Azərbaycanda istehsal olunan müasir silah və texnikalar artıq beynəlxalq aləmdə kifayət qədər tanınıb və sınaqdan keçirilib. Trend-in məlumatına görə, bunu Azərbaycan müdafiə sənayesi nazirinin müavini Yəhya Musayev deyib.
Nazir müavini bildirib ki, artıq Azərbaycanın istehsal etdiyi müasir standartlara cavab verən silah və texnikalar xaricə ixrac edilir: "Beynəlxalq sərgilərdə biz müdafiə təyinatlı məmulatları nümayiş etdirmişik və tanıtdırmışıq. Bizim istehsal etdiyimiz müdafiə məmulatları xaricdə kifayət qədər tanınıb və bəyənilib. Beynəlxalq sərgilərdə Azərbaycan hərbi məmulatları dəfələrlə nümayiş edilib. Bu ilk sərgi deyil. Budəfəki sərgi 3 gün olacaq. Ötən il mümkün qədər əhali sərgidə iştirak edə bilmədi. Bu il 4-cü gün "açıq qapı" günü keçiriləcək və hər kəs sərgidə nümayiş olunan silah və texnikalarla tanış olacaq".
Yəhya Musayev deyib ki, Azərbaycanın heç bir ölkədən pulsuz silah-sursat almasına ehtiyac yoxdur. Onun sözlərinə görə, Azərbaycan özü müasir texnologiyalar alıb və ölkədə həmin hərbi sursat və texnikalar istehsal etməyə qadirdir: "Çünki biz ordumuzu mümkün və kifayət qədər silah-sursat, döyüş texnikası ilə təmin edirik".
Ermənistanda keçirilən parad barədə də danışan nazir müavini bildirib ki, Ermənistanda keçirilən parad sadəcə parodiya idi. Onun sözlərinə görə, Ermənistanın Azərbaycandan güclü və müasir silahlarla təmin edilməsi gülüncdür və bu ermənilərin uydurmasıdır: "Ermənistanda keçirilən tədbirə parad demək olmaz. O parad yox, parodiya idi".
Nazir müavini Ermənistandakı "İskəndər M" raketlərinə bərabər kompleksin Pakistandan alınması üçün danışıqların aparılması məsələsinə də münasibət bildirib.O, deyib ki, bu məsələ Müdafiə Sənayesi Nazirliyinə aid deyil: "Biz istehsalçıyıq, silah-sursat almırıq".
Y.Musayev deyib ki, son vaxtlarda xaricdə Azərbaycanın istehsal etdiyi silahlara olan tələbat əhəmiyyətli dərəcədə artıb. Onun sözlərinə görə, hətta sifarişlərin çoxluğundan Azərbaycan Müdafiə Sənayesi Nazirliyi bəzi ölkələrin silah-sursat sifarişlərindən imtina edib: "Vaxtımız və imkanımız yoxdur ki, qısa müddətdə istehsal edək. Buna görə də bəzi sifarişlərdən imtina etmişik. Əsasən Avropa, Afrika və Asiya ölkələrindən silah-sursat sifarişləri alırıq. Onlar ən çox döyüş sursatları, silahlar almaq istəyirlər. Silahlarımız rəqabətli, keyfiyyətlidir və həmin məmulatlar dünya bazarındakı qiymətlərə uyğun satılır".
