05/04/2020 16:37
728 x 90

Prezidentdən sahibkarlara "işçiləri ixtisar etməyin"çağırışı - cavab reaksiyaları necə olmalı idi…

Ruslan Atakişiyev:“Sahibkarlar Prezidentin çağırışına əməl etməli və heç bir halda işçiləri işdən çıxarmamalıdır, əksinə, onların fəaliyyətini təmin etməlidir”

img

Natiq Cəfərli:“Hesab edirəm ki, Prezidentin çağırışı daha çox  böyük holdinqlərə, banklara və digər iri biznes strukturlarına aiddir, bu qurumlar da öz öhtəsinə düşən işi görməlidir”         

Koronavirusla bağlı Azərbaycanda karantin elan edilib və karantin müddətində, bir sıra sahələr istisna olmaqla, başqa istiqamətlərdə özəl və dövlət sektorunda fəaliyyət müvəqqəti olaraq dayandırılıb, yaxud məhdudlaşdırılıb.  Koronavirus təhlükəsilə bağlı fəaliyyəti məhdudlaşdırılan bəzi özəl qurumların, sahibkarların işçiləri ixtisara salmasına dair təhlükəli xəbərlər dolaşır. Azərbaycan dövləti dövlət sektorunda    çalışan və karantin tədbirləri ilə əlaqədar olaraq fəaliyyət göstərməyən işçilərin aylıq maaşını tam ödəyir. Amma bəzi sahibkarlar, ehtiyac olmadığı halda, müvəqqəti yaranan problemə görə ixtisarlar haqqında düşünür. Heç şübhəsiz, dəfələrlə Azərbaycan Prezidenti İlham Əliyev işçiləri ixtisara salmamaları üçün sahibkarla, özəl şirkətlərin rəhbərlərinə çağırışlar edib. Ölkə başçısı bu dəfə də ənənəsinə sadiq qalaraq             sahibkarlara  çağırışlar edib ki, işçiləri ixtisara salmasınlar.  Martın 24-də Mənzil İnşaatı Dövlət Agentliyinin ikinci layihəsi – Hövsan yaşayış kompleksinin açılışında iştirak edən Prezident İlham Əliyev Azərbaycan Televiziyasına müsahibəsində bir daha sahibkarları işçiləri ixtisara salmamağa çağırıb. “…Eyni zamanda, biz artıq çox ciddi çağırışlar etmişik. Fürsətdən istifadə edərək, mən bu çağırışı bu gün bir daha da etmək istəyirəm bütün sahibkarlara ki, onlar işçiləri ixtisar etməsinlər. Çünki indiki şəraitdə bunu etmək bizim həmrəylik təşəbbüsümüzə zidd ola bilər. Ancaq təbii ki, əgər sahibkarın da fəaliyyəti məhdudlaşıbsa, o, itkilərə məruz qalır və burada dövlət öz dəstəyini verməlidir. Dövlət bunu edəcək. Bu xəstəliklə bağlı ən həssas sahibkarlar qruplarına xüsusi maliyyə dəstəyi də göstəriləcək, vergi güzəştləri də ediləcək, digər imtiyazlar da veriləcək. Ancaq bizim əsas tələbimiz və tövsiyəmiz ondan ibarətdir ki, sahibkarlar işçiləri ixtisar etməsinlər. Ona görə bu bir milyard manat məbləğində vəsaitin necə xərclənəcəyi haqda vətəndaşlara müntəzəm olaraq məlumat veriləcək. Çünki burada məşğulluq məsələləri ön plandadır, makroiqtisadi sabitlik təmin edilməlidir”.

İqtisadçılar hesab edir ki, sahibkarlar ölkə başçısının çağırışlarına öz işləri ilə cavab verməlidir.  Onlar hesab edir ki, Prezident İlham Əliyev əslində bu çağırışı etməkdə özəl qurumları, sahibkarları bu ağır vəziyyətdə xalqla həmrəy olmağa, onlara qayğı göstərməyə çağırır. 

