ABŞ-ın "İrs Fondu"nun hazırladığı "İqtisadi azadlıq indeksi"nə görə Azərbaycan bu il mövqeyini 16 pillə yaxşılaşdıraraq dünyada 44-cü pilləyə yüksəlib. Hesabatda qeyd olunur ki, Azərbaycan dünyada "İqtisadi azadlıq indeksi"ni ən çox təkmilləşdirən 11 ölkə sırasındadır.
"Prezident İlham Əliyev tərəfindən aparılan sistemli iqtisadi islahatların daha bir beynəlxalq uğurunun şahidiyik. Çünki "İqtisadi azadlıq indeksi"nin tarixində ölkəmiz qədər irəliləyiş edən ikinci bir ölkə yoxdur. Beləliklə, Azərbaycan əsasən azad ölkələrin sırasında mövqelərini daha da möhkəmləndirib. Azərbaycanın bu irəliləyişi biznes, investisiya azadlığı və fiskal sağlamlıq göstəricilərinə görə əldə etdiyi nailiyyətlərə əsaslanır. Azərbaycan "İqtisadi azadlıq indeksi"nə görə Polşa, Belçika, Portuqaliya, İspaniya və Fransa kimi Avropa ölkələrini geridə qoyub. Ölkəmiz Avropa regionunda "İqtisadi azadlıq indeksi"ni ən çox yaxşılaşdıran ölkə kimi qiymətləndirilib. Azərbaycanın "İqtisadi azadlıq indeksi" Avropanın orta göstəricisinə təxminən bərabərdir. Bu ildən etibarən "İrs Fondu" Azərbaycanı Asiya-Sakit okean deyil, Avropa ölkəsi kimi qiymətləndirib".
“İqtisadi azadlıq indeksi”nə görə, Azərbaycanın 16 pillə irəliləməsinin ekspertlər gözlənilən olduğunu düşünürlər.
Pərviz Heydərov: “İqtisadi azadlıq indeksində Azərbaycanın ön pillədə olmasının səbəbi sahibkarlıq fəaliyyəti ilə məşğul olmaq istəyənlər üçün hökumət tərəfindən yaradılan şəraitdir”
İqtisadçı-ekspert Pərviz Heydərov “Bakı-Xəbər”ə açıqlamasında qeyd etdi ki, iqtisadi azadlıq indeksində Azərbaycanın ön pillədə olmasının səbəbi sahibkarlıq fəaliyyəti ilə məşğul olmaq istəyənlər üçün hökumət tərəfindən yaradılan şəraitdir: “Məlumdur ki, son zamanlar sahibkarlıq fəaliyyəti ilə məşğul olmaq istəyənlər üçün kompleks tədbirlər həyata keçirilməkdə davam edir. Sahibkarlara qanunsuz müdaxilələrin ləğv olunması ilə bağlı istənilən nəticəyə nail olunub. Həmçinin, Vergilər Məcəlləsinə edilən dəyişikliklər özəl sektorun inkişaf etməsinə səbəb oldu”.
Həmsöhbətimiz hesab edir ki, növbəti illərdə də Azərbaycan “İqtisadi azadlıq indeksi”nə görə daha ön pillələrdə yer alacaq.
Günel CƏLİLOVA
