“Məlum problemin həll olunması iqtisadiyyatın canlanmasına, əhalinin kreditlərə yönəlməsinin asanlaşmasına, iqtisadiyyata kreditlər vasitəsilə daha çox vəsaitin daxil olmasına şərait yaradacaq”
“Azərbaycanda fiziki şəxslərin problemli kreditlərlə bağlı məsələsinin həll edilməsi həm də ölkənin bank sektorunda dəstəkdir. Sektor prezidentin son fərmanından ikiqat qazanacaq”. Bunu Azərbaycan Mərkəzi Bankının sədri Elman Rüstəmov yerli telekanallardan birinə müsahibəsində bildirib. E.Rüstəmov qeyd edib ki, məlum fərman bir tərəfdən bankları sağlamlaşdıracaq, xüsusilə onlar kapital baxımından ciddi dəstək alacaq, aktivlərindəki problemli hissəni azaldacaq, digər tərəfdən uzunmüddətli kreditləşmə üçün ucuz maliyyə resursları əldə edəcəklər. Ekspertlərin fikrincə, Prezident İlham Əliyevin problemli kreditlərlə bağlı imzaladığı fərman fiziki şəxslərin problemini həll etməklə yanaşı, bank sektorunun sağlamlaşdırılmasına da səbəb olacaq. Millət vəkili Rüfət Quliyev bizimlə söhbətində qeyd etdi ki, son illər ölkənin sosial-iqtisadi sahəsində mühum islahatlar aparılır. Görülən hər bir işin nəticəsi müsbət sonluqla yekunlaşır: “Məlumdur ki, Prezident İlham Əliyev fiziki şəxslərin problemli kreditlərinin həlli ilə bağlı əlavə tədbirlər haqqında fərman imzalayıb. Əhalinin mövcud kreditlərlə bağlı üzləşdiyi problemin həllində Prezidentin imzaladığı Fərman onların sosial həyat şəraitində mühüm üstünlüklər yaradacaq. Həmçinin, Maliyyə Bazarlarına Nəzarət Palatasının müraciəti əsasında banklara 682 milyon manat məbləğinədək dövlət zəmanətinin təmin edilməsi üçün güzəştli kredit veriləcək. Yəni manatla qalan məbləğin ödənilməsi üçün banklar vətəndaşlara 5 il müddətinə illik 1 faiz olan kreditlər təklif edəcək. Devalvasiya nəticəsində yaranan fərq dövlət tərəfindən praktik olaraq qarşılanır, qalan hissəni isə vətəndaş 5 illik 1 faizlik kreditlə ödəyəcək. Fiziki şəxslərin problemli kreditlərlə bağlı probleminin həll olunması əhalinin maraqlarını təmin etməklə yanaşı, banklar da bundan qazanacaq. Nəzərə almaq lazımdır ki, problemli kreditlərin həlli ilə daha çox banklara yardım olunması gözlənir. Məlum problemin həll olunması iqtisadiyyatın canlanmasına, əhalinin kreditlərə yönəlməsinin asanlaşmasına, iqtisadiyyata kreditlər vasitəsilə daha çox vəsaitin daxil olmasına şərait yaradacaq”.
