Ölkəmizin çap mediasının bu günü və gələcəyi ilə bağlı müzakirələr yenidən başlayıb. Bütün səviyyələrdə müzakirələr gedir. Təbii ki ,əsasən də çap medianın bundan sonra da daha güclü olması və inkişaf etdirilməsi müzakirələrin əsas istiqamətini təşkil edir. “Bakı Xəbər” qəzetinin və eyniadlı saytın baş redaktoru Aydın Quliyevin bu barədə fikirləri ilə tanış oluruq.
-KİVDF-nin yeni maliyələşmə şərtlərini necə dəyərləndirirsiniz?
-Yeni şərtlər çoxdan gözlənilirdi, göydəndüşmə olmadı, həm ötən ilin yayında rəsmən deyilmişdi, həm də KİVDF-nin şərtlərində illərdən bəri gördüyümüz artımlar öz-özünə deyirdi ki, bir qədər də artırılmış yeni şərtlər olacaq. Ona görə şəxsən mən yeni şərtləri gözlənilməz qarşılamadım, əksinə, əvvəldən hətta buna hazırlıqlar da görürdük. Ümumən deyim ki,yeni şərtlər çap mediamızı yaxşı mənada yerindən oynatdı. Kimlərdəsə az da olsa arxayınlaşma, ətalətə düşmə əlamətləri var idisə də, yeni şərtlər təkan kimi bunları aradan qaldırdı. Hamı keçmişə baxdı, bugünkü vəziyyətini götür-qoy etdi, perspektiv barədə daha intensiv düşünməyə başladı. Yeni şərtlər çap mediamızın tarixində mərhələ başlatdı. Bunun başqa adı yoxdur. Çap medianın yeni dövrü başlayır. Kimlərin bu dövrün üstünküklərindən necə nəticələr çıxaracağını isə gələcək göstərər. Ancaq onu deyim ki, KİVDF-nin ötən mərhələdə dəstəyini səmərəli şəkildə yönəldə bilmiş qəzetlərin şansı yüksəkdir. Ancaq əlbəttə, yeni mərhələdə könüllü olaraq fəaliyyətini ancaq elektron qəzet kimi davam etdirmək seçimi edən qəzetlər də ola bilər. Onlar üçün də dövlətin maliyyə dəstəyi altında inkişafını davam etdirmək şansları var.
-"Bakı Xəbər” qəzeti ötən mərhələni necə keçdi, nələrə çata bildi?
-Birmənalı deyim ki, biz “Bakı Xəbər” olaraq KİVDF-nin dəstəyini döğrultduq və davamlı inkişaf yoluna düşə bildik. Hər dəfə KİVDF-nin, xüsusilə də çap tirajı və yayım səviyyəsi ilə bağlı yeni tələblərinə uyğunlaşa bildik. Bu gün də yeni şərtlər səviyyəsində fəaliyyət göstəririk. Bu illər ərzində kollektivimiz böyüdü, 7-8 nəfərdən bu gün 15 işçi sayınadək gəlib çatdıq, daha da böyümək haqda real planlarımız var, tək “Bakı Xəbər” qəzeti ilə kufayətlənmədik. Qəzetin saytını onlayn rejimdə yenilənən səviyyəyə çatdırdıq, saytın güçünü artırdıq. Feysbuk və youtube kimi sosial şəbəkələrdə qəzetin səhifələrini yaratdıq, saytın mobil versiyasını yaratdıq. Qəzetin mühasibat-uçot sistemi, pensiya-vergi ödənişləri, ümumiyyətlə gargüzarlıq işləri ideal səviyyədə qurulub.
2016-cı ildə “Bakı Xəbər”in yanında "Nurman - xəbər agentliyi MMC" adlı yeni media qurumu təsis etdik, qeydiyyatdan keçirdik, bank rekvizitlərini və saytını yaratdıq, ilyarım aktiv fəaliyyət göstərdi, onun da fəaliyyətini yenidən canlandlrmaq fikrindəyik. Başqa planlarımız da var. Yeni mərhələdə davamlı fəaliyyətimizi təmin edə bilsək, bu işlərin hamısını görəcəyik. Bizim kollektivimiz stabildir, böyük təcrübəyə malikdir, illərin sınaqlarından keçib və hər cür vəzifənin öhdəsindən gələ bilər. Azərbaycanda qəzetlər çox olub, indi də az deyil. Ancaq özünəməxsus fərqli bir iş üslubu, idarəçilik və yaradıcılıq mühiti, sağlam daxili münasibətlər baxımından məktəb yarada bilmiş qəzetlər çox deyil. Belə qəzetlər çap mediamızın tarixi üçün dəyərlidir.
Bu illər ərzində “Bakı Xəbər” yüksək peşəkarlıq prinsipi üstündə dövlətçilik və vətənpərvərlik mövqeyini daha da gücləndirdi . “Bakı Xəbər” Azərbaycanda siyasi partiyalı mövqedən müstəqil və dövlətçilik mövqeyinə uğurla keçid etmiş ilk qəzet nümunəsi kimi də özünü doğrulda bildi. 2007-ci ildə siyasi partiyalı mövqedən müstəqil mövqeyə keçid edəndə bəziləri bizə inamsız yanaşdı, bunun uğurlu olmayacağını düşündü. Ancaq biz kollektivlə birlikdə inandıq. Hətta o zaman bir müsahibəmdə başqalarına da perspektiv göstərdim, dedim ki, bu gün bu yolu biz ilk olaraq gedirik, sabah partiyalı mövqedən imtina edən yeni media orqanları olacaq. Belə də oldu. Bizim partiyalı mövqedən müstəqil mətbuat mövqeyinə keçməyimizlə Azərbaycanda mətbuata dövlət dəstəyi mexanizminin tətbiqi arasında ilyarım vaxt keçdi. Zaman “Bakı Xəbər”- çilərin və bizim yolumuzla şeçim edənlərin bu keçidlə haqlı olduqlarını sübut etdi.
İradə SARIYEVA
