“Ölkəmizin rəqəmsallaşdırılması, informasiya texnologiyalarının bütün sahələrdə tətbiq edilməsi bizim prioritet sahəmizdir”. Bunu Prezident İlham Əliyev Azərbaycan Televiziyasına müsahibəsində deyib.
Ölkə başçısının sözlərinə görə, gələcək illərdə Azərbaycan informasiya-kommunikasiya texnologiyaları sahəsində liderlik mövqelərini daha da möhkəmləndirəcək: “İnformasiya-kommunikasiya texnologiyaları sahəsi bir neçə il bundan əvvəl mənim təşəbbüsümlə Azərbaycanda geniş vüsət almağa başlamışdır. Xatırlayıram, biz kosmik sənayenin yaradılması ilə məşğul olmağa başlayanda bəziləri təəccüb edirdi, bəziləri düşünürdü ki, Azərbaycan o qədər də böyük ölkə deyil, - kosmik klub dünya miqyasında çox məhdud bir klubdur, - və Azərbaycan üçün orada özünə yer tapmaq çətin olacaq. Ancaq həyat göstərdi ki, biz düzgün yoldaydıq. Ona görə informasiya-kommunikasiya texnologiyalarının inkişafı ilə bağlı bütün addımlarımız düzgün idi”.
Prezident onu da qeyd edib ki, pandemiya dövründə, özünütəcrid şəraitində informasiya texnologiyaları olmadan iş görmək mümkün deyil: “Misal üçün, mənim görüşlərim, videokonfrans şəklində keçirdiyim Zirvə görüşləri müasir texnologiyalar olmadan mümkün deyil. Ona görə hazırda həm iqtisadi sahədə, həm təhsil, səhiyyə, kənd təsərrüfatı sahələrində və digər sahələrdə, o cümlədən, bizim su resurslarının nəzarəti, su balansının formalaşması və itkilərin azaldılması istiqamətində də məsələ qaldırıldı. Ona görə bu sahə, hər kəs bunu bilməlidir, gələcəyə atılan addımdır”.
Görünən odur ki, ölkənin rəqəmsallaşdırılması əsas zərurətə çevrilib. Maraqlıdır, bu istiqamətdə aparılan siyasət bizə nə verəcək?
“Bu, ölkəmizin dünyada iqtisadi baxımdan rəqabət qabiliyyətinin artmasında mühüm rol oynayacaq”
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, rəqəmsallaşdırma və informasiya texnologiyalarının bütün sahələrdə tətbiqi ölkəmizə bir sıra üstünlüklər vəd edir: “Dünyanın bir sıra ölkələrində həm dövlət, həm də özəl sektor çox geniş şəkildə informasiya və kommunikasiya texnologiyalarının tətbiqindən istifadə edir. Əslində, biz dördüncü sənaye inqilabı dövründə yaşayırıq. Dördüncü sənaye inqilabının bir mahiyyəti də ondan ibarətdir ki, bütün sistemlər elektronlaşdırılır. Yəni bütün sahələrdə informasiya-kommunikasiya texnologiyalarının tətbiqi daha da genişləndirilir. O baxımdan bu sahə çox önəmlidir. Hesab edirəm ki, Azərbaycanda İKT-nin tətbiqinin genişləndirilməsi ölkəmizin dünyada iqtisadi baxımdan rəqabət qabiliyyətinin artmasında mühüm rol oynayacaq. Nəticədə daha çox rəqabətyönlü məhsul dünya bazarına çıxara biləcəyik. Bu da emal sənayesinin və ümumiyyətlə, qeyri-neft sektorunun inkişafına ciddi təkan verəcək”.
Vidadi ORDAHALLI
