Paralimpiyaçılarımızın sıçrayışla irəliləməsi - olimpiyaçılarımızdan üstün nailiyyətlərin sirri…

Kənan Məstəliyev: “Bütün yığma çox böyük kollektivçilik ruhunda məşq edir”

img

Prezident İlham Əliyev “Tokio-2020” Yay Paralimpiya Oyunlarında ölkəmizə növbəti qızıl medalları qazandıran idmançılarımızı təbrik edib. Prezident bununla bağlı tvitterdəki hesabında paylaşım edib. Paylaşımda deyilir:

“Növbəti qızıl medal sevincini bizə bəxş etdikləri üçün Dürsədəf Kərimovaya, rekordçularımız Həmid Heydəri və Elvin Astanova təşəkkür edir, onları qələbələri münasibətilə ürəkdən təbrik edirəm!”.

Azərbaycanın Birinci vitse-prezidenti Mehriban Əliyeva  da özünün instaqram səhifəsində paralimpiyaçılarımızı qazandıqları nailiyyət münasibətilə təbrik edib:

"Bizim yeni qələbələrimiz, növbəti medallarımız! İdmançılarımızı – qızıl medal sahibləri, dünya rekordunu yeniləmiş Elvin Astanovu, Dürsədəf Kərimovanı və bürünc medal qazanmış İlham Zəkiyevi səmimi qəlbdən təbrik edirəm. Sizin hamınıza və milli paralimpiya yığmamızın digər üzvlərinə möhkəm cansağlığı, yeni nailiyyətlər arzulayıram".

Qeyd edək ki, Azərbaycan Tokio-2020 Yay Paralimpiya Oyunlarda daha bir qızıl medal qazanıb.

Azərbaycanlı atlet Elvin Astanov nüvə itələmə idman növündə həm qızıl medal qazanıb, həm də 8,77 metr nəticə ilə yeni dünya rekordu müəyyənləşdirib. Bu, azərbaycanlı idmançıların Tokio-2020 Yay Paralimpiya Oyunlarında müəyyənləşdirdiyi ikinci rekorddur. E.Astanovun qələbəsi ilə komanda hesabında Azərbaycanın qazandığı qızıl medalların sayı 9-a çatıb, medal sayına görə isə ölkəmiz 6-cı yerdə qərarlaşıb.

Qeyd edək ki, nizə atmada Həmid Heydəri yeddinci qızıl medalı qazanıb. O, 51,42 metr nəticə göstərərək yeni dünya rekorduna da imza atıb.

Çox maraqlıdır ki, qısa müddət əvvəl elə Tokiodakı Olimpia oyunlarda iştirak edən olimpiyaçılarımız bununla müqayisədə çox zəif nəticə ortaya qoyublar. Paralimpiyaçılarımızın bu üstün nailiyyətinin sirri nədədir?

İdman mütəxəssisi Kənan Məstəliyev “Bakı-Xəbər”ə açıqlamasında bildirdi ki, paralimpiyaçılarımızın uğurları ilə bağlı bir sıra məqamları qeyd etmək olar: “Onlardan birincisi budur ki, biz bəzi idman növlərində daha çox medal əldə etmişik. Məsələn, belə idman növlərindən biri cüdodur. Səbəb budur ki, komandanın bütün kollektivi uzun müddətdir bir yerdədir. Artıq məşqçilərlə idmançılar bir-birini yarım sözdən başa düşürlər. Digər idman növlərində də belə ab-hava var. Biz bunu onların əsas mərkəzi olan Sumqayıtdakı məşqlər zamanı görmüşük. Bütün yığma çox böyük kollektivçilik ruhunda məşq edir. Məşqçilərin tapşırıqlarını ciddi yerinə yetirirlər. Hamı bir yerə toplanıb məşq edir. Belə kollektivçilikdə həm də hədəfə çatmaq asan olur. İdman həm də bir intizam deməkdir. Davamlı məşq edəndə ortada yaxşı nəticələr də olur. İkinci səbəb budur ki, həmin idmançılara fiziki məhdidiyyətli olduqlarına görə həkim nəzarəti də var. Qidalarına, yuxu rejimlərinə ciddi nəzarət edirlər. Bunun da böyük faydası olur. Doğru qidalanma, doğru məşq olan yerdə uğur olmalıdır. Bunu da hazırda görürük”.

Ekspertin sözlərinə görə, nəticə verən idmançılardan çoxunun bir neçə il əvvələ kimi fiziki məhdudiyyətləri olmayıb: “Onların əvvəl də idman nailiyyətləri olub. Sonradan məhdudiyyət ortaya çıxıb və paralimpiyada özlərini sınamağa məcbur qalıblar. Keçmişdən qalan təcrübə də öz sözünü deyib. Olimpiya oyunlarında  bizim zəif nəticə əldə etməyimizin də burada rolu var. Paralimpiyaçılarımız daha da prinsipiallıq nümayiş etdirməklə, Azərbaycan xalqını medalla sevindirməyə çalışırlar. Mən də fürsətdən istifadə edib, onların hər birinə minnətdarlığımı çatdırıram. Hələ yarış davam edir, yəqin ki, medal sayı daha da artacaq”.

Məhəmmədəli QƏRİBLİ

Son xəbərlər