“Prezidentin xidməti maşınların qeydiyyatı ilə imzaladığı fərman bu sahədə yaşanan xoşagəlməz halları aradan qaldırcaq”
Məlum olduğu kimi, Prezident İlham Əliyev idarəetmə strukturlarında geniş miqyaslı islahatlar başladıb. Bu islahatlar çərçivəsində bəzi dövlət strukturları ləğv edilir, yaxud digərlərinə birləşdirilir. Ləğv edilən bir neçə dövlət strukturunun əsasında yeni, vahid struktur yaradılır. Struktur islahatlarına dair növbəti fərman imzalanıb.
Fərmanda yer alan mühüm bəndlərdən biri də bundan ibarətdir ki, prezident dövlət strukturlarında xidməti avtomobillə təchiz edilən məmurların siyahısına yenidən baxılmasını tapşırır.
Belə ki, fərmana əsasən müəyyən olunacaq siyahıdan kənarda qalan vəzifələrdə işləyən şəxslərə xidmət edən xidməti nəqliyyat vasitələrinin mərkəzi və yerli icra hakimiyyəti orqanlarının, dövlət adından yaradılan publik hüquqi şəxslərin və səhmlərinin (paylarının) nəzarət zərfi dövlətə məxsus olan hüquqi şəxslərin balanslarından çıxarılaraq özəlləşdirilməsi üçün Azərbaycan Respublikasının Əmlak Məsələləri Dövlət Komitəsinə təqdim edilməsi təmin edilməlidir. Və nəticəsi barədə prezidentə məlumat verilməlidir.
Prezident İlham Əliyevin xidməti maşınların qeyfiyyatı barədə imzaladığı fərmanının əhəmiyyəti danışan Milli İnternet Forumunun prezidenti, ekspert Osman Gündüz bizimlə söhbətində qeyd etdi ki, Prezidentin xidməti maşınların qeydiyyatı ilə imzaladığı fərman bu sahədə yaşanan xoşagəlməz halları aradan qaldırcaq. Onun sözlərinə görə, fərmanda maraqlı bir neçə məqam var: “Fərmana əsasən Nazirlər Kabineti bir ay müddətində bütün dövlət qurumu və dövlət şirkətlərində, hətta publik qurumlarda xidməti avtomobil ilə təmin edilməli olan bütün vəzifələrin siyahısını hazırlamalıdır. Bu yeni siyahıdan kənar olan bütün xidməti maşınlar Fərmanın tələbinə əsasən dərhal özəlləşdirilməyə çıxarılmalıdır.
Məlumat üçün bildirim ki, bir neçə gün öncə bəzi dövlət qurumları dəyəri 100 000 mindən yüksək olan bir neçə avtomobil alıb. Hətta bu günlərdə daha bir publik qurum da 1.4 milyona bir neçə maşın alıb. Fərman tam doğru yanaşmadır, gözləmək olar ki, yaxın 2-3 ayda özəlləşdirməyə xeyli komfort maşınlar çıxarılacaq”.
Günel CƏLİLOVA
