"Xarici investorları regionlara cəlb edə biləcək çoxlu sayda səmərəli təklif var"
Xəbər verdiyimiz kimi, bu günlərdə Şirvan-Muğan magistral su kəmərindən Salyan şəhərinə çəkilmiş yeni içməli su xəttinin açılışı zamanı çıxış edən cənab İlham Əliyev qeyd edib ki, "hər bir rayon və rayon rəhbərliyi çalışmalıdır ki, öz rayonuna investisiyalar cəlb etsin".
Prezidentin sözlərinə görə, infrastruktur və sosial infrastruktur layihələrinə dövlət xətti ilə investisiyaların qoyulması davam etdiriləcək. Həmçinin dövlət başçısı qeyd edib ki, dövlət gübrəyə, yanacağa subsidiyalar ayırır, torpaq vergisi istisna olmaqla, kəndlilər bütün vergilərdən azaddır və onlara aqrolizinq yolu ilə texnika verilir.
"Xaricə getmək, orada investorları inandırmaq lazımdır ki, sərmayə qoysunlar. Azərbaycanda kifayət qədər böyük firmalar, şirkətlər var. Onları maraqlandırmaq lazımdır. İndi yerli icra orqanlarının işi bundan ibarətdir", - Prezident yerli icra orqanlarına xitabən qeyd edib.
O bildirib ki, "dövlətin infrastruktur, o cümlədən su layihələrinə ayırdığı milyardlarla vəsait gəlir gətirmir, sırf sosial məna daşıyır. Bir çox ölkələr var ki, pul xərcləməmək üçün bu layihələri icra etmirlər. Buna vəsait xərcləmək istəmirlər, qənaət edirlər. Biz isə sosial layihələri icra edirik. Çünki bu, insanlara lazımdır. Biz bu işləri insanlar üçün yaradırıq, qururuq, ölkəmizi inkişaf etdiririk".
Cənab İlham Əliyev qeyd edib ki, əhalinin çoxalması ilə əlaqədar tələbat və istehlakın da artmasına görə yeni fabriklər, zavodlar, emal müəssisələri yaradılmalıdır.
İcra başçılarına tapşırılan bu yeni iş üslubu hansı nəticələrə səbəb olacaq?
Regionların inkişafı layihələri üzrə ixtisaslaşmış ekspert Orxan Bayramlı qəzetimizə bildirdi ki, Prezident tərəfindən verilən bu tapşırıq rayonların inkişafına səbəb olacaq: "Rayonların abadlaşdırılması əvvəllər sırf dövlət büdcəsi hesabına aparılırdı. Hətta, əksər hallarda, Prezidentin ehtiyat fondundan həmin layihələr üçün vəsait də ayrılırdı. Bizim apardığımız araşdırmalardan məlum olub ki, heç də rayonların hamısında abadlaşma adı ilə həyata keçirilən proseslərdə şəffaflıq olmayıb. Düzdür, həmin proseslərə də iş adamları cəlb olunurdu, ancaq başqa formada. Bəzi hallarda isə iş adamlarına zorla gördürülən istənilən işlərlə bağlı narazılıqlar yaranırdı. Hətta bunun səs-sorağı KİV-lərə gedib çıxırdı. Ölkə başçısının yeni tapşırığı isə olduqca zəruri və yerli qurumlar üçün əlverişlidir. Bir növ, onların əl-qolunu açmış olur. Təsəvvür edin ki, hər hansı bir zirək icra başçısı böyük bir layihə həyata keçirməklə bir rayonun inkişafını təmin edə bilər. Bunun üçün icra başçılarının özləri də xarici investorlarla danışıq apara biləcək. Sizi inandırım ki, mərhələli şəkildə maneələrin aradan götürülməsi regionlara xarici investisiyanın cəlbini əsaslı şəkildə sürətləndirəcək. Bizim royonlarda olduqca işgüzar başçılarımız var. Qısa müddətdə biz rayonlarımıza xarici investisiyanın sürətli cəlbinin şahidi olacağıq. Məlumdur ki, xarici investorları regionlara cəlb edə biləcək çoxlu sayda səmərəli təklif var. Sadəcə onların reallaşması qalır".
Məhəmmədəli QƏRİBLİ
