İyulun 23-dən Azərbaycan xalqının gözü yolda, qulağı səsdədir ki, Tokio-2020 Yay Olimpiya Oyunlarında iştirak edən milli komandamız medal qazanacaq. Artıq beş gündür ki, Tokio Olimpiyadası başlayıb, amma çox təəssüflər olsun ki, bu günlər ərzində Azərbaycanın milli komandasının üzvlərinin yarıdan çoxu uduzub və mübarizəni dayandırıblar, ortada bir dənə də olsun medal yoxdur.
İdmançılarımızın bu şəkildə ard-arda uduzması sözün həqiqi mənasında bizə mənfi təsir edir. Dövlət qayğısı ilə tam olaraq əhatə olunan milli komadamızın üzvlərinin biabırçı şəkildə uduzması bir sıra sualların meydana çıxmasına səbəb olur. İdmançılarımızın yarıdan çoxunun mübarizəni dayandırması tamaşaçılarımızı çox məyus edir. Amma indiyə qədər nə Gənclər və İdman Nazirliyi, nə Federasiyalar, nə də digər məsul şəxslər çıxıb vəziyyətlə, məğlubiyyətin səbəbləri ilə bağlı izahat vermək istəmir. Ortada hələ də bir dənə rəsmi açıqlama yoxdur ki, orada məğlubiyyətin səbəblərinə aydınlıq gətirilsin, izahat verilsin.
Ekspertlər deyir ki, bəzi idman rəsmiləri qeyri-rəsmi olaraq baş verənlərin səbəbini pandemiyada gördüklərini deyirlər. Başqa ölkələrdə pandemiya yox idi, təkcə bizdə var idi ki?
Gənclər və İdman Nazirliyi, nə Federasiyalar, nə də digər məsul şəxslər nə üçün indiyə qədər idmançılarımızın ard-arda düçar olduqları məğlubiyyətin səbəblərinə izah verməyiblər?
Aydın Bağırov: “Hansısa izahatların verilməsi artıq arxada qalan uğursuzluqları nə sığortalayacaq, nə də bizə medal gətirəcək”
Əməkdar jurnalist, Qol.az saytının baş redaktoru Aydın Bağırov “Bakı-Xəbər”ə bildirdi ki, indiyə qədər adları qeyd edilən rəsmi qurumlar tərəfindən məğlubiyyətin səbəblərinə ayrınlıq gətirilməməsi sırf texniki məsələdir: “Hansısa izahatların verilməsi artıq arxada qalan uğursuzluqları nə sığortalayacaq, nə də bizə medal gətirəcək. Deputat Rauf Əliyev məğlubiyyətin səbəblərini pandemiya ilə bağlayır. Amma məsələ burasındadır ki, pandemiya ilə üzləşən təkcə biz olmamışıq, olimiyadada iştirak edən hər bir ölkə pandemiya ilə üzləşib, o cümlədən də Azərbaycan komandası. Ümumiyyətlə gedişat göstərir ki, Azərbaycan milli komandasının bəzi növlər üzrə yaxşı hazırlıq keçirilməyib.
Məsələn, cüdo komandası yaxşı hazırlıq keçib, onlara şərait yaradılıb, amma indiyə qədər 9 idmançımızdan 6-sı uğurlu nəticə göstərə bilməyib, faktiki olaraq komanda medalsız qalıb. İdmançıların özünün hazırlığı ilə yanaşı psixoloji hazırlıqları da zəif olub. Orada baş məşqçi legonerdi, ukraynalıdır, onun da işi heç görünmür, burada problem var. Eyni zamanda boksda da eyni şeyləri görürük. Başqa idman növlərində də bunu müşahidə edirik. Bayaq qeyd etdiyim kimi problemin kökü bəzi idman növləri üçün hazırlığın yüksək səviyyədə olmamasında, bəzi idman növlərində isə hazırlıq yaxşı səviyydə olsa da, daxildə, federasiyada işlərin yaxşı qurulmaması ilə əlaqədardır”.
Amma bununla belə ümumi nəticəyə ümidsiz olmadığını deyən A.Bağırovun sözlərinə görə, hesab edir ki, medalımız olacaq, amma bu medalın qızıl olub olmayacağı sual yaradır. “Buna getdikcə ümidlərim bir az azalır. Çünki bizim həmişə qızıl medala ümidimiz güləş komandalarına, yunan-roma və sərbəst güləş komandalarına olub. Olimpiya oyunlarına qədər də, bu ilki və keçən ilki yarışlarda həmin növlər üzrə nəticələrdə ciddi problemlər olub. O nəticələr də ki, hələlik olimpiya oyunlarında qızıl qazanmağa ümid vermir...”
