Xocalı faciəsinin ildönümü, respublikanın hər yerində olduğu kimi, Bakının Nəsimi rayonunda da geniş şəkildə qeyd olunub.
Nəsimi rayon İcra Hakimiyyətindən “Bakı Xəbər”ə verilən məlumata görə, RİH tərəfindən hazırlanmış tədbirlər planına uyğun olaraq rayonun idarə və təşkilatlarında, mədəniyyət, orta və ali təhsil müəssisələrində faciənin ildönümü ilə bağlı xatirə gecələri, foto və rəsm sərgiləri, faciənin şahidləri ilə görüşlər təşkil olunub.
Tarixi həqiqətlərin daha yaxından öyrənilməsi, vaxtilə mənfur qonşularımız və onların havadarları tərəfindən törədilən fəlakətlərin faktlarla gənclərə çatdırılması məqsədilə Xocalı faciəsinin ildönümü ərəfəsində Nəsimi rayon İcra Hakimiyyəti tərəfindən rayonun orta məktəblərində oxuyan yuxarı sinif şagirdlərinin Azərbaycan Respublikası Hərbi Prokurorluğunun inzibati binasında yaradılmış Memorial Soyqırım Muzeyinə ekskursiyaları, «Ana harayı» abidəsinə ziyarəti təşkil edilib.
Faciənin ildönümü ərəfəsində Kliniki Tibbi Mərkəzdə Xocalı şəhərindən köçkün düşərək Nəsimi rayonunda məskunlaşmış bir qrup Xocalı nümayəndəsi ilə görüş keçirilib. Tədbirdə Kliniki Tibbi Mərkəzin baş həkiminin müavini Məhəbbət İbrahimova çıxış edərək, Azərbaycan xalqının qan yaddaşı olan Xocalı faciəsi, ermənilərin zaman-zaman xalqımıza qarşı törətdiyi vəhşiliklər və Xocalı soyqırımı ilə bağlı həqiqətlərin dünya ictimayiyyətinin nəzərinə çatdırılması üçün görülməsi vacib olan işlər barədə məlumat verib. Tədbirdə iştirak edən Nəsimi rayon İcra Hakimiyyəti başçısının birinci müavini Gülarə Verdiyeva Prezident İlham Əliyevin qaçqın və məcburi köçkünlərə, xüsusilə Xocalılara olan diqqət və qayğısından ətraflı bəhs edərək, Nəsimi rayonunda Xocalı faciəsinin 27-ci ildönümünə həsr edilmiş tədbirlər haqqında məlumat verib.
Görüşdən sonra Nəsimi rayonu ərazisində məskunlaşmış Xocalı sakinlərinin Kliniki Tibbi Mərkəzdə pulsuz tibbi müayinələri təşkil olunub. Tibb müəssisəsində Xocalılar əvvəlcə terapevtlər tərəfindən, sonra isə ehtiyaca uyğun olaraq ixisaslı həkimlərin iştirakı ilə rentgen, kardioqram, ultrasəs və diğər müayinələrdən keçirilib. Xocalı sakinlərinin ailələrində olan azyaşlı uşaqlar da ixtisaslı uşaq həkimləri tərəfindən müayinə olunub.
Xocalı soyqırımının 27-ci ildönümü ilə bağlı Nəsimi rayonu 1 nömrəli tam orta məktəbdə isə H.Sarabski adına Mədəniyyət Evi kollektivinin ifasında Xocalı soyqırımı ilə bağlı ədəbi-bədii kompozisiya nümayiş etdirilib.
Həmçinin, faciənin ildönümü ərəfəsində Azərbaycan Dövlət Akademik Filarmoniyasının Kamera və Orqan musiqisi zalında Üzeyir Hacıbəyli adına Bakı Musiqi Akademiyası tərəfindən Xocalı şəhidlərinin əziz xatirəsinə həsr edilmiş Orqan konserti təşkil edilib. Konsertdə R.Ramazanovun “And”, Q.Qarayevin “Laylay”, A.Sandvollun “İntroduksiya və passakalya”, C.Perqolezinin “Stabat Mater”(“Hüzünlü ana”) əsərləri səsləndirilib.
Baki-xeber.com
