Natiq Muxtarlı: "SSRİ vaxtı Azərbaycan idmanında erməni izi, demək olar ki, olmayıb"
Bu gün erməni təbliğat maşını çalışır ki, bütün sahələrdə ermənilərin rolunu şişirtsinlər. Xüsusən də idman sahəsində onların "əvəzedilməz" olduğunu iddia edirlər. Erməni əsilli idmançıları elə qələmə verməyə çalışırlar ki, guya onlar olmasaydı Sovet dövründə Azərbaycan idmanı "parlaq" olmazdı.
İddia edirlər ki, guya "ermənilər Azərbaycanda idmanın formalaşmasına və inkişafına töhfə verib" (? )
O qədər qondarma adlar çəkirlər ki, adam təəccüblənməyə bilmir.
Guya "ermənilər Azərbaycan SSR-də idman fondunun formalaşmasında və inkişafında əsas rol oynayıblar, Azərbaycan futbolunun, boksun, güləşin, şahmatın inkişafına böyük töhfələr veriblər" .
Guya keçən əsrin 30-cu illərinin sonunda "ölkənin ən yaxşı boksçusu" Levon Teymuryan "hesab olunurmuş".
Erməni mediası Arkadi Karapetyanın, Artaş İşxanyanın, Vyaçeslav Mkrtıçev və Sergey Aqapovun, Rudik İonesyan, Mixail Qriqoryanın adlarını çəkir. Guya Azərbaycandan "ilk dünya çempionu" güləşçi Artyom Teryan olub (? ). Bu azmış kimi, deyirlər ki, erməni əsilli şahmatçılar Azərbaycanda "əsas yerləri tutub". Onların adlarını da qeyd edirlər, amma Harri Kasparovdan başqa kimsəni xatırlamaq mümkün deyil. O da özünü əməlli-başlı erməni saymır.
Erməni mediası Paruyr Parsadanov adlı Şuşada doğulan ermənidən danışır ki, guya onun "Bakı futbolunun inkişafında böyük xidmətləri olub".
Paruyr Parsadanovu isə bizim cəmiyyətdə xatırlayan yoxdur. O necə məşhur futbolçu olub ki, adı yadda qalmayıb?
Erməni əsilli futbolçulardan yalnız Edkart Markarov xatırlanır. O da bizim futbolda iştirak edən yeganə qeyri-azərbaycanlı deyildi. Bu gün onun şöhrətini kölgədə qoyan Anatoli Banişevski, Bruxti daha çox xatırlanır. Onları gənclər də yaxşı tanıyır.
Bu gun Azərbaycan cəmiyyəti Sovet dövründə olan hansı məşhur erməni idmançını tanıyır?
"Markarov "Neftçi"də oynadığı vaxtda da lider olmayıb, Banişevski ilə Kazbek Tuayevin kölgəsində qalıb"
İdman mütəxəssisi Natiq Muxtarlı "Bakı-Xəbər"ə şərhində bildirdi ki, erməni mediasının yazdıqları həqiqəti əks etdirmir. "SSRİ vaxtı Azərbaycan idmanında erməni izi, demək olar ki, olmayıb. Ermənilərin nə uydurmasından asılı olmayaraq, fakt faktlığında qalır.
Azərbaycana xas olan ənənəvi idman növlərində - güləş, sambo, cüdo SSRİ yığmasının heyətində daim azərbaycanlılar olub. Ermənilər bu idman növündə SSRİ vaxtı ümumiyyətlə rəqabət apara bilmirdilər.
SSRİ vaxtı Azərbaycanda həndbol və voleybol da yaxşı inkişaf etmişdi. Azərbaycan voleybol və həndbolunda da erməni izi yoxdur. Komandaların heyəti azərbaycanlılardan və ruslardan formalaşırdı.
Azərbaycan həndbolu və voleybolu sovet idmanına İnna Rıskal, Rəfiqə Şabanova, Lyudmila Şubina, Larisa Savkina, Esmira Əsgərova, Yelena Quseva, Marina Cəfərova kimi əfsanəvi idmançılar bəxş edib ki, onların da arasında erməni yoxdur. Bu idmançılar Olimpiya, dünya çempionu olublar, bütün dünyada şöhrət qazanıblar.
Burada hansı erməni izindən danışmaq olar? Azərbaycan idmanında yalnız və yalnız bir erməni xatırlanır – futbolçu Eduard Markarov. O da 60-cı illərdə "Neftçi"də oynayıb və sonradan "Ararat"a keçib. Markarov "Neftçi"də oynadığı vaxtda da lider olmayıb, Banişevski ilə Kazbek Tuayevin kölgəsində qalıb.
Vəssalam, yaşlı və orta nəsil Azərbaycan idmanında erməni izi haqda ancaq Markarovu xatırlaya bilər. Ona görə də, ermənilərin belə qeyri-ciddi iddialarına önəm verməyə ehtiyac yoxdur"-deyə N.Muxtarlı qeyd etdi.
O bildirdi ki, erməni mediasında ermənilərin rolunu şişirtmək ənənəsi həmişə olub və bu dezinformasiya da onlardan biridir.
İradə SARIYEVA
