Azərbaycan Respublikasının Konstitusiyasına təklif olunan əlavə və dəyişikliklərlə əlaqədar sentyabrın 26-da keçiriləcək ümumxalq səsverməsi (referendum) ilə bağlı Azərbaycan Respublikasının Qırğızıstan Səfirliyində hazırlıq işləri tam başa çatdırılıb.
Səfirlikdən baki-xeber.com-a daxil olan məlumata görə, Səfirlikdə məntəqə seçki komissiyası yaradılıb və Azərbaycan Respublikasının Qırğız Respublikasında fövqəladə və səlahiyyətli səfiri Hidayət Orucov komissiyanın sədri təsdiq edilib.
Səfirlikdə 16 saylı Yasamal üçüncü seçki dairəsinin tərkibində yaradılmış 33 saylı referendum məntəqəsində vətəndaşlarımızın sərbəst şəkildə səs vermələri üçün hər cür şərait yaradılıb.
Bişkekdə yaşayan və işləyən, səsvermə hüququ və konsulluq qeydiyyatında olan vətəndaşlarımızın siyahıları tutulub. Referendum keçirilən gün Bişkekdə ezamiyyətdə olan vətəndaşlarımız da Səfirliyə gedib səsvermədə iştirak edə biləcək.
Həmçinin, Səfirlik tərəfindən Qırğızıstanın kütləvi informasiya vasitələrinə ünvanlanan məlumatda Azərbaycan Respublikasının Konstitusiyasına təklif olunan əlavə və dəyişikliklərlə əlaqədar əsas prinsiplər haqqında informasiya verilir, həmçinin vətəndaşlarımız üçün seçki məntəqəsinin ünvanı və seçkinin keçiriləcəyi vaxtlar qeyd edilib.
Xəbər xidməti
