“Əhali şayiə yayanlara deyil, dövlət qurumlarına inanır”
Məlum olduğu kimi, Ekologiya və Təbii Sərvətlər Nazirliyinin müvafiq qurumlarının respublika ərazisində, xüsusən də paytaxt Bakıda, eləcə də Abşeron yarımadasında hava şəraitinin kəskin dəyişəcəyi və küləyin sürətinin ifrat həddə çatacağı ilə bağlı əhaliyə xəbərdarlıq etməsi olduqca müsbət bir haldır. Nazirliyin Milli Hidrometeorologiya Departamenti yağış, sulu qar və qar yağacağını da proqnozlaşdırmışdı. Ölkədə xoşagəlməz təbii hadisə ilə bağlı əhalinin təhlükəsizliyinin təmin edilməsi üçün bütün əlaqədar dövlət qurumları gücləndirilmiş iş rejiminə keçdi. Dövlət ölkə əhalisinin təhlükəsizliyinin təmin edilməsi üçün bütün vacib tədbirləri həyata keçirib. Bu məsələ tam olaraq dövlət nəzarətindədir. Əlaqədar qurumların təhlükəli hava şəraiti ilə bağlı əhali arasında güclü maarifləndirmə işləri həyata keçirməsinə baxmayaraq, sosial şəbəkələrdə, xüsusən də “WhatsApp”da əhalini əndişəyə, təşvişə salan səsli mesajlar yayıldı. Təxribatçı mesajlar vasitəsilə həm qadın, həm də kişi səsləri ilə əhaliyə müxtəlif “təhlükələr” barədə “xəbərdarlıqlar” səsləndi. Hədsiz dərəcədə həyəcanla səsləndirilən mesajlarda bildirilirdi ki, guya dövlət qurumlarının əhaliyə etdiyi xəbərdarlıq güclü küləklə, qarla, yağışla əlaqədar deyil, ölkəmizə külək vasitəsilə qonşu Gürcüstandan “donuz qripi” keçir. Başqa bir mesajda isə respublika ərazisində guya güclü zəlzələ baş verəcəyi “proqnozlaşdırılırdı”. Heç şübhəsiz ki, müəyyən təxribatçı qruplar tərəfindən yayılan bu mesajların əsası yoxdur. Onu da bildirək ki, artıq “WhatsApp” təxribatçılarının yaydıqları yalan məlumatlara Səhiyyə Nazirliyi və Seysmoloji Mərkəz tərəfindən tutarlı cavab verilib. Səhiyyə Nazirliyi Azərbaycanda “donuz qripi” təhlükəsinin olmadığını, Seysmoloji Mərkəz isə zəlzələ gözlənilmədiyini bildirib.
Sosial şəbəkələr, eləcə də əhalinin ən çox istifdə etdiyi “WhatsApp” vasitəsilə həqiqətə uyğun olmayan məlumatlar yayan təxribatçı qruplara, şəxslərə qarşı nə kimi tədbirlər görülməlidir?
Azərbaycan və Rusiya Yazıçılar Birliklərinin üzvü, biologiya üzrə fəlsəfə doktoru, dosent Sadiq Qarayev “Bakı-Xəbər”ə bildirdi ki, sosial şəbəkələr vasitəsilə yayılan mesajlar təxribat törətməkdən başqa bir məqsəd güdmür. S.Qarayev bildirdi ki, Azərbaycan əhalisini bu kimi yalan məlumatlarla təşvişə salanlara qarşı həm ictimai qınaq olmalıdır, həm də hüquq-mühafizə orqanları tərəfindən həmin təxribatçıların şəxsiyyəti müəyyən edilərək onlar məsuliyyətə cəlb olunmalıdır. “Bu gün müəyyən insanların əhalini bu vasitələrlə təşvişə salması yolverilməzdir. Hesab edirəm ki, əhali belə təxribatçılara deyil, dövlət qurumlarına inanmalıdır. Əhali şayiə yayanlara deyil, dövlət qurumlarına inanır. Müxtəlif vasitələrlə təxribat yaratmaq istəyən insanlara qarşı həm ictimai qınaq olmalıdır, həm də hüquq-mühafizə orqanları onlarla bağlı tədbirlər görməlidir. Bu məsələ ilə bağlı təhlükəsizlik orqanlarının effektiv iş görməsi çox vacibdir”.
S.Qarayev bir mütəxəssis kimi bildirdi ki, Azərabaycanda “donuz qripi”nin yayılma təhlükəsi də yoxdur. O vurğuladı ki, bu qrip növü külək vasitəsilə deyil, insanların bir-birilə təması nəticəsində yayılır. “Bu da hamıya deyil, immuniteti zəif insanlara keçə bilər. “Donuz qripi”nin yayılmasının külək və yağıntı ilə əlaqəsi yoxdur. Yəni bu barədə yayılan məlum mesajlar təxribatdan başqa bir şey deyil. Zəlzələyə gəlincə, zəlzələ yer qabığının dərinliklərində, mənti qatında hərəkət, suxurların sınması, qaz yığıntılarının çoxalması səbəbindən baş verir ki, bu da küləklə, yağışla əlaqədar deyil. Həm də zəlzələnin baş verməsi dünyanın heç bir yerində elmi cəhətdən əvvəlcədən bilinmir. Yəni yayılan şayiələrin elmi baxımdan heç bir əsası yoxdur. Azərbaycan xalqı kifayət qədər ağıllı, müdrik, intellektli xalqdır. Bu cür təxribatçı mesajlara əhalinin çox hissəsi inanmır. Bu gün əhali dövlətə, dövlət qurumlarına inanır, bilir ki, dövlət hər zaman onun təhlükəsizliyini düşünür və bununla bağlı qabaqlayıcı tədbirlər görür” - deyə bildirən S.Qarayevin sözlərinə görə, həqiqətə uyğun olmayan informasiyaları yayanlar milli vətənpərvərlik, dövlətçilik hissindən, sevgisindən uzaq adamlardır. Belələrinin vətəndaş məsuliyyətindən uzaq olduğunu deyən S.Qarayev qeyd etdi ki, bu cür informasiya cəmiyyəti çaşdıra bilməz. “Belə ucuz, bayağı, əsassız informasiyalar cəmiyyəti çaşdıra bilməz. Vətəndaşlar dövlət qurumları tərəfindən mütəmadi olaraq maarifləndirilməli, rəsmi qurumlar düzgün informasiya verməlidirlər. Çünki şayiə informasiya az olan yerdə yayılır. Qaranlıq otaqda hər şeyin olmasını ehtimal etmək olar. Lakin işıq yandıqdan sonra real hadisələr görünür. Düzgün informasiya elə işıqdır. O işığı isə respublikada rəsmi qurumlar yaydılar” - deyə müsahibimiz bildirdi.
İradə SARIYEVA
