Türkiyənin ən uzunömürlü yelkən yarışı olan Bosfor Kuboku bu il 24-cü dəfə İstanbulda təşkil olunacaq. 18–21 sentyabr tarixlərində baş tutacaq yarış dünyanın ən maraqlı dəniz idmanı tədbirlərindən biri kimi dəniz həvəskarlarını bir araya gətirəcək.
Üç tərəfdən dənizlərlə əhatələnən Türkiyə, beynəlxalq səviyyəli su idmanı yarışları ilə hər il minlərlə tamaşaçını və idmançını cəlb edir. Onların arasında xüsusi yer tutan Bosfor Kuboku həm də dünyada iki qitə – Avropa və Asiya arasında keçirilən nadir yarışlardan biridir.
Artıq 24 ildir davam edən bu möhtəşəm yarış İstanbulun dəniz idmanı mərkəzi kimi mövqeyini daha da möhkəmləndirir və yelkən idmanının ruhunu şəhərin mərkəzinə gətirir.
Bosfor uğrunda alovlu mübarizə
Rəngarəng yelkənlərin İstanbul səmasının fonunda dalğalandığını və onların parıltısının Bosfor boğazının işıltılı sularında əks olunduğunu təsəvvür edin. Hər il bir dəfə keçirilən Bosfor Kuboku, bu unikal şəhərin cazibədar boğazını dostluq ruhunda, lakin gərgin rəqabətlə müşayiət olunan möhtəşəm yelkən yarışına çevirir.
Yarışın builki buraxılışı da İstanbulun qəlbini külək, su və rəqabətin hökm sürdüyü canlı bir arenaya çevirəcək. IRC, ORC və kruiz katerləri daxil olmaqla, səkkiz müxtəlif kateqoriya üzrə güclü mübarizə aparılacaq.
Xüsusi icazə əsasında – adətən yalnız yük gəmilərinin hərəkətinə açıq olan Bosfor boğazında yarışmaq imkanı əldə edən yelkənçilər bu dəfə də dünyanın dörd bir yanından İstanbula toplaşacaq. Təxminən 85 qayıq üzərində toplanan iştirakçıların hamısı tək bir məqsəd daşıyır: qitələri birləşdirən və imperiyaların yüksəlişinə-çarxına şahidlik etmiş yeganə təbii boğazda öz bacarıqlarını sınamaq.
Yarışın açılışı 18 sentyabrda baş tutacaq. Ertəsi gün – 19 sentyabrda Caddebostan sahillərində ilk “around-the-cans” yarışları keçiriləcək. Əsas həyəcan isə 20 sentyabrda yaşanacaq. 10 ölkədən 900-ə yaxın yelkənçi güclü axınları ilə məşhur Bosfor sularında qalib adı uğrunda mübarizə aparacaq. Şəhərin üç asma körpüsünün kölgəsində, sahildə toplaşacaq təxminən bir milyon tamaşaçının seyr etdiyi bu möhtəşəm mənzərədə uzunluğu 25 futdan 86 futadək olan qayıqlar ən yaxşı mövqeni tutmaq üçün yarış xəttində gərgin mübarizə aparacaqlar.
Küləklərin Teatrı – Bosfor Kuboku festival ab-havasında
Bosfor Kuboku yalnız həyəcan dolu yarışları ilə deyil, həm də bütün şəhəri əhatə edən festival ab-havası ilə unudulmaz olur. Bu yarış Şərqlə Qərbin qovuşduğu, tarixin müasirliklə üz-üzə gəldiyi bir məkan kimi hər il İstanbulu yelkən idmanının mərkəzinə çevirir. Minlərlə şəhər sakini və qonaqlar bu nadir dəniz tamaşasının şahidi olmaq üçün Bosfor sahillərinə axışır.
Bu il möhtəşəm mənzərəni daha da zənginləşdirəcək yeni bir bədii performans təqdim olunacaq. “Küləklərin Teatrı” adlanan bu şou İstanbul Təsviri İncəsənət Akademiyasının iştirakı ilə hazırlanıb. Altı rəqqas xüsusi geyim və rəqslərlə şəhərin məşhur küləklərini canlandıraraq qonaqlara unudulmaz anlar yaşadacaq. Bu unikal təqdimat VIP qonaqlar üçün təşkil olunan ziyafətdə nümayiş etdiriləcək.
Yarış isə 12:00-dan 17:00-dək Bosfor sularında davam edəcək. Qonaqlar isə günorta saatlarında boğaz sahilində təşkil olunacaq dəbdəbəli məclisdə həm yarışın həyəcanını, həm də festivalın coşqusunu birlikdə yaşayacaqlar.
SAMİRƏ