Azər Həsrət: “Bu uğursuzluğun səbəblərini izah etmək rəsmi qurumlar üçün asan məsələ deyil, amma izah verilməlidir”
Siyasi şərhçi Azər Həsrətin fikrincə, uğura sahib olan çox olar, uğursuzluq yetim olar. “Azərbaycan idmançıları Tokio Olimpiyadasında ard-arda uğursuzluqlara düçar olublar. Təbii ki, bu uğursuzluğun səbəblərini izah etmək rəsmi qurumlar üçün asan məsələ deyil, amma izah verilməlidir. Yəni milli komandamızın əvvəlki olimpiyadalarda iştirakını nəzərə alsaq və hər yeni olimpiyadada Azərbaycan idmançılarının daha artıq medal qazandığını xatırlasaq, əlbəttə indi çox acınacaqlı durumdayıq. Ona görə də, sizin sualınıza cavab verəcək bir təmsilçi tapa bilmirsiniz. Yəni nə deyəcəklər, nəyi izah edəcəklər, məğlubiyyətlərin səbəbini necə əsaslandıracaqlar? Bu suallara cavab vermək asan deyil. Pandemiya təkcə bizdə deyil ki, dünyanın hər yerində var, dünyanın hər yerində də idmana və idmançılara təsirini göstərib. Heç kim onu bəhanə etməməlidir. İkinci bir tərəfdən Gənclər və İdman Nazirlər Nazirliyində əvvəllər Səmayə Məmmədova ictimaiyyətlə əlaqələr şöbəsində idi, mətbuatla işləyirdi, onu istənilən saatda tapmaq və açıqlama almaq olurdu. Amma açığı bilmirəm indi Gənclər və İdman Nazirliyində bu işlərlə kim məşğul olur. Yəni həlilik tanımırıq, tanımırıqsa onun necə işləməsi ilə bağlı fikir bildirə bilmərik. İdman federasiyalarına gəlincə, əlbəttə onlar özləri açıqlama verməlidirlər ki, niyə bu uğursuzluqlar ard-arda gəlir, niyə Azərbaycan idmançıları heç bir uğur qazana bilmir. Yəni bunun izahı verilməlidir”.
A.Həsrət eyni zamanda bildirdi ki, milli komandadakı legionerlərdən imtina etmək lazımdı, Azərbaycan Kubadan, başqa ölkələrdən idmançıları cəlb edir, onlara vətəndaşlıq verib bizim milli komandanın tərkibində yarışlara göndərir: “Legionerlər bizim nəyimizə lazımdır? Biz azərbaycanlı idmançı yetişdirməliyik. Yəni uşaqlıqdan insanlarımızı idmana alışdırmalıyıq və gedib bu cür yarışlarda Azərbaycan adından çıxış etməsini təmin etməliyik. Təəssüflər olsun ki, bir çox idman növündə Azərbaycan adına Azərbaycana dəxli olmayan adamlar çıxış edir. Bu da ondan xəbər verir ki, ortada yeyinti var. Çünki legionerlərlə müqavilə bağlanılır, onlara külli miqdarda pul ödənilir, yəqin ki, ortalıqda bir sövdələşmə də olur. Ona görə bizimkilər xarici idmançılara bu qədər həvəs göstərirlər. Mənə elə gəlir ki, Azərbaycan dövləti artıq o legionerlər söhbətini birdəfəlik qapatmalıdır. Azərbaycanlı yetişdirə bilmiriksə heç o yarışlarda iştirak etməyək. Mənim nəyimə lazımdır ki, kubalı gəlib Azərbaycanın adından iştirak edir, günün birində də öz ölkəsinə gedəcək. Onun bizim millətimizə nə dəxli var, millətimizin sağlamlığının inkişafına nə dəxli var. Heç bir dəxli yoxdur...İzaha gəlincə, izah vermək çətindi”-deyə A.Həsrət qeyd etdi.
Məsələ ilə bağlı Gənclər və İdman Nazirliyinin ictimaiyyətlə əlaqələr şöbəsinin təmsilçisi Qabil Mehdiyev Tokioda olduğu üçün nazirliyin mövqeyini öyrənə bilmədik.
İradə SARIYEVA
