Dünya resessiyada, Azərbaycan qeyri-neft sənayesində 16 faiz artım – Asiya Bankına Azərbaycanın sənayeləşmə kursu belə təqdim olundu...
“İlk dörd ay ərzində ümumdaxili məhsul artımının çox az – 0,2 faiz olmasına baxmayaraq, həmin dörd ay ərzində bizdə qeyri-neft sənayesində 16 faizdən çox artım müşahidə olunmuşdur”. Bunu Prezident İlham Əliyevlə Asiya İnkişaf Bankının təşəbbüsü ilə bankın prezidenti Masatsuqu Asakava, vitse-prezidenti Şiksin Çen və bankın rəhbərliyinin digər nümayəndələri arasında keçirilən videokonfransda deyib.
Ölkə başçısının sözlərinə görə, bizim borcgötürmə ilə bağlı strategiyamız çox mühafizəkardır və bu bizə öz milli valyutamızda borc götürməyə imkan verəcək: “İndi, fəal sənaye inkişafını yaşadığımız bir dönəmdə yaxşı mütəxəssislərin hazırlanması böyük əhəmiyyətə malikdir. Bu ilin bir göstəricisini sizə deyə bilərəm. İlk dörd ay ərzində ümumdaxili məhsul artımının çox az – 0,2 faiz olmasına baxmayaraq, həmin dörd ay ərzində bizdə qeyri-neft sənayesində 16 faizdən çox artım müşahidə olunmuşdur. Bu, həqiqətən, onu göstərir ki, bizim sənayeləşmə, şaxələnmə və sənaye inkişafına təkan verən infrastruktura sərmayə üzrə səylərimiz yaxşı nəticələr verir”.
Prezident onu da qeyd edib ki, qeyri-enerji sektorunun sürətli artımı davam edəcək: “Bunun üçün də bizə bu biznesi apara bilən yaxşı mütəxəssislər lazım olacaqdır. Odur ki, mən peşə təlimi ilə məşğul olmağımızı çox dəstəkləyirəm və həmçinin, kiçik və orta müəssisələrə yerli valyuta ilə dəstəyin göstərilməsi vasitəsilə özəl sektora dəstəyiniz də çox faydalıdır. Bildiyiniz kimi, bizim borcgötürmə ilə bağlı strategiyamız çox mühafizəkardır və bu, bizə öz milli valyutamızda borc götürməyə imkan verəcək”.
Göründüyü kimi, koronavirusla əlaqədar bu ilin 4 ayında ÜDM artımı çox cüzi olsa da, qeyri-neft sənayesində ciddi artım müşahidə edilib. Bu da sözügedən istiqamətdə görülən işlərin müsbət nəticələr verməsindən xəbər verir.
Maraqlıdır, bəs ekspertlər bunu necə dəyərləndirirlər?
- “2016-ci ildə qəbul olunan Strateji Yol xəritələrində göstərilən hədəflərin...”
Məsələyə münasibət bildirən İqtisasdi Resursların Öyrənilməsi Mərkəzinin direktoru Ruslan Atakişiyevin sözlərinə görə, ölkədə qeyri-neft sektorunun inkişafı istiqamətində görülən kompleks işlər öz nəticəsini verir: “Məsələ ondadır ki, son dövrlər qeyri-neft sektorunun inkişafı prioritet bir sahə kimi önə çəkilir. Bunun başlıca səbəblərindən biri ölkə iqtisadiyyatının enerji resurslarından asılılığını minimuma endirməkdir. Çünki neftin qiymətinin tez-tez dəyişməsi ölkə iqtisadiyyatının dayanıqlığına mənfi təsir edir. Ona görə də bunun qarşısının alınması üçün qeyri-neft sektorunun inkişafı bir hədəf kimi qarşıya qoyulub. Son dövrlər hökumətin apardığı işlər əsasən bu sahənin inkişafına yönəlib. Kiçik və orta sahibkarlığın, ümumiyyətlə, özəl sektorun inkişafına dəstək göstərilməsi istiqamətində bir sıra işlər aparılır. Hesab edirəm ki, 2016-ci ildə qəbul olunan Strateji Yol xəritələrində göstərilən hədəflərin ardıcıl şəkildə həyata keçirilməsi artıq yavaş-yavaş öz nəticəsini göstərməkdədir. O cümlədən, rəqəmlərdə də meydana çıxan müsbət dəyişikliklər əvvəllər həyata keçirilən inkişaf strategiyasının əsasında formalaşır. Bunun nəticəsidir ki, bu ilin 4 ayında qeyri-neft sənayesində 16 faizdən çox artım müşahidə olunub. Bu onu göstərir ki, iqtisadiyyatın şaxələndirilməsi uğurla gedir”.
Vidadi ORDAHALLI
