Azərbaycan millisinin Tokio olimpiadasında zəif çıxışının səbəbləri…

Kənan Məstəliyev: “İdmanın idarəetmə sistemində də ciddi islahatlara ehtiyac var”

img

Tokioda keçirilən "2020-ci il Yay Olimpiya Oyunları"da Azərbaycanın milli komandası da iştirak edir. Təəssüflər olsun ki, idmançılarımızın nəticələri ürəkaçan deyil, taekvondoçularımızın məğlubiyyəti doğurudan da təəssüf doğurur.

Fəridə Əzizovanın uduzması azmış kimi, Milad Beiqi Hərçəqani də dörddəbir finalda rəqibinə məğlub olub. Boksçularımızın da, digər idman sahələrimizdəki təmsilçilərimizin də vəziyyəti haqqında hələ ki, müsbət fikir bildirməkdə çətinlik çəkirik. Azərbaycan milli komandasının "Tokio 2020"-də bu cür zəif iştirakının səbəbi nədir, pandemiya, yoxsa səhlənkarlıq?

Bir məsələni də qeyd edək ki, pandemiya bütün dünyada mövcuddur, amma heç bir ölkənin komandası bizim komanda üzvləri kimi zəif iştirak etmir...

Çox ehtimal ki, bizim baş məşqçilər mütləq şəkildə məğlubiyyətin səbəbini pandemiya ilə izah etməyə çalışacaqlar, amma dediyim kimi pandemiya hər yerdə var.

Tanınmış idman mütəxəssisi Kənan Məstəliyev “Bakı-Xəbər”ə açıqlamasında bildirdi ki, olimpiada baş  verən uğursuzluqların bir neçə səbəbi var: “Vaxtilə ön planda olan  idman hazırda arxa plana keçib. Belə düşünülür ki, daha vacib sahələrə  diqqət yetirilməlidir. Prioritet diqqət sırasından çıxan idman hazırda öz gücünə inkişaf edir. Hələ də ölkədə  uşaq idman strukturu düzgün qurulmayıb. Təhsil idmana, idman təhsilə inteqrasiya edilməyib. Olan infrastrukturlardan düzgün istifadə olunmur. Adam başına düşən Olimpiya Komplekslərinin sayını hesablasaq, bəlkə də dünyada birinci yerdəyik, ancaq həmin potensialdan düzgün istifadə edilmir. Mərkəzlər lazımsız binalar kimi görünür. Bütün idman növlərində idmançı bolluğuna rast gəlmirik.  İdmanın idarəetmə sistemində də ciddi islahatlara ehtiyac var. Çünki bu günə qədər həyata keçirilən işlərin mexanizmi işləmir. Yeni kadrlar gəlməlidir, idmana baxış bucağı yenilənməlidir. Ortaya yeni inkişaf strategiyası qoyulmalıdır. Pandemiyanın da bu işə ciddi zəbəsi oldu. İdam zalları vaxtında açılmadı. Olimpiadanın ilk günündə  nəticələr gözlənilən idi. Bizim medal ümidimiz sayılan idmançılar yarışa qoşulmurdular. Bizim üzgüçülük, velosiped, stend atıcılığında çempionluğa iddia etməyimiz doğru olmaz. Boksda Cavid Çələbiyevə, cüdoda  Rüstəm Orucova ümid vardı. Qarşıda güclü idmançılarımız var ki, onlara medal ümidimiz var.  Xüsusilə də güləşçilərimiz bu ümidləri doğrulda bilər. Düşünürəm ki, əvvəlki nəticələri əldə edə bilməyəcəyimiz daha real görünür. Ola bilər ki, nəticələrimiz olacaq. Hətta qızıl və gümüş da qazana bilərik. Ümumi nəticə isə qənaətbəxş deyil”.

Məhəmmədəli QƏRİBLİ

Son xəbərlər