"Həm siyasi, həm iqtisadi, həm də diaspor sahəsində ölkəmiz üçün böyük əhəmiyyət daşıyan bir səfərdir"
Azərbaycan Prezidenti İlham Əliyev Ümumdünya Yəhudi Konqresinin prezidenti Ronald Lauderin başçılıq etdiyi və Ümumdünya Yəhudi Konqresinin baş icraçı direktoru və icraçı vitse-prezidenti Robert Sinqer, Ümumdünya Yəhudi Konqresinin vitse-prezidenti Qod Nisanov, Avro-Asiya Yəhudi Konqresinin prezidenti Julius Maynl, Rusiya Yəhudi Konqresinin prezidenti Yuri Kanner, vitse-prezidenti German Zaxaryayev və Ümumdünya Yəhudi Konqresinin baş icraçı direktorunun diplomatiya üzrə müavini Maram Sternin üzv olduqları nümayəndə heyətini qəbul edib.
Ümumdünya Yəhudi Konqresi nümayəndə heyətinin Azərbaycana səfər proqramının geniş olduğunu, çoxsaylı görüşlərin keçiriləcəyini vurğulayan Prezident İlham Əliyev qonaqların ölkəmizi daha da yaxından tanıması üçün səfərin yaxşı imkan yaradacağına ümidvar olduğunu bildirib.
Ümumdünya Yəhudi Konqresinin prezidenti Ronald Lauder Azərbaycan və yəhudi xalqları arasında olan tarixi əlaqələrə və yəhudilər üçün ölkəmizdə yaradılan şəraitə görə Prezident İlham Əliyevə minnətdarlığını bildirib. O, Azərbaycanda yaşayan yəhudi icmasına olan münasibəti yüksək qiymətləndirərək bunun bir nümunə olduğunu deyib.
Ronald Lauder Bakının gözlədiyindən də artıq gözəl şəhər olduğunu məmnunluqla qeyd edib və paytaxtımızın gözəlliyinin onlarda dərin təəssürat yaratdığını bildirib. Ümumdünya Yəhudi Konqresinin prezidenti Azərbaycanın iqtisadi sahədə əldə etdiyi uğurlar münasibətilə dövlətimizin başçısına təbriklərini çatdırıb.
Qonaq qeyd edib ki, dünyada mövcud olan maliyyə və iqtisadi böhran şəraitində Azərbaycanın nail olduğu iqtisadi inkişaf onlarda böyük heyranlıq hissi doğurur.
Dünyanın ən nüfuzlu yəhudi təşkilatlarının Azərbaycana səfər etməsi nəyin göstəricisi sayıla bilər?
Beynəlxalq Diaspor Mərkəzi icra aparatının rəhbəri Samir Adıgözəlli qəzetimizə açıqlamasında bildirdi ki, ölkəmizdə müxtəlif xalqların və dinlərin nümayəndələri, o cümlədən yəhudilər arasında əsrlər boyu dostluq münasibəti mövcuddur: "Tarixən azərbaycanlılarla yəhudilər arasında dostluq münasibətləri möhkəm təməl üzərində qurulub. Bununla yanaşı, yəhudilər ölkəmizin ictimai həyatında fəal rol oynayır. Müsəlman ölkəsi kimi, yəhudilərə olduqca mehriban münasibət göstərilir. Təəssüflər olsun ki, biz dünyanın bir çox müsəlman ölkələrində bunun şahidi olmuruq. Yəhudilərin Azərbaycanda bir neçə sinaqoqu fəaliyyət göstərir. Onlar istədiyi kimi ibadət edir. Təsadüfi deyil ki,
2016-cı il Azərbaycanda "Multikulturalizm ili" elan edilib. Bütün bu faktorlar həm də yəhudi təşkilatlarının Azərbaycana marağını artırır. Yəhudilərin ümumi vətəni sayılan İsrail dövlətilə Azərbaycanın sıx və strateji müttəfiqlik münasibətləri mövcuddur. Bunun da yəhudi təşkilatlarının Azərbaycana maraq göstərməsinə böyük təsiri var. Bakıya təşrif buyuran nümayəndə heyətinə fikir versəniz görərsiniz ki, onların sırasında çox zəngin insanlar var. Hesab edirəm ki, onların ölkəmizə maraq göstərməsi həm də investisiya qoyuluşu baxımından yaxşı perspektiv vəd edir. Bu, eyni zamanda, ölkəmizə göstərilən ehtiramın nümunəsidir. Həm siyasi, həm iqtisadi, həm də diaspor sahəsində ölkəmiz üçün böyük əhəmiyyət daşıyan bir səfərdir".
Məhəmmədəli QƏRİBLİ
