Azərbaycanın öz geosiyasi üstünlüklərini həlledici real faktora çox bacarıqla çevirə bildiyini Prezident İlham Əliyev bütün Rusiyanın və Moskvanın Patriarxı Kirillə görüşündə bir daha ifadə etdi. Azərbaycanın geosiyasi üstünlükləri və daxili resursları birlikdə güclü faktor kimi həm regional, həm də kontinental miqyasda özünü göstərir.
Bu fikirləri baki-xeber.com-a politoloq Aydın Quliyev deyib. Onun sözlərinə görə, görüşdə Rusiya-Azərbaycan münasibətlərinin bütün palitrasında müsbət dinamikanın fasiləsiz müşahidə edildiyini bildirən Prezident bu münasibətlərin bütün regionun taleyində mühüm rol oynadığına diqqət çəkdi:”Çox sərrast formada bildirildi ki, ölkələrimiz arasında qarşılıqlı etimad prezidentlərdən başlamış adi insanlaradək çox yüksək səviyyədədir. Prezident əsaslı olaraq belə bir qənaətini də bildirdi ki, bu münasibətlərin inkişafı bütün regionda, Qafqazda sulhün möhkəmlənməsinə öz təsirini göstərir. Azərbaycan-Rusiya münasibətlərini bütün qonşular üçün nümunə adlandıran Azərbaycan Prezidenti əslində bununla regionda sülh və təhlükəsizliyin hansı əməkdaşlıq tandeminin üstündə dayandığını göstərdi. Bu mənada, Prezidentin patriarx Kirillə dediyi sözləri Qafqazda sabitliyi pozmaq planları üstündə işləyən qüvvələrə aydın bir mesaj kimi də qəbul etmək lazımdır. Həqiqətən də, nə qədər ki, Azərbaycan-Rusiya münasibətləri dərinləşən xətt boyunca inkişaf edir, Qafqaz regionunda sülh və inkişafın təminat altında olduğuna şübhə yoxdur. Bu faktorun, hətta regionda Ermənistanın təcavüzkarlığı kimi bir təhlükə mənbəyini də aradan qaldırmaq gücünə malik olduğunu heç kim inkar etmir. Dağlıq Qarabağ münaqişəsinin həllində Rusiyanın həlledici imkanlara malik olmasına əsaslı ümidlər məhz buradan doğur. Rusiya -Azərbaycan münasibətlərinin indiki səviyyəyə çatmasında hər iki dövlətin və ilk növbədə prezidentlərin müstəsna rola malik olduqlarına şübhə yoxdur. Unutmayaq ki, münasibətlər heç də həmişə indiki kimi yüksək səviyyədə olmayıb, hətta keçmişlərdə münasibətlərdə böhranların yaşandığı anlar da olub və bu çətin mərhələlər qarşılıqlı səylərlə zaman-zaman aradan qaldırılıb. Xüsusilə Prezident İlham Əliyevin bu əməkdaşlıqda Azərbaycanın geosiyasi üstünlüklərini real təsir vasitələrinə çevirməkdə səyləri əvəzsizdir. Bir anlığa təsəvvür etmək olar ki, Azərbaycan-Rusiya münasibətləri gərginlik və ya qeyri-müəyyənlik içindədir. Bu halda regionumuzun ümumi təhlükəsizlik və daxili münasibətlər baxımından hansı vəziyyətdə ola biləcəyini düşünmək belə dəhşətlidir. Rusiya-Gürcüstan, Rusiya-Ermənistan, Rusiya-İran, Rusiya-Mərkəzi Asiya dövlətləri arasında münasibətlərin heç biri bunun qədər regionumuzun taleyində dəyişdirici gücə malik deyil. Azərbaycanla Rusiyanın yaxınlığı regionumuzda başqa hər hansı ikitərəfli münasibətlərdəki neqativ təzahürlərin təsirlərini neytrallaşdıra bilir və bilər. Rusiya-Gürcüstan, Rusiya-Ermənistan mübasibətlərindəki soyuqluqla regionumuz o qədər də çox şey itirmir. Ancaq Azərbaycanla münasibətlər tam başqa məsələdir. Rusiya ilə indiki kimi yüksək münasibətlərin həlledici rolunu görmək və buna nail olmaq Azərbaycan Prezidentinin geosiyasi tapıntısı adlandırıla bilər”.
Aydın Quliyev əlavə edib ki, bu səviyyə öz-özünə əldə olunmayıb, böyük səylərin hesabına başa gəlib:”Azərbaycanın nəqliyyat, tranzit, logistika və enerji imkanları yetərincə üzə çıxarılmasaydı, regiondakı bütün əməkdaşlıq tandemlərinin həlledici partnyorlarından birinə çevrilə bilməzdi. Hətta Ermənistan kimi regionda əhəmiyyətsiz bir ölkəyə çevrilər, "Azərbaycan kimə lazımdır" kimi məntiqli sual ortaya çıxardı. Azərbaycanın geosiyasi üstünlüklərinin real təsir faktorlarına çevrilə bilməsi sayəsində ölkəmiz regionun ən gərəkli ölkəsi halına gəldi. Azərbaycanın daxili resurslarını və geosiyasi üstünlüklərini birləşdirmək Prezidentin kontinental miqyaslı layihəsidir və ölkəni güclü dövlətə çevirən əsas şərtdir”.
