“Bu olaydan sonra Azərbaycanda qala bilməzdim” Qüdrət Kərimov: “Vətəndə çox güclü bir məktəb qoyub getmişəm”
“Qürbətdən gələn səslər”in izi ilə yeni yola çıxmışıq. Məqsədimiz Vətəndən uzaqlarda yaşayan, idman, ədəbiyyat, mədəniyyət, elm və təhsil sahəsində nailiyyətlər qazanan, yaşadıqları ölkələrdə xalqımızı layiqincə təmsil edən soydaşlarımızın taleyi ilə maraqlanmaq, onların fəaliyyətlərini oxuculara çatdırmaqdır.
Onları canlarından əziz bildikləri Vətəndən qürbət ellərə çəkib aparan taleləridir. Vətəndən uzaqlarda, dünyanın müxtəlif qitələrində yaşayan soydaşlarımız Azərbaycan sevgisini isti, doğma bir hiss kimi qəlblərində, ruhlarında, əməllərində yaşadırlar.
Hazırda ölkəmizdən kənarda yaşayan və öz fəaliyyətləri ilə xalqımıza, dövlətimizə başucalığı gətirən, qəlbən, ruhən azərbaycançılıq məfkurəsinə bağlı olan bu insanlar zamanında respublikamızın idman, mədəniyyət, elm-təhsil və ictimai həyatında izlər qoyub, məktəb yaradıblar.
Taleyin qürbət ellərə çəkib apardığı görkəmli insanlarımızdan biri də Almaniyada yaşayan Qüdrət Kərimovdur. Adını əbədi olaraq Azərbaycanın idman tarixinə yazan, yüzlərlə idmançı yetişdirən, çox güclü taekvando məktəbi yaradan Qüdrət Kərimov bu gün yaşadığı Almaniyada da taekvandoya sadiq qalıb. “Mənim həyatım taekvando ilə bağlıdır” deyən Q.Kərimov 1989-cu ildə respublikamızın görkəmli bədən tərbiyəsi və idman ustası, bir sıra Şərq əlbəyaxa döyüş növləri ilə yanaşı, taekvando idman növünü də Azərbaycana gətirən və burada böyük bir məktəb yaradan Süleyman Məmmədlinin yanında taekvando məşqlərinə başlayıb. Məşqlərə başladıqdan 1 il sonra, yəni 1990-cı ildə Azərbaycan çempionatının ikincisi olub.
Sonrakı illərdə dəfələrlə Azərbaycan çempionu, beynəlxalq turnirlərin qalibi və mükafatçısı olub. 1992-ci ildə “Ocaq” cəmiyyətində məşqçilik fəaliyyətinə başlayıb. Artıq 1994-cü ildə yetirmələri respublika yarışlarında öz hünərlərini göstərməyə başladılar. Uzun illərdir Almaniyada yaşayan Q.Kərimov burada 2008-2010-cu illərdə “Sportşule” Asiyada, 2010-2015-ci illərdə “Taekvando Team” Düsseldorfda məşqçi işləyib.
2010-cu ildən “NRW” Şimali Reyn Vestfaliya əyalətinin Taekvando Birliyinin “A” kateqoriyalı hakimidir. 2015-ci ildə “Sportakademie Karimov” idman klubunu yaradıblar. Qüdrət müəllim VI dan qara kəmər sahibidir. Almaniyada “NRW” üzrə bir neçə klubun imtahanlarının qəbulu da ona həvalə edilib.
2014-cü ildə “Azərbaycan” mədəniyyət və idman dərnəyini yaradıb. Bu dərnəyin ətrafında yüzdən çox ailə toplanıb. Dərnəkdə uşaqlar üçün dərsdən sonra hazırlıq, alman dili kursları təşkil edilib.
“Facebook” üzərindən görkəmli idman ustası Q.Kərimovla əlaqə saxlayaraq ona suallarımızı ünvanladıq.
- Qüdrət müəllim, müasir Azərbaycan taekvando məktəbinə münasibətiniz necədir? İzləyirsinizmi?
