Dövlət ümumi təhsil müəssisələrində (ümumi təhsil üzrə təhsilverənlərə münasibətdə digər dövlət təhsil müəssisələrində) 60 və daha yuxarı yaşda olan şəxslərin sertifikatlaşdırmada iştirakı könüllü olacaq.
Bu, Milli Məclisin Elm və təhsil komitəsinin ötən iclasında müzakirəyə çıxarılan “Təhsil haqqında” qanuna təklif edilən dəyişiklikdə əksini tapıb.
Qeyd edək ki, sənəddə hazırda 60 və daha yuxarı yaşda olan şəxslərin sertifikatlaşdırmada iştirakına dair müddəa yer almayıb.
Maraqlıdır, yaşı 60-dan yuxarı olan müəllimlər könüllü iştirak zamanı sertifikasiyadan keçməsə, işdən azad ediləcəklərmi?
“Birdən-birə 20 min müəllimi sertifikasiya yolu ilə tədrisdən uzaqlaşdırmağımız onları əvəz edə biləcək kadrların ciddi çatışmazlığını yarada bilər”
Təhsil eksperti Kamran Əsədov bildirdi ki, sertifikasiya olduqca lazımlı və yerində bir prosedurdur: “Müəllimlərin sertifikasıyası pedaqoji işçinin, müəllimin öz ixtisasını hansı səviyyədə bilməsini müəyyənləşdirir. Diaqnostik qiymətləndirmədən fərqli olaraq, bu, ixtisasla praktiki fəaliyyətdə hansı nailiyyətlərin əldə edilməsini də müəyyən edə biləcək. 2014 -2019-cu illərdə mərhələ-mərhələ bütün müəllimlər diaqnostik qiymətləndirmədən keçirildi. Məqsəd Azərbaycanın pedaqoji heyətində əsl bilikli, peşəkar müəllimlərlə digərlərini saf-çürük etmək idi. Diaqnostik qiymətləndirmə birmənalı qarşılanmadı. Az bal toplayanlar bu prosedurun mükəmməl olmamasından şikayətləndilər. Praktika göstərdi ki, heç də bütün yüksək bal toplayanlar real fəaliyyətdə, istehsalat prosesində peşəkar olmur, bəzi hallarda sinfi - şagirdləri idarə etmək səriştəsindən uzaqda qalırlar. Bir sözlə, diaqnostik qiymətləndirmə pedaqoji heyətin nəzəri, bəzi hallarda əzbərçi biliklərini müəyyən edə bilsə də, praktiki səriştəsini, müəllimin dünyagörüşü, etik davranış səviyyəsini, mənəvi dəyərlərə, azərbaycançılıq ideologiyasına sədaqətini yoxlaya bilmədi”.
Ekspertin sözlərinə görə, sertifikasiya prosesində müəllim müəyyən imtahandan keçərək sertifikatını alır və fəaliyyət göstərir.
K.Əsədov onu da əlavə etdi ki, 60 yaşlı müəllimlərin sertifikasiyaya cəlb edilib-edilməməsi təhsil üçün böyük bir itki ola bilməz. Onlar yaşı 60-dan yuxarı olan şəxslərdir. Hazırda təhsil sistemində yaşı 60-dan yuxarı müəllimlərin ümumi sayı çox deyil. Hər il bir fənn üzrə minimum 300-400 nəfərin 60-dan yuxarı yaşı olur. Ümumilikdə yaşı 60-dan yuxarı olan müəllimlərin sayı 20 minə qədərdir. Nəzərə alsaq ki, ölkədə 4432 ümumtəhsil məktəbində 150 min müəllim var və 20 minə yaxının yaşı 60-dan yuxarıdır, bu o qədər də ciddi bir faiz deyil. Bu, təhsil sistemi üçün hər hansı ciddi təhlükə törətmir. Ancaq birdən-birə 20 min müəllimi sertifikasiya yolu ilə tədrisdən uzaqlaşdırmağımız onları əvəz edə biləcək kadrların ciddi çatışmazlığını yarada bilər.
Günel CƏLİLOVA
