Azərbaycanın tanınmış idmançılarını Tokioda həqiqətən hakimlər uduzdurubsa...

img

Azərbaycan idmançılarının Tokio-2020-dən qızıl medalsız qayıtması faktı bir neçə gündür ki, ciddi şəkildə müzakirə edilir. Azərbaycan tərəfi deyir ki, karateçilər Rafael Ağayevin, İrina Zaretskanın və sərbəst güləşçi Hacı Əliyevin Tokio-2020 Yay Olimpiya Oyunlarında qızıl medal qazana bilməmələrinin səbəbi hakimlərin onları qəsdən uduzdurması ilə bağlıdır. Yəni hakimlər hər üç idmançını qəsdən uduzdurub.

Müzakirələrə Azərbaycan Voleybol Federasiyasının vitse-prezidenti Faiq Qarayev də qoşulub, o, jurnalistlərlə görüşündə “Olimpiadada 3 qızıl medal qazanmaq şansımız var idi. Amma finallar idmançılarımızın xeyrinə olmadı” açıqlamasını verib.

F.Qarayevin sözlərinə görə, karateçilər Rafael Ağayev (75 kq), İrina Zaretska (+61 kq) və sərbəst güləşçi Hacı Əliyevin (65 kq) Tokio-2020 Yay Olimpiya Oyunlarında qızıl medal qazana bilməmələrinin səbəbi hakimlərin ədalətsizliyi ilə bağlı olub. O bildirib ki, Ağayev həlledici görüşdə hakimlərin səhvi üzündən uduzdu: “Rafaelin final qarşılaşmasını dəfələrlə izlədim və belə qanətə gəldim ki, onu uduzdurublar. Bunu isə İtaliya mafiyası etdi. Bütün idmançılarımıza dəstək vermək lazımdır. Burada qələbə olduğu kimi, məğlubiyyət də var”.

İdman ictimaiyyətində 3 olimpiyaçımızın qızıl medaldan məhrum edilməsinin səbəbkarının hakimlər olduğu iddia edilir. Belədirsə, Azərbaycan beynəlxalq səviyyədə məsələ qaldırıb o hakimlərin cəzalandırılmasına nail ola bilərmi?

  • Əziz Qəmbərov: “Məsələnin aydınlaşdırılmasına ehtiyac varsa, əlaqədar qurumlar bununla məşğul olmalıdır”

Hüquqşünas Əziz Qəmbərov hesab edir ki, bunun üçün Azərbaycan məsələnin araşdırılması məqsədilə Olimpiada təşkilatçılarına müraciət etməlidir: “Hər üç idmançımız bizim qızıl ümidimiz idi. Amma hər üçü gümüş medal qazandı. Üç olimpiyaçımızın hakimlər tərəfindən uduzdurulması iddiasına gəlincə, əlbəttə, aidiyyəti qurumlar bunu aydınlaşdırmaq üçün olimpiya oyunlarının təşkilat komitəsinə müraciət edərək araşdırma tələb etməlidir. Məsələnin aydınlaşdırılmasına ehtiyac varsa, əlaqədar qurumlar bununla məşğul olmalıdır. Amma bizdə bu barədə hər hansı bir açıqlama verilməyib”.

  • Natiq Muxtarlı: “Ümumiyyətlə, bunun beynəlxalq müstəvidə həlli prosesi də yoxdur”

Tanınmış idman şərhçisi Natiq Muxtarlı isə hesab edir ki, bu iddianı irəli sürmək üçün ortada tutarlı dəlil, sübut, fakt lazımdı: “İdmançılarımız hakim haqsızlığına görə məğlub oldular” iddiasını irəli sürərkən tutarlı faktlara sahib olmalısan. Azərbaycan idmançılarının hakim haqsızlığına məruz qalması ilə bağlı heç bir dəlilimiz yoxdur. Belə dəlil olmadığı halda hara müraciət etmək olar ki? Ümumiyyətlə, bunun beynəlxalq müstəvidə həlli prosesi də yoxdur. Olimpiadalarda ayrı-ayrı ölkələrin idmançıları, o cümlədən əvvəlki yarışlarda azərbaycanlı idmançılar da hakim səhvləri ilə üzləşiblər. Amma bu səhvlərdən şikayət etməyin mexanizmi ya yoxdur, yaxud varsa da əhəmiyyətsizdir. Tokioda isə nə Hacının, nə Rafaelin, nə də İrinanın hakim qərəzi ilə üzləşdiyini düşünmürəm. Hacının məşqçiləri qarşılaşmanın gedişində elə zənn etdilər ki, idmançımız fənd işlədib və dərhal da etiraz etdilər. Videoyazıya baxıldıqdan sonra məlum oldu ki, belə deyil. Nəticədə rəqibə əlavə bir xal da verildi. “İdmançılarımız hakim haqsızlığına görə məğlub oldular” iddiası Tokiodakı fiaskoya haqq qazandırmaq üçün ucuz bəhanədir. Vaxt olub, müxtəlif beynəlxalq yarışlarda, o cümlədən Azərbaycanda keçirilən beynəlxalq turnirlərdə bizim idmançılarla qarşılaşan əcnəbilərə qarşı o qədər hakim ədalətsizliyi olub ki... Belə boş bəhanələri gündəmə gətirməkdənsə, fiaskonun səbəbləri araşdırılmalı, günahkarlar cəzalandırılmalıdır. Hər şeyi hakimlərin üzərinə atmağa çalışanlar Azərbaycan idmanını uçuruma yuvarlayanlardır. Görünür, onlar belə ucuz bəhanələrin arxasında gizlənib yenə də idmanımızın başında “qoz sındırmağa” davam etmək istəyirlər”-deyə N.Muxtarlı vurğuladı.

İradə SARIYEVA

Son xəbərlər