Elçin Cəfərov: "Fiziki hazırlıqla yanaşı, mental cəhətdən hazır olanlar fəxri kürsüdə yer almağı bacardılar"
"...Bizim Olimpiya Oyunlarındakı uğurlarımız əvvəlki illərdə də, son Oyunlarda da göstərir ki, Azərbaycan güclü idman dövlətidir. Təsadüfi deyil ki, biz bu Oyunlarda dünyanın ən güclü 30 ölkəsinin arasında yer almışıq - 2 qızıl, 2 gümüş və 3 bürünc medal, hesab edirəm ki, çox yaxşı nəticədir. İdmançıları, onların məşqçilərini bu gözəl hadisə münasibətilə bir daha təbrik etmək istəyirəm.
Onu da bildirmək istəyirəm ki, müsəlman ölkələri arasında Azərbaycan üçüncü yerdə qərarlaşıb. Nəzərə alsaq ki, İslam Əməkdaşlıq Təşkilatında 57 üzv mövcuddur, hesab edirəm, bu, çox gözəl və tarixi nəticədir. Bütövlükdə komandamızın çıxışına qiymət verərək mən hesab edirəm ki, bizim idmançılarımız ən yüksək qiymətə layiq olmalıdır".
Bu sözləri Prezident İlham Əliyev Paris Yay Olimpiya Oyunlarında medal qazanmış Azərbaycan idmançılarını və onların məşqçilərini qəbul edərkən söyləyib.
Prezidentin də dediyi kimi, Azərbaycan idmançıları Paris Olimpiyadasında böyük uğurla iştirak edib.
Ekspertlər də hesab edir ki, Azərbaycan idmançılarının bu nəticələri təqdirəlayiqdir, çünki onlar sona qədər mübarizə əzimini qoruya bildilər. Ekspertlər qeyd eidr ki, müsəlman ölkələri arasında Azərbaycanın üçüncü yerdə qərarlaşması da çox mühüm əhəmiyyət kəsb edir. Ekspertlər fakt kimi onu da əlavə edirlər ki, Olimpiadada heç bir uğur qazanmayan ölkələr də olub, məsələn, Türkmənistandan Paris Olimpiadasına 19 idmançı getsə də, bir dənə medal qazana bilməyib.
"İdmanda təcrübə və hazırlıqla yanaşı, şans da, idmançının konkret məqamda əhvali-ruhiyyəsi də önəmli rol oynayır"
Tanınmış idman şərhçisi Elçin Cəfərov "Bakı-Xəbər"ə "Sözsüz ki, Olimpiadaya gedən hər bir idmançı yalnız qələbə barədə düşünür. Ancaq unutmayaq ki, bu cür yarışda iştirak belə çox önəmlidir. Dördilliyin zirvə yarışına 48 idmançı ilə qatılan Azərbaycan komandası turniri 2 qızıl, 2 gümüş və 3 bürünc medalla başa vurub. Qızıl medallar cüdoda, gümüş medalların 1-i boks, 1-i taekvondo, bürünc mükafatlar isə güləş yarışında qazanılıb.
Ümumiyyətlə, Olimpiadada yarışan və qalib gələn idmançılar alqışla qarşılanır, onlar qarşıdakı turnirlərə daha məsuliyyətlə yanaşırlar. Ümidləri doğrulda bilməyən idmançılar da qınaq obyekti olmamalıdırlar. Sözsüz ki, uğursuzluq sonunda ayrı-ayrı idman növləri üzrə mütəxəssislər hər şeyi araşdıracaq, buraxılmış səhvləri nəzərdə saxlayacaq və lazımi nəticələr çıxaracaqlar.
Bundan da yaxşı nəticə qazana bilərdikmi? Əlbəttə, bu potensial Olimpiya yığmamızda var idi. Bir neçə idmançı var idi ki, potensial medal ümidlərimizdən idilər. Psixoloji hazırlıq belə nüfuzlu yarışlarda çox önəmlidir. Fiziki hazırlıqla yanaşı, mental cəhətdən hazır olanlar fəxri kürsüdə yer almağı bacardılar"-deyə bildirdi.
Amma bir məqamı da xüsusi vurğulayan E.Cəfərovun fikrincə, heç kim deyə bilməz ki, əsas favorit idmançı Olimpiadada mütləq medal qazanacaq. "Çünki dünyanın ən nüfuzlu yarışında qarşısındakı rəqib də güclü idmançıdır, o da qələbə uğrunda yarışır, döyüşür. İdmanda təcrübə və hazırlıqla yanaşı, şans da, idmançının konkret məqamda əhvali-ruhiyyəsi də önəmli rol oynayır.
Medal sıralamasında isə vəziyyət heç də pis deyil. Belə ki, Olimpiya yığmamız Sidneydə 199 ölkə arasında 34-cü, Afinada 202 ölkə arasında 50-ci, Pekində 205 ölkə arasında 39-cu yeri tutmuşdusa, son Olimpiadada medalların sayına görə 30-cu olduq!
Sonda qeyd etmək istərdim ki, 3 ildir, federasiyaların rəhbər, məşqçi heyətlərinin yenidən təşkili sürətlə gedir. Öz sahələrində müasir, səmərəli fəaliyyət göstərən şəxslər inanırıq ki, federasiyalardakı ətaləti, ləngimələri tezliklə aradan qaldıracaqlar"-deyə müsahibimiz vurğuladı.
İradə SARIYEVA