- Azərbaycan Taekvando Federasıyasının uğurları məni hər zaman sevindirir. Sadəcə, yeni məşqçi-müəllimlərin kvalifikasiyası artırılmalıdır deyə düşünürəm. Klubların imkanları daha da artırılmalıdır.
Mən Vətəndə çox güclü bir məktəb qoyub getmişəm. Tələbələrimə və məşqçi yoldaşlarıma etimadım böyükdür.
- Siz Azərbaycanda taekvandonu təbliğ edən, yayan, eyni zamanda da uşaqlara, yeniyetmə və gənclərə təlqin edən, öyrədən bir məşqçi-müəllim olmusunuz. O zamanlar bu sahəyə maraq hansı səviyyədə idi?
- O zamanlar taekvandonu tanıyan cox az insan var idi. Reklamları özümüz hazırlayıb, şəhərin hər yerinə yapısdırırdıq. Taekvandonu karate ilə səhv salırdılar. Amma təbii ki, məşqə gələnlər fərqini görürdülər.
- Sizin özünüz taekvando dərslərini Süleyman Məmmədlidən almısınız... O dövrdə elə də populyar olmayan bir idman növünə marağınız necə yarandı?
- Bəli, Süleyman müəllimin tələbəsiyəm və bununla fəxr edirəm. Taekvandoya gəlişim isə bir dostumun dəvətilə oldu. 1989-cu ildə məsqlər Xoreoqrafiya Məktəbində keçirilirdi. Evimizə yaxın olmağı məni bir az da həvəsə gətirdi. Məsqə basladıqdan sonra isə taekvando çox xoşuma gədi.
- Qüdrət müəllim, 1989-cu ildə Süleyman müəllimin yanında taekvando idman növü üzrə məşqlərə başlamısınız, bundan 1 il sonra isə, yəni 1990-cı ildə Azərbaycan çempionatının ikincisi olubsunuz. Sizə stimul verən nə oldu ki, qısa bir müddətdə belə yüksək nəticə əldə edə bildiniz?
- Mən 7 yaşımdan 14 yaşıma qədər idmanın sərbəst güləş və cüdo növləri ilə məşğul olmuşam. Taekvandoya başladığım zaman fiziki hazırlığım var idi. 1 ildən az taekvando məşqlərindən sonra ilk yarışım Azərbaycan çempionatı oldu. Təbii ki, qarşıma qələbə qazanmaq hədəfini qoymuşdum. Amma komandamızın o biri idmançılarının ruh yüksəkliyi ilə keçirdiyi döyüşləri və hər birinin qalib gəldiyi zaman sevincləri mənə daha da ruh yüksəkliyi, qələbə əzmi verdi.
- Bu gün Azərbaycanda saysız taekvando klubu, mərkəzləri fəaliyyət göstərir. Hətta bölgələrdə də bu sahəyə maraq böyükdür. Klub məşqçilərinin də bir çoxları Sizin yetirmələrinizdir. Onları izləyə bilirsinizmi və bu Sizdə hansı hisslər yaradır?
- 1992-ci ildən məşqçilik fəaliyyətim başladı. Bir müddət sonra Süleyman müəllimə bəzi rayonlardan taekvandonu öyrənmək istəyən karate məşqçiləri müraciət etməyə başladılar. O da həmin rayonlarda məşqçilərə yardımçı olmaq üçün məni göndərirdi. Beləliklə, bir neçə rayonda taekvandonun inkişafında mənim də payım var.
- Hazırda Almaniyada yaşayırsınız. Ora hansı səbəbdən getdiniz?
- 2004-cü ildə federasiyanın o vaxtkı rəhbərliyi ilə aramızda olan anlaşılmazlıqlara görə federasiyadan uzaqlaşdırıldım. Mənə qarşı olan haqsızlıqlardan federasiyanın prezidenti Kəmaləddin Heydərovun xəbərinin olmadığına əmin idim. Bu olaylardan sonra artıq Azərbaycandan kənarda çalışmağa qərar verdim. 2005-ci ildən sonra ailəmlə Almaniyaya gəldim.
