Elşad Həsənov: “Bu o deməkdir ki, Azərbaycan regionda Birləşmiş Ştatlar üçün çox böyük önəmə malikdir”
Amerika Birləşmiş Ştatlarının Prezidenti Donald Tramp Prezident İlham Əliyevə təşəkkür məktubu ünvanlayıb.
Nobel Sülh Mükafatına namizədliyini irəli sürmək üçün dövlət başçısı İlham Əliyevin və Ermənistanın Baş naziri Nikol Paşinyanın birgə məktubuna görə təşəkkürünü bildirən Tramp qeyd edib: “Bizi vacib missiyamızı davam etdirməyə ruhlandıran bu yüksək qiymətə görə dərin minnətdarlığımı bildirirəm. Amerika Birləşmiş Ştatlarının Prezidenti olaraq, dünyada münaqişələrə son qoymağa, bütün insanlar üçün sülh və rifahın təmin edilməsinə sadiq qalıram. Sizin davamlı tərəfdaşlığınızla qeyri-mümkün nə varsa, ona nail olacağıq. Davamlı dəstəyinizə görə Sizə bir daha təşəkkür edirəm”.
Trampın məktubunda “Sizin davamlı tərəfdaşlığınızla qeyri-mümkün nə varsa, ona nail olacağıq” fikri nə deməkdir? Bununla ABŞ prezidenti nə demək istəyir?
“Orta Dəhlizə, onun bir vacib seqmenti olan Zəngəzur dəhlizinə mane olsalar, qarşılarında ABŞ-ı görəcəklər”
Sözügedən məsələ ilə bağlı fikirlərini “Bakı-Xəbər”lə bölüşən siyasi ekspert Elşad Həsənovun fikrincə, burada bir sıra məsələlərdən söhbət gedir: “Əvvəla, 8 avqustda Vaşinqtonda əldə edilən razılaşma həqiqətən də 30 ildən artıq davam edən münaqişəyə son qoydu. Trampın Prezident Əliyevə ünvanlandığı məktub göstərdi ki, o heç nəyi diqqətdən kənarda saxlamır. Trampın məktubunun son hissəsində yer alan fikirlər o deməkdir ki, Azərbaycan regionda ABŞ üçün çox böyük önəmə malikdir. Məsələ ondadır ki, Azərbaycan Mərkəzi Asiya ilə Avropanı birləşdirən məsafəcə ən qısa yolun üzərində yerləşir. Birləşmiş Ştatlar Zəngəzur dəhlizinin Ermənistandan keçən hissəsini icarəyə götürməklə, əslində bir formada regiona daxil olmuş oldu. Bu o deməkdir ki, hansısa böyük dövlətlər Orta Dəhlizə, onun bir vacib seqmenti olan Zəngəzur dəhlizinə mane olsalar, qarşılarında ABŞ-ı görəcəklər. Birləşmiş Ştatların Mərkəzi Asiya ölkələrində iqtisadi maraqları var. Təsadüfi deyil ki, Vaşinqtonda 5 Orta Asiya dövlətinin prezidentləri ilə Trampın görüşü oldu. Belə məlumatlar var ki, Azərbaycanı da bu formatda görmək istəyirlər. Çünki həmin ölkələrdə hasil ediləcək nadir metallar və digər mineral ehtiyatlar məhz Azərbaycan üzərindən daşınacaq. Ona görə ki, Azərbaycan bu məsələdə ən etibarlı ölkədir. Onu da qeyd etmək lazımdır ki, Azərbaycanla ABŞ arasında Strateji Tərəfdaşlıq Xartiyasının imzalanması gündəmdədir. Bununla əlaqədar tərəflər arasında işçi qrup yaradılıb. Tramp bununla əmin edir ki, qarşıya qoyulan bütün məqsədlərə birgə nail olmaq mümkün olacaq. Bütün bunlar onu göstərir ki, ABŞ prezidenti sözügedən məsələlərin həyata keçməsində qətiyyətli mövqedən çıxış edir”.
Vidadi ORDAHALLI
