Məlum olduğu kimi, Yaponiyanın paytaxtı Tokioda keçirilən 32-ci Yay Olimpiya Oyunları davam edir. İyulun 23-də başlanan oyunlar avqustun 8-də başa çatacaq. Dünyanın ən böyük idman yarışına 206 ölkəni təmsil edən 11 mindən çox idmançı qatılıb. Onlar 339 olimpiya medalı uğrunda yarışacaqlar. Budəfəki oyunların proqramına toplam 33 idman növü daxildir. Beysbol/softbol, karate, skeytbordinq, qayayadırmanma və sörfinq ilk dəfə olimpiya proqramına salınıb.
Azərbaycan komandası Tokioda keçirilən yarışlarda 44 idmançı ilə təmsil olunur. Bu göstərici 2004-cü ildə Afinada keçirilən yarışlardan bəri ən aşağı nəticədir. Eyni zamanda Tokio Olimpiyadası ilk yarışdır ki, Azərbaycanı təmsil edən idmançıların sayı əvvəlki olimpiya oyunlarıyla müqayisədə azalıb. Azərbaycanı təmsil edən 44 idmançının 28 nəfəri kişi, 16 nəfəri qadındır. Burada diqqəti çəkən məqam odur ki, Tokioda Azərbaycanı təmsil edən idmançıların az qala yarısı legionerdir (20 nəfər). Belə ki, olimpiya oyunlarına vəsiqə qazanan 44 idmançıdan 20-si sonradan Azərbaycan vətəndaşlığına keçən legioner idmançılardır.
O da məlumdur ki, idmana bir belə vəsaitlər yönəldilir, olimpiya mərkəzlərinin sayı 48-ə çatıb və s. O zaman niyə yetərincə dünya səviyyəli olimpiya oyunlarına milli idmançılar yetişdirilmir?
“İdman sahəsində idarəçilik dəyişməsə, yeni kadrlar işə cəlb olunmasa vəziyyət elə belə də davam edəcək”
Sözügedən məsələyə aydınlıq gətirən idman eksperti Cavid Zamanov bunun səbəbini bir sıra amillərlə əlaqələndirdi: “Əvvəla, legionerləri əsasən federasiyalar dəvət edir. İşləri asan olsun deyə bu addımı atırlar. Ancaq bir sıra hallarda bu, yaxşı nəticə vermir. Legionerlər milli idmançılar qədər olimpiya oyunlarında fədakarlıq göstərmirlər. Digər tərəfdən, idman sahəsində işlərin təşkil olunması arzuolunan səviyyədə deyil. Son ilər həqiqətən də dövlət vəsaiti hesabına boyük idman infrastrukturları yaradılıb. Bunuları danmaq olmaz. Ancaq gəlin görək həmin infrastrukturdan yetərincə doğru-düzgün istifadə edilirmi? Təəssüflər olsun ki, yox. İdmanın inkişafına ayrılan vəsaitlər səmərəli xərclənmir. Görürsən ki, daha bacarıqlı və perspektivi olan idmançılar hansısa mərhələdə kənarda qalır, tanışı olanlar önə çəkilir. Təəssüflər olsun ki, belə hallar da var. Ona görə də bu sahəyə baxış, idarəçilik köklü şəkildə dəyişməlidir. İdman sahəsində idarəçilik dəyişməsə, yeni kadrlar işə cəlb olunmasa vəziyyət elə belə də davam edəcək. Biz yenə də legionerlərin ümidinə qalacağıq. Ona görə də idmanın inkişafı ilə bağlı sistemli və əhatəli bir proqram hazırlanmalıdır. Yoxsa, bu kimi problemlər hələ qalacaq”.
Ekspertin açıqlamasından belə məlum oldu ki, çoxsaylı görüləsi işlər var.
Vidadi ORDAHALLI
