Mətləb Salahov: “Aşağı səviyyəli futbolçuları Azərbaycan klublarına dolduranda gerisini də düşünmək hər şeydən vacib məsələdir”
Hazırda Qazaxıstanın "Tobol" komandasında oynayan Azərbaycanın "Kəpəz" futbol klubunun keçmiş kapitanı Yeqor Xvalko əvvəlki və hazırkı komandalarındakı atmosferi müqayisə edib.
"Yeni klubdakı atmosfer? Bəli, mən oradan çox məmnunam. Oranı bəyəndim. Daim yaşamaq üçün mübarizə apardığım, üç ildən sonra fərqli məqsədləri olan bir klubda olmaq xoşdur. Komanda əladır və mən tez bir zamanda uyğunlaşdım", - deyə Xvalko bildirib.
“Kəpəz” futbol klubunun keçmiş kapitanının açıqlaması ictimaiyyət arasında narazılığa səbəb olub.
“Azərbaycan çempionatını aşağalayan, cəmiyyətimizi və dəyərlərimizi heçə sayan belələri həmişə nankorluq göstərir”
Jurnalist-ekspert Mətləb Salahov “Bakı-Xəbər”ə şərhində bildirdi ki, uzun illərdir Azərbaycan klubları böyük məbləğdə pullar xərcələyərək, bir qara qəpiyə dəyməyən əcnəbi futbolçuları Azərbaycan çempionatına daşıyırlar. Onların bir çoxu heç bir futbolçu keyfiyyətinə cavab verməməklə yanaşı, həmçinin insani dəyərlər baxımından da yararsız şəxslərdir: “Çünki illərdir burada layiq olmadıqları böyük məbləğdə pullar qazanıb geri dönərkən həm ölkəmiz, həm də mənsub olduqları futbol klubları barədə ağına-bozuna baxmayaraq iftira dolu fikirlər səsləndirirlər. Azərbaycan çempionatını aşağalayan, cəmiyyətimizi və dəyərlərimizi heçə sayan belələri həmişə nankorluq göstərir. Hazırda Qazaxıstanın "Tobol" klubunda Kəpəz"in keçmiş kapitanı Yeqor Xvalko keçmiş və hazırkı komandalarındakı atmosferi müqayisə edərkən sadaladığımız “kriteriyalara” uyğun açıqlama verib. Bu belarusiyalı futbolçu ötən ilin 28 dekabrında ölkənin idman mediasına açıqlamasında görün nələr deyirdi. “Həm sağlamlıq, həm də məşq baxımından “Kəpəz”dəki şərait ürəyimcədir”. Müsahibədəki bu fikirdən cəmi 1 il vaxt keçib. Bəs indi nə deyir? “Oranı (Qazaxıstanı) bəyəndim. Keçmiş klubumda daima yaşamaq üçün mübarizə apardığım üç il ərzində” deyir. Necə oldu ki, aşağı kriteriyalı futbolçu kimi “Kəpəz”də yaxşı pullar qazananda orda hər şey ürəyincə idi, İndi Qazaxıstan klubuna keçdin, valın doxsan dərəcə dəyişdi? İdman həm də əxlaqi dəyərlərlə, mənəviyyatla zəngin olur. Belə aşağı səviyyəli futbolçuları Azərbaycan klublarına dolduranda gerisini də düşünmək hər şeydən vacib məsələdir”.
Günel CƏLİLOVA