- Almaniyada müəllimlik-məşqçilik fəaliyyətinizi davam etdirirsinizmi?
- Almaniyaya gəldiyim andan Almaniya Taekvando Birliyinə baş çəkdim. Məni yaşadığım əyalətin Taekvando Federasiyasına yönləndirdilər (NWTU). Almaniyanın Şimali Reyn Vestfaliya əyalətinin A kateqoriyalı hakimiyəm. 2015-ə qədər Taekvando Team Düsseldorfda məşqçi kimi çalışmışam. 2015-də “Sportakademie Karimov” idman klubunu qurmuşam. Taekvando üzrə 6-cı dan qara kəmər sahibi və beynəlxalq instruktoram. Bir neçə klubla müqaviləm var. Bu müqavilələr əsasında klublardakı məşqçi və tələbələrdən imtahan götürə bilirəm.
- Qürbət eldə yaşamaq asandırmı? Orada taekvandonun inkişafı necədir?
- Qürbət eldə yaşamaq çox çətindir. Qürbətdə olmaq o demək deyil ki, sevdiyin işi görməyəsən. Mənim həyatım taekvando ilə bağlıdır. Onsuz mən yaşaya bilmərəm. Bütün Azərbaycana, azərbaycanlı idmançılara, xüsusilə taekvandoçularımıza uğurlar arzulayıram. Avropa ölkələri bizim milli dəyərlərimizə zidd olan ölkələrdir. Azərbaycanda yaşadığım zaman “Avropa mədəniyyəti” ifadəsini çox eşitmişdim. Təsəvvürüm başqa idi. Buraya gəldikdən sonra isə məyus oldum. Avropada taekvandonun inkişafı üçün hər bir şərait var. Lakin avropalıların döyüş növlərinə qarşı ciddiyyətləri yoxdur
- Bu gün Azərbaycan taekvandoçuları Olimpiya Oyunlarında, Avropa və Dünya çempionatlarında uğurlar qazanırlar. Onların uğurları Sizə necə təsir edir?
- Azərbaycan taekvandoçularının uğurları məni həqiqətən də sevindirir. Həmişə yanlarında olmaq istəmişəm. Vaxtım olduqca, milli komandamızı yaxından izləmək, məşqçi yoldaşlarımı və tələbələrimi görmək üçün yarışlara qatılıram (Hollandiya, Belçika, Almaniya və Türkiyədə keçirilən yarışlara). Hətta bu yaxınlarda, 7-12 fevral 2019-cu tarixlərində Türkiyənin Antalya şəhərində keçiriləcək “4th WT Presidents Cups” yarışına da bu məqsədlə yola düşəcəm.
- Qüdrət müəllim, Siz Almaniyada taekvando idman növünü öyrətməklə yanaşı, həm də burada ictimai fəaliyyətlə məşğulsunuz. “Azərbaycan mədəniyyəti” dərnəyini hansı zərurətdən yaratdınız?
- 2014-cü ildə həyat yoldaşım Elgünə Kərimova ilə qərara gəldik ki, Düsseldorf şəhəri və çevrəsində yaşayan azərbaycanlı ailələri bir araya toplamaq (gətirmək) üçün bir dərnək quraq. Çünki Almaniyada yaşayan azərbaycanlılar, nədənsə, bir araya toplanmırlar, hətta bir-birindən uzaq dururlar. Lakin biz camaatımızı müxtəlif yardımlarla (məsələn, alman dilini bilməyən ailələrə alman dili kursları, məktəblilər üçün dərsdən sonra hazırlıq, müxtəlif dövlət qurumlarından gələn məktubların tərcüməsi və s.) dərnəyimizə cəlb edə bildik. Hazırda dərnəyimizə bağlı olan 100-dən çox ailə var.
İradə SARIYEVA
