İyunun 1-də Asiya İnkişaf Bankının təşəbbüsü ilə Azərbaycan Respublikasının Prezidenti İlham Əliyevlə bankın prezidenti Masatsuqu Asakava, vitse-prezidenti Şiksin Çen və bankın rəhbərliyinin digər nümayəndələri arasında videokonfrans keçirilib. Konfransda bir sıra məsələlərə toxunulub.
Prezident İlham Əliyev videokonfrans formatında keçirilən görüşdə bildirib ki, qeyri-formal məşğulluqla mübarizə aparılır və ciddi tədbirlər görülür: “Təkcə bu il işçilərlə şirkətlər arasında 100 mindən çox müqavilə imzalanıb. Lakin, bununla belə, biz bu insanların bu problemdən əziyyət çəkdiyini başa düşürük. Bu səbəbdən də 4 ay ərzində iqtisadi artımımız çox az olmuşdur, bununla belə, 0,2 faiz təşkil etmişdir. Mən bilirəm ki, hazırda bir çox ölkələr, əfsuslar olsun, resessiyadadır. Beş ayın nəticələri hələ ki, bizə məlum deyil, ola bilsin, 1 həftə ərzində məlum olacaq. Lakin düşünürəm ki, biz bu vəziyyətin öhdəsindən gələ biləcəyik. Sizin doğru olaraq qeyd etdiyiniz kimi, neftin qiymətinin kəskin şəkildə aşağı düşməsi bizim üçün əlbəttə ki, çağırışdır. Lakin biz addımlarımızı, büdcəmizi yeni reallıqlara uyğunlaşdırmağa nail olmuşuq və reallıqlar necə olsa, biz bunu nəzərə almalıyıq. Biz sosial layihələrin heç birini ixtisara salmamışıq, onların hamısı büdcəmizdə qalır. Lakin o layihələr ki, bir neçə il gözləyə bilər, onlar, əlbəttə, ola bilsin bir qədər təxirə salınsın. Düşünürəm ki, ümumilikdə, Azərbaycan yaxşı nəticələr nümayiş etdirən ölkələr arasında olacaq”.
“...investisiya xərclərinin təxirə salınması ilə büdcənin məsrəflərinə qənaət olunacaq”
Neftin qiymətinin aşağı düşməsinin nə kimi reallıqlara səbəb olunduğunu öyrənmək üçün iqtisadçı-ekspert Pərviz Heydərova müraciət etdik.
P.Heydərov bildirdi ki, yeni reallıqlar deyiləndə cari il üçün büdcə xərclərinə nəzarətin artması nəzərdə tutulur: “Məlumdur ki, bu günlərdə cari ilin dövlət büdcəsinə yenidən baxılacaq. Dövlət büdcəsinə müəyyən dəyişikliklərin olunması gözlənir. Bununla yanaşı, bu il üçün zəruri əhəmiyyət kəsb etməyən investisiya xərcləri təxirə salınacaq. Hansı ki, o layihələrin hazırkı şəraitdə icra olunması elə də əhəmiyyət kəsb etmir. Beləliklə, büdcənin məsrəflərinə bu yolla qənaət olunacaq. Bu kimi hallar real şəraitdə atılan addımların başında gəlir”.
Həmsöhbətimiz onu da əlavə etdi ki, hazırda neftin qiymətində artım müşahidə olunur. Neftin qiymətinin qalxması ilin sonu üçün optimist düşünməyə səbəb olur.
Günel CƏLİLOVA