Tanınmış iqtisadçı Ruslan Atakişiyev baki-xeber.com-a bildirdi ki, sahibkarlar Prezidentin çağırışına birmənalı olaraq əməl etməlidir. R.Atakişiyev vurğuladı ki, burada sahibkarın üzərinə düşən ən ümdə vəzifə odur ki, qanunla işə götürdüyü  işçini işdən çıxarmasın. “Məsələ ondan ibarətdir ki, vəziyyətlə əlaqədar olaraq bəzi özəl şirkətlərdə problem yaranıb. Hansı şirkətlər ki rəsmi şəkildə işə işçi götürüb və onlara maaş ödəyir, həmin şirkətlər, sahibkarlar vəziyyətdən sui-sitifadə edərək işçiləri ixtisara salmamalıdır. Dövlət onsuz da həmişə sahibkarlara dəstək olur. Dövlət həqiqətən də sahibkarlara ediləcək yeni güzəştlər üzərində işləyir. Onlara vergi və digər güzəştlərlə bağlı işlər gedir. Dövlət öz tenderlərində sahibkarlara daha çox imkan yaratmağa çalışacaq ki, onlar daha çox  iştirak etsinlər. Sahibkarlar indiki vəziyyətdə mövcud işçilərini işdən çıxarmamalıdır, onların əməkhaqlarını müvəqqəti olaraq azaltmaq yolu ilə də olsa işçiləri saxlamalıdır. Hesab edirəm ki, sahibkarlar sui-istifadə hallarına yol verməməlidir. Çağırışın da mahiyyəti bundan ibarətdir ki, sahibkarlar fürsətdən istifadə edib vətəndaşları işdən azad etməsinlər. Sahibkarlar  Prezidentin çağırışına əməl etməli və heç bir halda işçiləri işdən çıxarmamalıdır, əksinə, onların fəaliyyətini təmin etməlidir”-deyə R.Atakişiyev qeyd etdi.

Digər tanınmış iqtisadçı Natiq Cəfərlinin məsələyə münasibəti belə oldu:“Azərbaycanda orta və kiçik sahibkarlıqla məşğul olanların sayı kifayət qədər çoxdur. Bu dövrdə koronavirusla bağlı qanunla  müəyyən edilmiş qaydalarla əlaqəli bir çox   biznes sahələri, o cümlədən də turizm, ictimai iaşə, qeyri-ərzaq ticarət sahələrində dövriyyələrin ciddi azalması müşahidə olunur. Təbii ki, bu sahədə çalışan kiçik və orta sahibkarlar öz bizneslərini ayaqda saxlamaq üçün çətinliklərlə üzləşirlər. Hesab edirəm ki, Prezidentin çağırışı daha çox böyük holdinqlərə, banklara və digər iri biznes strukturlarına aiddir, bu qurumlar da               öz öhdəsinə düşən işi görməlidir. Çünki onların daha çox imkanları var ki, ən az bir neçə ay öz işçiləri ilə bağlı daha humanist davransınlar, onların işdən azad olunmasını saxlasınlar. Prezident sahibkarları doğru olaraq çağırdı ki, işçilərinə qarşı humanist davranıb, hətta işləməsələr belə, onların əməkhaqqını ödəsinlər. Böyük holdinqlər, şirkətlər bunu edə bilərlər və etməlidirlər də”.

N. Cəfərli qeyd etdi ki, koronavirusla bağlı həyata keçirilən məhdudlaşdırıcı tədbirlər nəticəsində zərər çəkən kiçik və orta sahibkarlara  dövlət tərəfindən yardımlar edilməlidir ki, onlar da nəticə etibarı ilə öz işçiləri ilə bağlı pozitiv qərar verə bilsinlər.

İradə SARIYEVA                                                                                           

Son xəbərlər