“Bura ölkəyə ayrılan maliyyə vəsaitlərinin azaldılması və yaxud tamamilə kəsilməsi də daxildir”
“Birləmiş Ştatlar Suriyada Rusiyanın rəhbərlik etdiyi missiyada iştirak etdiyi üçün Ermənistanı qınayır” Belə ki, “Eurasianet” nəşri Ermənistanın Suriyaya hərbi heyət göndərməsinə toxunaraq qeyd edib ki, Rusiyanın rəhbərlik etdiyi missiya çərçivəsində Suriyaya minatəmizləyənlərin və həkimlərin göndərilməsində iştirak etdiyi üçün Ermənistan ABŞ tərəfinin kəskin danlağına məruz qalıb. “Erməni mütəxəssislərin suriyaya göndərilməsi yeni hökumətin hakimiyyətə gəlməsindən sonra Moskva ilə gərginləşən əlaqələrin möhkəmləndirilməsinə sadəcə cəhddir”,- deyilən məqalədə o da bildirilir ki, hərbi heyətin Suriyaya göndərilməsindən bir neçə gün sonra ABŞ-ın Ermənistan səfirliyi Suriya silahlı qüvvələrinə nümayiş etdirilən hər hansı dəstəyə tərəfdar olmadıqlarını dilə gətirərək bu hadisəni qınayıb. “Tramp adminsitrasiyası Suriya münaqişəsi işində ABŞ-ın iştirakı ilə bağlı anlaşılmaz işarələr nümayiş etdirir. Vaşinqton Əsəd hökumətinə qarşı güclü müxalifət mövqeyini saxlayır və bu kontekstdə erməni mütəxəssislərin cəlb olunmasını müşahidə edir”,- deyə Suriya münaqişəsi məsələsi ətrafında çalışan Beynəlxalq Böhran Qrupunun Baş analitiki Sem Heller bildirib. Bu arada Suriyaya humanitar dəstə adı altında hərbçi göndərməsinə ABŞ Dövlət Departamentinin göstərdiyi reaksiyanı təhlil edən Rusiyanın «Nezavisimaya qazeta»sı, buna cavab olaraq, Vaşinqtonun Ermənistana yardım göstərməkdən imtina edə biləcəyini də istisna etməyib: “Ermənistan rəhbərliyi ölkədə iqtisadi islahatların həyata keçirilməsi üçün xaricdən göndəriləcək zəruri maliyyə yardımına artıq ümid etməyə bilər. Ən yaxşı halda isə bu ianə yarıya qədər azaldıla bilər». Bütün bunlar ABŞ-dan Ermənistana edilən yardımların kəsiləcəyi ehtimalını artırıb. O baxımdan bunu ekspertlər necə dəyərləndirir? Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə aspektdən yanaşdı: “Ermənistanın Rusiyanın diqtəsilə Suriyaya hərbçi göndərməsi Paşinyanın hakimiyyətə gəlməsinə zəmin yaradan Vaşinqton tərəfindən müsbət qarşılnamayacaq. Artıq bu bəlli bir reallıqdır. İlk növbədə Ermənistan rəhbərliyi ABŞ-la razılaşmaları pozaraq Rusiya ilə yaxınlaşmaq kursu götürüb. Təbii ki, Boltonun regioina səfəri çərçivəsində İrəvanda Paşinyana verdiyi mesajların hesabatı istəniləcək. Hesab edirəm, artıq Vaşinqton da başa düşür ki, Rusiyanın forpostu olan bu ölkəni Moskvanın orbitindən çıxarmaq çətin olacaq. Məhz Paşinyan öz hakimiyətini qorumaq naminə Suriyaya hərbçi göndərdi. Vaşinqtonun Ermənistana təzyiqləri müxtəlif istiqamətdə olacaq. Bura ölkəyə ayrılan maliyyə vəsaitlərinin azaldılması və yaxud tamamilə kəsilməsi də daxildir. Bəli, Vaşinqton Ermənistana maliyyə yardımını kifayət qədər azaldacağı gözlənilir. Çünki Paşinyan ABŞ qarşısında götürdüyü öhdəlikləri pozursa, niyə də maliyyə ayrılmalıdır? Hətta Qarabağa humanitar adı ilə ayrılan vəsait də azaldılacaq. ABŞ Ermənistanda baş verənləri artıq gördü. Burada Moskva öz nəzarətini saxlmaqdadır. Vaşinqtonun bu inqilabdan gözləntiləri böyük idi. Paşinyan Vaşinqtona arxa çevirdi. O üzdən, ABŞ maliyyə yardımını kəsə də bilər”.
Vidadi ORDAHALLI
