizdə olacaq. Biz suvarmanın inkişafı üzrə dövlət proqramının qəbul edilməsi və suvarmanın daha da səmərəli olması ilə nəticələnəcək addımları müəyyən etməyə başlaya bilərik. Buna görə də texniki dəstək və maliyyə dəstəyi baxımından biz bu məsələ üzərində sizinlə çalışmağa məmnun olarıq”.

Maraqlıdır, bu sahədə əməkdaşlıq ölkəmizə nə verər?

  • “Asiya İnkişaf Bankı ilə suvarma sahəsi ilə bağlı razılıq əldə olunarsa, bu, aqrar sektorun inkişaf etməsinə səbəb olar”

İqtisadçı-ekspert Natiq Cəfərli qeyd etdi ki, Azərbaycanda suvarma ilə bağlı problemlər var. Əsasən də şoranlaşmış torpaqların sahəsi üstünlük təşkil edir: “Şoranlaşmış torpaqların yuyulması və kənd təsərrüfatında məhsuldarlığın inkişaf etməsi üçün suvarma sisteminin təkmilləşdirilməsinə, əlavə mənbələrin tapılmasına ehtiyac var. Suvarma ilə bağlı gələcəkdə  Azərbaycanda problem yaşana bilər. Həm aqrar sektor, həm də əhalinin su ehtiyacını nəzərə alsaq, bu sahədə problem yaşana bilər. Nəzərə almaq lazımdır ki, Asiya İnkişaf Bankı bu kimi layihələrə daim dəstək verir. Adıçəkilən bank dünyanın bir sıra ölkələrində bu tip layihələr həyata keçirir. Həm layihələndirmə, həm maliyyələşmə baxımından kifayət qədər böyük təcrübəsi var. Suvarma ilə bağlı razılıq əldə olunarsa, bu, aqrar sektorun inkişaf etməsinə səbəb olar”.

Günel CƏLİLOVA

Son xəbərlər