KİV DF media nümayəndələrinin geniş toplantısında ilə yekun vurdu və yeni ilin vəzifələrini müəyyənləşdirdi

Dekabrın 24-də "AltunSaray" istirahət mərkəzində Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun 31 dekabr - Dünya Azərbaycanlılarının Həmrəyliyi Günü və Yeni il münasibətilə elan etdiyi fərdi jurnalist yazıları müsabiqəsində birinci yerə layiq görülmüş media nümayəndələrinin mükafatlandırılmasına və qarşıdakı əlamətdar bayramlara həsr olunmuş tədbir keçirilib.
Dövlət himninin səslənilməsi ilə başlayan tədbirdə dövlət və hökumət təmsilçiləri, Milli Məclisin deputatları, ölkədə fəaliyyət göstərən diplomatik korpusların nümayəndələri, aparıcı yerli və xarici kütləvi informasiya vasitələrinin rəhbərləri və müsabiqədə qalib olmuş jurnalistlər iştirak ediblər.
Tədbiri giriş sözü ilə açan Fondun icraçı direktoru Vüqar Səfərli qonaqları və media təmsilçilərini salamlayaraq 2014-cü ilin ölkəmiz üçün əlamətdar hadisələrlə zəngin olduğunu, ictimai həyatın digər sahələri kimi, fikir, söz və məlumat azadlıqlarının inkişaf etdirilməsi, eləcə də kütləvi informasiya vasitələrinin inkişafı istiqamətində mühüm tədbirlərin həyata keçirildiyini bildirib. Fondun 2014-cü ildəki fəaliyyətinin yekunları ilə bağlı geniş hesabatla çıxış edən V.Səfərli mətbuatın maddi-texniki bazasının möhkəmləndirilməsi, jurnalistlərin peşəkarlığının artırılması və sosial vəziyyətinin yaxşılaşdırılması məqsədilə reallaşdırılan çoxsaylı layihələr barədə məlumat verib.
Fondun icraçı direktoru Kütləvi İnformasiya Vasitələrinin İnkişafına Dövlət Dəstəyi Konsepsiyasına uyğun olaraq 19 istiqamət üzrə 34 gündəlik və həftəlik qəzetə maliyyə dəstəyinin davam etdirildiyini, il ərzində həmin qəzetlərdə 6 min səhifədən çox yazıların dərc olunduğunu vurğulayıb. O, Fondun 2014-cü ildə "Azərbaycan mətbuat məkanında ədəbi dilin qorunması", "Azərbaycan teleradio məkanında ədəbi dilin qorunması" və "Жurnalist peşəkarlığının artırılması" mövzusunda layihələri maliyyələşdirdiyini, hər üç layihə üzrə 6 ay aparılmış monitorinqlər zamanı media və teleradio məkanının dil problemlərinin araşdırıldığını və müvafiq təkliflərin irəli sürüldüyünü bildirib.
V.Səfərli ötən illərdə olduğu kimi, 2014-cü ildə də dövlət və yerli icra hakimiyyəti orqanları ilə kütləvi informasiya vasitələrinin əlaqələrinin genişləndirilməsi məqsədilə İmişli, Şəmkir və Xaçmaz rayon icra hakimiyyətləri ilə birgə "Yerli icra hakimiyyəti orqanları ilə kütləvi informasiya vasitələri arasında əlaqələrin inkişaf etdirilməsi" mövzusunda konfranslar keçirdiyini diqqətə çatdırıb. Bundan başqa, Fond 2014-cü il dekabrın 23-də keçirilmiş bələdiyyə seçkiləri ilə əlaqədar KİV nümayəndələrinin seçki prosesində fəallığının təmini, onların hüquq və vəzifələri barədə maarifləndirilməsi məqsədilə 2014-cü il dekabrın 15-də Mərkəzi Seçki Komissiyası ilə birgə "Jurnalistlərin seçki prosesində fəaliyyətinin əsasları" mövzusunda konfrans təşkil edib. Həmin konfransda jurnalistlərə hüquq və vəzifələri barədə məlumat verilib, onlara "Bələdiyyə seçkilərində müşahidəçi kimi iştirak edən jurnalistlər üçün bələdçi" kitabçaları paylanıb.
Dövlət və cəmiyyət üçün prioritet təşkil edən məsələlərin həllində kütləvi informasiya vasitələrinin potensialından səmərəli istifadəyə, jurnalist peşəkarlığının artırılması və onların sosial müdafiəsinin gücləndirilməsi məsələlərinə xüsusi diqqət ayrıldığını deyən V.Səfərli Fond tərəfindən bu məqsədlə 3 dəfə fərdi jurnalist yazıları müsabiqələrinin təşkil olunduğunu diqqətə çatdırıb. Bundan əlavə, il ərzində Nizami, Binəqədi, Sabunçu, Səbail rayon icra hakimiyyətləri, Əmək və Əhalinin Sosial Müdafiəsi və Təhsil nazirlikləri, Azərbaycan Futbol Federasiyaları Assosiasiyası ilə birgə 7 müsabiqə keçirilib, ümumilikdə, 10 müsabiqəyə 500-dən çox jurnalist yazı təqdim edib, 350-dən çox jurnalist mükafatlandırılıb.
