Səid Nəcəfzadə: "Paris Paralimpiya oyunlarında əsas hədəfim himnimizi səsləndirmək idi, bunu bacardım və himnimizi səsləndirdim"
Azərbaycan paralimpiyaçıları sübut edir ki, idmanda uğur qazanmaq, nailiyyətlər əldə etmək çətin deyil, təki zəhmətini, əməyini, enerjini əsirgəmə, iradəli ol, cəsarətini göstər. "Bakı-Xəbər" olaraq istedadlı, bilikdə, idmanda, incənətdə böyük müvəfəqiyyətlərə imza atan uşaq və gənclərin uğurlu həyat hekayəsi, heyrətamiz həyat mübarizəsi barədə silsilə yazılar veririk.
Təbii ki, bizim bir parçamızı təşkil edən əlilliyi olan uşaq və gənclərimizi də unutmuruq. Onların qazandıqları uğurların mahiyyəti, əhəmiyyəti daha möhtəşəmdir. Onlar bu cəmiyyətin ən sağlam əqidəli, ən sağlam düşüncəli insanlarıdır. Bu insanların ürəkləri o qədər böyükdür ki, o ürəkdən doğulan sevgi də nəhayətsizdir, sonsuzdur. Onlar vətəni təmənnasız sevdikləri üçün vətən də onları qanadları altına alır...
"Çempionluq hissi qürurverici bir hissdir və bu zirvəni fəth etməyi davam etdirmək istəyirəm"
Uğurlu idman karyerası ilə, böyük-böyük arenalarda göstərdiyi hünərlərlə fərqlənən, qaliblər sırasında yer tutan budəfəki qəhrəmanımız 2024-cü il Paris Yay Paralimpiya Oyunlarında kişilər arasında uzunluğa tullanma T12 kateqoriyasında Paralimpiya çempionu Səid Nəcəfzadədir.
"Hər yerdə xalqımın dəstəyini gördüm" deyib xalq məhəbbətindən güc aldığını deyən, qələbəsini Vətənimizə həsr edən Səid Əli oğlu Nəcəfzadə 1999-cu il yanvarın 14-də Sumqayıt şəhərində anadan olub. 2005–2016-cı illərdə Sumqayıt şəhərində F. Piriyev adına 18 nömrəli tam orta məktəbdə təhsil alan Səid Nəcəfzadə, ali təhsilini 2016–2020-ci illərdə Azərbaycan Dövlət Bədən Tərbiyəsi və İdman Akademiyasında (ADBTİAA) alıb.
"İdmana həmişə həvəsim olub, uşaq yaşlarından idman yarışlarını izləməyi çox xoşlayırdım. 10 yaşımdan isə atletika ilə məşğul olmağa başladım"-deyən Səid bildirdi ki, hər zaman ailəsindən və məqçisindən güclü dəstək görüb: "Dəstəyinə görə ailəmə, məşqçim Vladimir Zayetsə, üzvü olduğum "Neftçi" idman klubuna təşəkkür etmək istəyirəm.
Ailəm mənə həmişə yaxından dəstək olub".
Bu idman növü Səid üçün hava-su qədər doğmadır. Deyir ki, məşğul olduğu idman sahəsi artıq onun həyat tərzinə çevrilib: "Onsuz həyatımı heç təsəvvür də edə bilmirəm. İlk öncə hər kəs kimi bu idmana mən də əlavə məşğulliyyət və hobbi kimi başlamışdım. Bununla yanaşı dərslərimi də yaxşı oxuyurdum, kompüter elmlərinə marağım var idi. 15-16 yaşlarımda artıq seçim etməli idim və mən idman sahəsini seçdim. Əgər bu sahə olmasaydı, yəqin ki, IT mütəxəsisi və ya proqramçı olardım".
Səidin dediyinə görə, idman elə bir sahədir ki, burada insan özünü daha yaxşı tanıyır, öz bacarığını, potensialını ortaya qoya bilir. "Gənclərə isə məsləhətim odur ki, sevdiyiniz, bezmədən və daima çalışa biləcəyiniz, həvəsiniz olan məşğulliyyət və peşənin ardınca gedin, davam edin".
Səidin iştirak etdiyi ilk paralimpiya oyunu 2020-ci ildə Tokioda keçirlən Yay Olimpiya Oyunları olub. Azərbaycanı təmsil edən yüngül atletimiz 2020-ci ildə baş tutan XVI Yay Paralimpiya Oyunlarında bürünc medala sahib olub.
"Tokio 2020 iştirak etdiyim ilk paralimpiya oyunlarım idi. Birinci dəfə idi ki, belə mötəbər yarışda iştirak edirdim.O zaman da əliboş qayıtmadım. Növbəti illərdə isə artıq dünya çempionu oldum. Paris Paralimpiya oyunlarında əsas hədəfim himnimizi səsləndirmək idi, bunu bacardım və himnimizi səsləndirdim".
