Ermənistanın Suriyaya hərbçi dəstəsi göndərməsi bu ölkənin həyatını dəyişməyi hədəfləyən “məxməri inqilab”ın sonunu gətirən addım oldu.
İrəvan bu addımı atmaqla hər iki tərəfə oynamağı hədəfləsə də, Rusiya ilə əvvəlki münasibəti bərpa etməməsi bir yana, üstəlik, Vaşinqtonun da səbrini daşırdı. Bu ölkənin “Hraparak” qəzeti mövzuya həsr etdiyi yazısında göstərir ki, çoxdandır hazırlığı aparılan və erməni tərəfinin böyük nəticələr gözlədiyi XİN rəhbəri Mnatsakanyanın ABŞ səfərinin Vaşinqton tərəfindən təxirə salınması da elə Suriya addımının cavabı oldu və Paşinyanın xarici siyasətinin artıq fiaskoya uğradığını göstərdi. Qəzet yazır ki, Vaşinqtonun həmin qərarı verməsində Paşinyanla Bolton arasında baş tutan telefon görüşməsinin böyük rolu olub. Belə ki, Bolton erməni baş nazirdən Suriyaya hərbçi göndərilməsi məsələsinin onun son qərarı olub-olmadığını soruşub və Paşinyan qərarının qəti olduğunu deyib. Boltonun məsələni lazımi kanallara ötürməsilə isə Paşinyana qırmızı vəsiqə göstərilib.
Əslində “erməni humanitar missiyasının” Suriyaya göndərilməsi məsələsinin ölkənin özündə də böyük narazılıqla qarşılandığını yazan qəzet bildirir ki, Paşinyanı bu məsələdə nəinki Respublika partiyasındakı siyasi opponentləri olan şəxslər, hətta mülayim müxalifət belə tənqid etdi. Hər kəsin isə arqumenti bu idi ki, Əsədin getməsini istəyən Vaşinqton ona humanitar yardım göndərilməsinə nəinki pis baxacaq, hətta bu addıma görə İrəvanı cəzalandıra da bilər. Üstəlik onu da unutmaq olmaz ki, Rusiya və İran istisna olmaqla, bütün dünya ölkələri Əsədin getməsi mövzusunda Vaşinqtonun yanındadır, adıçəkilən iki ölkə isə onun ən qatı düşmənidir.
Qəzet yazır ki, əslində Paşinyanın Rusiyanın təzyiqi qarşısında duruş gətirə bilmədiyi üçün Suriya məsələsində onunla həmrəylik göstərdiyi bəllidir və o, eyni zamanda, sözügedən missiyanı göndərməklə Rusiya siyasi elitasında artmaqda olan antierməni ovqatın da yumşalmasına nail olmağı hədəfləyib. Lakin aydındır ki, bir tərəfi düşünərkən digər tərəfin – Vaşinqtonun reaksiyasını düzgün qiymətləndirə bilməyib və nəticədə onun tərs şapalağı ilə üzləşməli olub. Halbuki, belə vəziyyətlərdə ən sınanmış yol neytrallığı qorumaqdır. Qəzetin versiyasına görə, artıq erməni icmasının demək olar qalmadığı bu ölkəyə humanitar yardımın göndərilməsinin yalnız bir səbəbi ola bilər ki, o da Rusiyanın Qarabağ məsələsində son zamanlar Azərbaycanın tərəfində durmasını aşkar göstərməsidir. Yəni Qarabağın əldən gedəcəyini və özünün tarixdə məhz Qarabağı verən baş nazir olaraq qalacağını anlayan Paşinyan Moskvanın istəyinə uyğun addım atmaqla vəziyyəti ölkəsinin xeyrinə dəyişməyi hədəfləyib, nəticədə “Vəli aşından da olub”. İndi bir çox erməni politoloqları da etiraf edir ki, Paşinyan elə özünün hazırladığı tələyə düşüb. Belə ki, populist şüarlarla sadə insanların könlünü alıb hakimiyyətə gələn Paşinyan indi verdiyi vədlərin girovuna çevrilib, öncə şəxsi məqsədlərinin arxasınca gedərək ölkəsinin KTMT-da Baş katib postunu itirməsinə səbəb olub, ardınca da bütün KTMT üzvü ölkələrlə düşmən mövqeyə gəlib. İndi isə Moskvanın xoşuna gəlməkdən ötrü Vaşinqtonun etibarını itirib. Beləliklə də onun iki stulda oturmaq cəhdi fiasko ilə nəticələnib.
İndi qəzeti bir sual maraqlandırır: populist çıxışlarla hakimiyyətə gələn birisindən daha nə gözləmək olar? Axı, Vaşinqtonun qırmızı vəsiqə göstərməsi o deməkdir ki, sən artıq qırmızı xətti keçmisən! Vaşinqton isə bu xətti keçməyi heç kəsə bağışlamır və bunun Ermənistan üçün faciəli nəticələri özünü çox gözlətməyə də bilər...
SAMİRƏ
