Rusiyanın Belqorod şəhərində baş verən partlayış ölkəni yenidən "dost atəşi" qalmaqalına sürükləyib.
"The Moscow Times" qəzeti Rusiya mediasına istinadən xəbər verir ki, Rusiya Hərbi Hava Qüvvələrinə məxsus Su-34 təyyarəsi təsadüfən bombanı Belqorodun mərkəzinə atıb. Partlayışdan sonra şəhər qaranlığa qərq olub.
Yerli xəbərlərə görə, bomba Storozhevaya küçəsindəki elektrik yarımstansiyasının yaxınlığında partlayıb. Həmin vaxt hava hücumu sirenləri səslənməyib, pilotsuz təyyarə xəbərdarlığı da olmayıb. Sakinlər partlayışdan bir neçə saniyə əvvəl sərhəd istiqamətində hərəkət edən Rusiya təyyarəsinin gurultusunu eşitdiklərini bildiriblər.
Partlayış nəticəsində yaranan nəhəng krater ətrafdakı evlərə və bir yük maşınına ziyan vurub. Regional hökumət hadisəni "naməlum sursat"la əlaqələndirib. "The Moscow Times" qəzeti bir nəfərin barotravma diaqnozu ilə xəstəxanaya yerləşdirildiyini bildirib. Şəhər mərkəzindəki svetoforlar sıradan çıxıb və elektrik kəsintiləri baş verib.
Bütün şəhərdə hiss edilən güclü silkələnmə bir yük maşınını aşırıb və yaxınlıqdakı evlərə ziyan vurub. Regional administrasiya hadisəni təsdiqləyib və onu "naməlum bomba" kimi təsvir edib.
Müstəqil jurnalistlərin məlumatına görə, Rusiya təyyarələri bu il ən azı 133 dəfə öz ərazilərinə və ya işğal edilmiş Ukrayna ərazilərinə bomba atıb. Keçən il sərhədə 165 bombanın düşdüyü qeydə alınıb.
Ukrayna Müdafiə Nazirliyinin HUR bölməsi əvvəllər əldə etdiyi telefon danışığını yayımlayıb.
Danışıqlarda sərhəd bölgəsində yaşayan bir qadın hadisəni belə təsvir edir: "11 gün ərzində Rusiya bombardmançı təyyarələri Belqorod bölgəsinə səkkiz bomba atıb. Təsəvvür edə bilərsinizmi?"
Belqorod il ərzində həm Ukrayna tərəfindən, həm də Rusiyanın öz qəzaları nəticəsində dəfələrlə bombalanıb.
Sentyabr ayında Ukrayna şəhərin böyük dron zavoduna zərbə endirib, avqust ayında körpülər dronlarla hədəfə alınıb, oktyabr ayında isə su anbarı bəndinə edilən hücum təchizat yolarının bağlanmasına səbəb olub. Son partlayış isə şəhərin infrastrukturunu bir daha iflic vəziyyətinə salıb.
TAHİR