V.Səfərli bildirib ki, qaliblərinin təqdimatına yığışdığımız müsabiqəyə 58 kütləvi informasiya vasitəsindən 154 yazı daxil olub. Yazılar 13 ekspert tərəfindən qiymətləndirilib, Müşahidə Şurasının qərarı əsasında 57 redaksiyanı təmsil edən 114 nəfər jurnalist qalib elan edilib: "Müsabiqədə hər istiqamət üzrə I yer üçün 500 manat olmaqla 1, II yer üçün 300 manat olmaqla 2, III yer üçün 200 manat olmaqla 3 mükafatın verilməsi nəzərdə tutulub. Müsabiqədə ikinci və üçüncü yerləri tutmuş jurnalistlər dekabrın 22-də Beynəlxalq Mətbuat Mərkəzində keçirilən tədbirdə mükafatlandırılıblar. Bu gün isə biz müsabiqədə birinci yeri tutmuş jurnalistləri mükafatlandıracağıq".
V.Səfərli daha sonra ölkəmizdə azad sözün, müstəqil mətbuatın inkişafına, jurnalistlərin sosial vəziyyətinin yaxşılaşdırılmasına, onların mənzil probleminin həllinə göstərdiyi yüksək diqqət və qayğıya görə Fondun və media ictimaiyyətinin adından Azərbaycan Respublikasının Prezidenti cənab İlham Əliyevə təşəkkürünü bildirib. V.Səfərli keçirilən tədbirin əlamətdar bir günə - Prezident İlham Əliyevin doğum gününə təsadüf etdiyini diqqətə çatdıraraq media nümayəndələri adından dövlət başçısını təbrik edib, ona can sağlığı və respublikamızda aparılan quruculuq işlərində uğurlar arzulayıb.
Azərbaycan Respublikası Prezidenti Administrasiyasının ictimai-siyasi məsələlər şöbəsinin müdiri, professor Əli Həsənov çıxışında tədbir iştirakçılarını 31 dekabr - Dünya Azərbaycanlılarının Həmrəyliyi Günü və Yeni il münasibətilə təbrik edib. Hazırkı informasiya əsrində jurnalistlərin fəaliyyətinin cəmiyyət üçün son dərəcə əhəmiyyət daşıdığını bildirən Əli Həsənov 2014-cü ili kütləvi informasiya vasitələrinin inkişafı baxımından uğurlu il kimi dəyərləndirib. Azərbaycanda jurnalistlərə yaradılan geniş imkanlardan, azad medianın inkişafı istiqamətində görülən işlərdən söz açan Əli Həsənov bəzi beynəlxalq qurumların bu uğurların üzərinə kölgə salmaq cəhdlərinin qərəzli xarakter daşıdığını vurğulayıb: "Azərbaycan media nümayəndələri ölkəmizdə baş verən hadisələri, dövlətin siyasətini, hökumətin fəaliyyətini, o cümlədən Azərbaycanın ətrafında, beynəlxalq aləmdə baş verən hadisələri sərbəst şəkildə təhlil edir, heç bir kənar müdaxilə olmadan istədikləri informasiyanı toplayaraq ictimaiyyətə çatdırır. Heç kim deyə bilməz ki, Azərbaycanda bu sahədəki mövcud vəziyyət dünyanın hansısa ölkəsindən pisdir. Heç kim deyə bilməz ki, Azərbaycanda hər hansı jurnalist dövlət tərəfindən, yaxud dövlətin ayrı-ayrı strukturları tərəfindən təzyiqlərə məruz qalıb".
Əsası Həsən bəy Zərdabi tərəfindən qoyulan Azərbaycan milli mətbuatının hazırda özünün parlaq inkişaf dövrünü yaşadığını deyən Əli Həsənov ölkəmizdə söz və mətbuat azadlıqlarının bərqərar olmasında ulu öndər Heydər Əliyevin misilsiz xidmətlərini xatırladıb. Əli Həsənov ulu öndərin siyasi iradəsi və böyük səyləri nəticəsində ölkədə hər kəsin sərbəst şəkildə informasiya almaq və yaymaq hüququnun təmin olunduğunu, 1998-ci il avqustun 6-da mətbuat üzərində senzuranın ləğv edildiyini diqqətə çatdırıb. Prezident Administrasiyasının ictimai-siyasi məsələlər şöbəsinin müdiri deyib ki, əsası ümummilli lider Heydər Əliyev tərəfindən qoyulmuş bu siyasət son 11 ildə Azərbaycan Respublikasının Prezidenti İlham Əliyev tərəfindən konseptual şəkildə, müasir dövrün reallıqları nəzərə alınmaqla davam etdirilir.
