Dünən Prezident İlham Əliyev əfv sərəncamı imzalayıb. Sərəncamla bir çox tanınmış şəxs azadlığa buraxılıb. Əfv siyahısında 2 NİDA-çının adı var. Onlar Üzeyir Məmmədli və Zaur Qurbanlıdır. Həmçinin siyahıda jurnalist Əvəz Zeynallının da adı var. Bundan əlavə, Qurban Məmmədov və Sərdar Əlibəyli də əfv olunub. Ümumilikdə əfv sərəncamı 87 nəfərə şamil edilib.
ABŞ Azərbaycan Prezidenti İlham Əliyevin dekabrın 29-da əfv sərəncamı imzalamasını düzgün istiqamətdə atılmış addım hesab edir. Bu barədə ABŞ Dövlət Departamentinin rəsmi nümayəndəsi Ceff Ratke bildirib.
Penitensiar Xidmətdən verilən məlumata görə, Prezident İlham Əliyevin 31 dekabr - Dünya Azərbaycanlılarının Həmrəylik Günü və Yeni il münasibətilə imzaladığı əfv sərəncamının icrası həyata keçirilməyə başlanıb. Sərəncamın icrası ilə əlaqədar Ədliyyə Nazirliyi Penitensiar Xidməti KİV nümayəndələri, hüquq müdafiəçilərinin cəzaçəkmə müəssisələrinə gedişini təşkil edib.
Penitensiar Xidmətin rəis müavini Hüseyn Əlixanov bildirib ki, sərəncamın icrası bu gün başa çatacaq.
Əfv sərəncamı ilə azadlıqdan məhrum edilmiş 79, islah işləri cəzasına məhkum edilmiş 3, cərimə cəzasına məhkum edilmiş 5 məhkum cəzalarının çəkilməmiş hissəsindən azad edilib.