Bəs paralimpiya çempionumuzun gələcək arzuları nədir, nələri hədəfləyir?
"Arzumu demək istəməzdim. Növbəti və gələcək hədəflərim isə, hələ ki, 2028-ci ilə kimi məşqlərimi davam etdirib, yarışlarda uğurlu çıxış etməyi davam etdirməkdir. Çempionluq hissi qürurverici bir hissdir və bu zirvəni fəth etməyi davam etdirmək istəyirəm.
Bu nəticəni əldə etməyimdə ən böyük rolu olan məşqçimdir. Onunla bu nəticəni əldə etmək üçün uzun yol qət etmişik.
Biz idmançıların da vəzifəsi daima dalğalanacaq olan bayrağımızı və himnimizi idman arenalarında səsləndirməkdi. Vətənim, ölkəm üçün nəsə edə bilmişəmsə və bunun qarşılığında ölkə başçısı tərəfindən "Vətənə xidmətə görə" ordeni ilə təltif olunmuşamsa, bu, əvəzolunmaz və fəxrediləsi bir hissdir. Cənab Prezidentə məni təltif etdiyinə görə təşəkkürümü bildirirəm.
Bu, nəticəni əldə etmək üçün çəkilən əziyyətlərin bəhrəsidir deyərdim. Bu cür uğurların arxasında isə böyük hekayələr durur. Parisdə də himnimizi səsləndirməyi bacarmağım sözlə ifadəolunmaz bir hiss idi mənim üçün". Qəhrəmanımız deyir bütün bunları.
Şəxsi məşqçisi Vladimir Zayets olan atletimizin uğurlu həyat hekayəsini zəngiləşdirən idman nəticələrini qeyd edərkən bildirək ki, o, 2020-ci ildə baş tutan XVI Yay Paralimpiya Oyunlarında bürünc medala sahib olub. 2024-cü il Paris Yay Paralimpiya Oyunlarında isə kişilər arasında uzunluğa tullanma T12 kateqoriyasında Paralimpiya çempionu adını qazanıb. Səid Nəcəfzadə 2016-cı ilin may ayında uzunluğa tullanma üzrə şəhər çempionatının qalibi, 2019-cu ilin iyul ayında Tunisdə baş tutan beynəlxalq turnirdə 6.80 metr nəticə ilə gümüş medala sahib olub. 2021-ci ilin iyun ayında Səid Nəcəfzadə Polşada baş tutan Avropa Çempionatında 6.96 metr nəticə ilə turnirin qalibi kimi adını tarixə yazdırdı.
Azərbaycan Prezidenti İlham Əliyevin 6 sentyabr 2021-ci il tarixli Sərəncamına əsasən XVI Yay Paralimpiya Oyunlarında qazandığı nailiyyətlərə və Azərbaycan idmanında xidmətlərinə görə Səid Əli oğlu Nəcəfzadə 3-cü dərəcəli "Vətənə xidmətə görə" ordeni ilə təltif edildi.
2024-cü ildə Yaponiyada keçirilmiş dünya çempionatında T12 kateqoriyasında uzunluğa tullanma üzrə yarışda 7,30 metr nəticə ilə qızıl medal qazanıb. Bu uğurlu nəticəni atletimiz avqust-sentyabr aylarında keçirilən 2024 Yay Paralimpiya Oyunlarında T12 kateqoriyasında uzunluğa tullanma üzrə yarışda 7,27 metr nəticə ilə Paralimpiya oyunlarında çempion olmaqla təkrarlayıb.
Prezident İlham Əliyevin 10 sentyabr 2024-cü il tarixli sərəncamı ilə Səid Nəcəfzadəyə XVII Yay Paralimpiya Oyunlarında birinci yeri tutduğuna görə 200 000 manat, məşqçisinə isə 100 000 manat pul mükafatı verilib. Prezidentin eyni tarixli digər sərəncamı ilə o, həmçinin 1-ci dərəcəli "Vətənə xidmətə görə" ordeni ilə təltif edilib.
25 yaşlı idmançımızın uğurlu həyat hekayəsi, mübarizə və əzmkarlıq dolu karyera yolu gəncliyə gerçək bir nümunədir. Səid kimi çempionlar cəmiyyətə, gəncliyə çox ciddi mesajlar ötürürlər ki, zəhmətlə, böyük əmək sərf etməklə, məsuliyyətlə, iradə və əzmlə, bir də xalqına, dövlətinə sevgi ilə olimp zirvələrini fəth etmək mümkündür...
İradə SARIYEVA