Əli Həsənov Prezident İlham Əliyevin 2008-ci il 31 iyul tarixli Sərəncamı ilə təsdiq edilmiş "Azərbaycan Respublikasında Kütləvi İnformasiya Vasitələrinin İnkişafına Dövlət Dəstəyi Konsepsiyası"nı söz və məlumat azadlığının, KİV-lərin müstəqilliyinin təmini məqsədilə kompleks tədbirlər nəzərdə tutan mühüm sənəd kimi dəyərləndirib. Prezident Administrasiyasının şöbə müdiri 2009-cu ildə yaradılmış Kütləvi İnformasiya Vasitələrinin İnkişafına Dövlət Dəstəyi Fondunun KİV-lərin maddi-texniki bazasının, jurnalistlərin sosial müdafiəsinin gücləndirilməsi məqsədilə ardıcıl tədbirlər həyata keçirdiyini bildirib. Əli Həsənov, həmçinin Azərbaycanın jurnalistləri dövlət hesabına mənzillə təmin edən yeganə dövlət olduğunu da xüsusi qeyd edib: "Dövlətimizin başçısının müvafiq Sərəncamına əsasən 156 mənzilli bina inşa edilərək jurnalistlərə paylanıb. Hazırda 250 mənzildən ibarət daha bir binanın tikintisi davam etdirilir. Biz bu gün çox məmnuniyyətlə və qürur hissi ilə qeyd edə bilərik ki, Azərbaycanda azad media formalaşıb, inkişaf edir və bundan sonra da inkişaf edəcək. Azərbaycan dövləti özünün daxili həyatını azad mediasız təsəvvür etmir. Bəlkə də Avropa və dünya ölkələrinin çoxundan qabaq bu dəyər Azərbaycan mediasına və onların nümayəndəsi olan jurnalistlərə məxsusdur".
Prezident Administrasiyasının şöbə müdiri çıxışının sonunda 31 Dekabr - Dünya Azərbaycanlılarının Həmrəyliyi Günü və Yeni il münasibətilə bütün jurnalistləri təbrik edərək onlara uğurlar arzulayıb. Çıxışının sonunda Prezident İlham Əliyevi doğum günü münasibətilə təbrik edən Əli Həsənov onun rəhbərliyi altında ölkəmizin daha böyük uğurlara imza atacağına əminliyini ifadə edib.
Sonra Fondun 31 dekabr Dünya Azərbaycanlılarının Həmrəyliyi Günü və Yeni il münasibətilə elan etdiyi fərdi jurnalist yazıları müsabiqəsinin qalibləri mükafatlandırılıb.
Mükafatlandırma mərasimindən sonra çıxış edən Mətbuat Şurasının sədri Əflatun Amaşov qalib jurnalistləri təbrik edib, habelə belə müsabiqələrin keçirilməsinin əhəmiyyətindən söz açıb. O, "Жurnalistlərin dostu" mukafatına layiq görülmüş Prezident İlham Əliyevin mediaya əsil dost münasibəti göstərməsini, jurnalistlərin problemlərinin həllinə həssaslıqla yanaşmasını yüksək dəyərləndirib.
Əflatun Amaşov son 11 ildə Prezident İlham Əliyevin rəhbərliyi altında Azərbaycanda ictimai-siyasi sabitliyin daha da möhkəmləndiyini, respublikamızın Cənubi Qafqaz iqtisadiyyatının 75 faizinə sahiblik etdiyini, regionların sosial-iqtisadi inkişafı, yeni iş yerlərinin açılması, yoxsulluğun səviyyəsinin aşağı salınması, demokratikləşmə və hüquqi dövlət quruculuğu sahəsində ciddi uğurların əldə olunduğunu diqqətə çatdırıb. Dünyanın informasiya ilə idarə olunduğunu deyən Əflatun Amaşov ölkə jurnalistlərini milli həqiqətlərin beynəlxalq ictimaiyyətə obyektiv şəkildə çatdırmağa, dövlətçiliyin və milli maraqların müdafiəsində dayanmağa çağırıb
Tədbirə yekun vuran Fondun icraçı direktoru Vüqar Səfərli rəsmi hissənin yekunlaşdığını bildirərək tədbir iştirakçılarını bir daha 31 Dekabr - Dünya Azərbaycanlılarının Həmrəyliyi Günü və Yeni il münasibətilə təbrik edib, onlara gələcək fəaliyyətlərində uğurlar arzulayıb.
Sonra tədbir bədii hissə ilə davam etdirilib.